ខេត្តបន្ទាយមានជ័យ ៖ បុរសជាឪពុកដែលមានពាក្យគេតែងពោលថា ត្រីឆ្កោរស៊ីកូនឯងនោះ ភាគច្រើនគឺកើតមានចំពោះតែកូនចុង ឬកូនដើមប៉ុណ្ណោះ តែបុរសជាឪពុកសាច់ឈាមខ្លួនឯង បានចាប់កូនស្រីបង្កើតរបស់ខ្លួនរំលោភបានសម្រេចជាច្រើន ទើបបែកធ្លាយ ហើយស្រី្តជាម្តាយបានប្តឹងសមត្ថកិច្ចព្រហ្មទណ្ឌកម្រិតធ្ងន់ ដែលដឹកនាំដោយលោកវរសេនីយ៍ទោ ភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកម្រិតធ្ងន់ សហការណ៍ជាមួយអាជ្ញាធរមូលដ្ឋានភូមិក្បាលស្ពាន សង្កាត់ប៉ោយប៉ែត និងកម្លាំងនគរបាលអធិការដ្ឋានក្រុងប៉ោយប៉ែត ចាំស្ទាក់ចាប់ឃាត់ខ្លួនបាននៅវេលាម៉ោង០៩និង១៥នាទីយប់ ថ្ងៃទី៣១ ខែមករា ឆ្នាំ២០១៨ ខណៈពេលជនសង្ស័យឆ្លងពីដីថៃមកខ្មែរវិញ ក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ ។
លោកកវរសេនីយ៍ទោ ភឿង ម៉ាន់ នាយការិយាល័យនគរបាលព្រហ្មទណ្ឌកម្រិតធ្ងន់ បានឲ្យដឹងថា បន្ទាប់ពីទទួលបណ្តឹងពីម្តាយជនរងគ្រោះ និងជាប្រពន្ធនោះ លោកឧត្តមសេនីយ៍ទោ អាត់ ខែម ស្នងការនគរបាលខេត្ត និងមានការសម្របសម្រួលពីលោកព្រះរាជអាជ្ញាអមសាលាដំបូងខេត្តបន្ទាយមានជ័យ គឺលោក មាស ចាន់ពិសិដ្ឋ កម្លាំងនគរបាលការិយាល័យព្រហ្មទណ្ឌកម្រិតធ្ងន់ សហការណ៍ជាមួយកម្លាំងនគរបាលក្រុងប៉ោយប៉ែត និងអាជ្ញាធរមូលដ្ឋាន បានធ្វើការចាំស្ទាក់ចាប់ជនល្មើសជាឪពុកល្មោភកាមម្នាក់ តាំងពីម៉ោង០២និង៣០នាទីរសៀល ដល់ម៉ោង០៩និង១៥នាទីយប់ ថ្ងៃទី៣១ ខែមករា ឆ្នាំ២០១៨ ទើបចាប់ជនល្មោភកាមនេះបាន ខណៈពេលដែលអាជ្ញាធរថៃចាប់បញ្ជូនពលករខ្មែរដែលឆ្លងដែនខុសច្បាប់ត្រលប់មកវិញ តាមច្រកព្រំដែនអន្តរជាតិប៉ោយប៉ែត ។
លោកឧត្តមសេនីយ៍ត្រី សិទ្ធ ឡោះ ស្នងការរង ទទួលផែននគរបាលព្រហ្មទណ្ឌ បានឲ្យដឹងថា ជនល្មោភកាមចាប់បង្ខំកូនស្រីបង្កើតខ្លួនឯង ដែលមានអាយុទើប១២ឆ្នាំ រំលោភបានសម្រេចជាច្រើននោះ ឈ្មោះ ឈុន សារុំ អាយុ៣៤ឆ្នាំ នៅភូមិព្រីងកោង ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ។ នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានចាប់បង្ខំកូនស្រីបង្កើតរបស់ខ្លួនរំលោភពិតប្រាកដមែន ទាំងនៅស្រុកខ្មែរ និងនៅថៃ ក្នុងអំឡុងខែឧសភា រហូតមកដល់ដើមខែធ្នូ ឆ្នាំ២០១៧មកម្ល៉េះ គឺបានសម្រេចជាច្រើនដង ខណៈពេលប្រពន្ធមិននៅផ្ទះ ក្រោកទៅលក់ដូរនៅផ្សារថៃ ហើយខ្លួនបានដេកប្រឡែងលេងជាមួយកូនស្រីរហូតមានចំណង់អារម្មណ៍ផ្លូវភេទ ។
លោកឧត្តមសេនីយ៍ត្រីស្នងការរងបានបញ្ជាក់ថា ដោយផ្អែកទៅលើម្តាយជនរងគ្រោះ និងចម្លើយសារភាពរបស់ជនល្មើស ឈ្មោះ ឈុន សារុំ នេះកម្លាំងនគរបាលជំនាញព្រហ្មទណ្ឌកម្រិតធ្ងន់កំពុងកសាងសំណុំរឿងបញ្ជូនខ្លួនទៅសាលាដំបូងនៅថ្ងៃទី០១ ខែកុម្ភៈ នេះផងដែរ ៕
ចែករំលែកព័តមាននេះ