ខេត្តបន្ទាយមានជ័យ ៖ ស្ត្រីម្នាក់ស្លាប់ភ្លាមៗដោយឆក់ចរន្តអគ្គិសនី ព្រមទាំងបណ្តាលឱ្យឆេះជាអគ្គិភ័យ នៅក្នុងឃ្លាំងលក់ទិញអេតចាយទំហំ២០គុណ២៥ម៉ែត្រ ខណៈភ្លៀងកំពុងធ្លាក់ស្រិចៗផង បានកើតឡើងនៅ វេលា ម៉ោង៨និង២៤នាទីព្រឹកថ្ងៃទី៣០ មករា នៅភូមិភ្នំតូចជើង ឃុំភ្នំតូច ស្រុកមង្គលបុរី ។
លោកវរសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបុរីបានឱ្យដឹងថា ជនរងគ្រោះដែលស្លាប់ក្នុងគ្រោះអគ្គិភ័យបណ្តាលមកពីទុស្សេចរន្តភ្លើងឈ្មោះ ធូ តាំងហូវ ហៅតាំង ភេទស្រី អាយុ៤៧ឆ្នាំ ជាស្ត្រីមេម៉ាយមានកូនប្រុស ស្រីចំនួន៣នាក់ ។ លោកអធិការបានបញ្ជាក់ថា តាមសាក្សីនិយាយថា មុនពេលកើតហេតុជនរងគ្រោះបានដេកនៅក្នុងបន្ទប់ម្នាក់ឯង ក៏ស្រាប់តែឃើញមានផ្សែងហុយចេញពីក្នុងបន្ទប់ ចំណែកកូនៗទៅរៀនអស់ ។
នៅពេលមានគ្រោះអគ្គិភ័យឆេះហុយផ្សែងទើបគេដឹង ក៏ផ្អើលឆោឡោ និងមានរថយន្តពន្លត់អគ្គិភ័យ របស់ស្នងការដ្ឋានចំនួន៣គ្រឿង រួមទាំងកម្លាំងនគរបាលស្រុកមង្គលបូរី និងប្រជាពលរដ្ឋនៅក្បែរខាងជួយអន្តរាគមន៍បាចនិងបាញ់ទឹកពន្លត់ ទើបរលត់អស់ទាំងស្រុង មិនរាលដាលឆេះសម្ភារក្នុងឃ្លាំងនោះបន្តទៀតទេ តែស្ត្រីម្ចាស់ផ្ទះក៏ត្រូវឆេះស្លាប់រោលខ្មៅ ។
លោកវរសេនីយ៍ឯក ស៊ិន ណារ៉ាក់ បានបញ្ជាក់បន្ថែមថា តាមការពិនិត្យនៅលើខ្លួនសពឃើញមានខ្សែភ្លើងព័ទ្ធលើខ្លួន ដូច្នេះបើតាមការសន្និដ្ឋានជំហានដំបូង សង្ស័យជនរងគ្រោះគាត់យកឌុយខ្សែភ្លើងដោតព្រីភ្លើង ទើបបណ្តាលឱ្យទុស្សេឆេះហើយឆក់ស្លាប់ខ្លួនឯងតែម្តង ៕
ចែករំលែកព័តមាននេះ