ខេត្តស្ទឹងត្រែង ៖ ប្រាសាទមួយស្ថិតនៅត្រើយខាងលិចដងទន្លេមេគង្គ ចំណុចអូរក្រាក់ ឃុំសៀមបូក ស្រុកសៀមបូក ខេត្តស្ទឹងត្រែង ជាប់ព្រំប្រទល់ស្រុកសំបូរ ខេត្តក្រចេះ ត្រូវអ្នកភូមិដាក់ឈ្មោះថា…
ខេត្តស្ទឹងត្រែង ៖ ប្រាសាទមួយស្ថិតនៅត្រើយខាងលិចដងទន្លេមេគង្គ ចំណុចអូរក្រាក់ ឃុំសៀមបូក ស្រុកសៀមបូក ខេត្តស្ទឹងត្រែង ជាប់ព្រំប្រទល់ស្រុកសំបូរ ខេត្តក្រចេះ ត្រូវអ្នកភូមិដាក់ឈ្មោះថា «ប្រាសាទកំណប់» ។
តាមការឱ្យដឹង តៗគ្នា មូលហេតុដែលអ្នកភូមិរស់នៅក្បែរនោះដាក់ឈ្មោះ «ប្រាសាទ កំណប់» ព្រោះនៅពេលប្រទះឃើញប្រាសាទនោះមានក្រុមមួយចំនួនទៅគាស់កកាយយកវត្ថុបុរាណទៅលក់ និងខ្លះទៀត
គាស់បានមាស ពេជ្រ កែវ កង ពីបុរាណ ដែលគេកប់នៅទីនោះយកទៅរក្សាទុក និងមួយចំនួនយកទៅលក់ ដែលរហូតដល់ពេលនេះបន្សល់ទុកតែផ្ទាំងថ្មរដិបរដុប ដូចជាផ្ទាំងថ្មយោនី និងថ្មឥដ្ឋកប់នៅក្នុងរណ្តៅដីប៉ុណ្ណោះ។
អ្នករស់នៅក្បែរនោះឱ្យដឹងថា ទីតាំងប្រាសាទបុរាណនោះនៅដាច់ស្រយាលក្នុងព្រៃជ្រៅ ហើយបានឆ្លងកាត់សង្គ្រាមរាប់ទសវត្សមានជនខិលខូចមួយចំនួនជីកគាស់កាយរកបណ្តាលឱ្យខូចទ្រង់ទ្រាយប្រាសាទ ។ ម្យ៉ាងទៀតដោយសារតែប្រាសាទសង់រាប់រយឆ្នាំ ហើយធម្មជាតិបានបំផ្លាញបណ្តាលឱ្យបាក់រលំកប់ក្នុងដីយ៉ាងជ្រៅ ។លាក់ពួននៅក្នុងព្រៃក្រាស់ ពិបាកធ្វើដំណើរ ទៅដល់ ហើយកម្រមានអ្នកភូមិ ឬអាជ្ញាធរឆ្លងកាត់ណាស់ធ្វើឱ្យប្រាសាទមួយនោះមិនមានការចាប់អារម្មណ៍ និងការអភិរក្សពីអាជ្ញាធរមុនៗ ។
លោកថោង ស្រាន់ អភិបាលស្រុកសៀមបូក ទើបតែទៅកាន់តួនាទីបានរយៈពេលជាង២ខែកន្លងមកនេះឱ្យដឹងកាលពីព្រឹកថ្ងៃទី២៩ ខែមករា ឆ្នាំ២០១៨ថា បន្ទាប់ពីបានដឹកនាំ មន្ត្រីពិនិត្យស្ថានភាពភូមិសាស្ត្រ ការរស់នៅ និងការបង្កបង្កើនផលប្រជាពលរដ្ឋនៅតាមតំបន់ដាច់ស្រយាល ។ ខណៈពេលនោះក្រុមការងារ ក៏បានទៅដល់ប្រាសាទបុរាណមួយមានវ័យចំណាស់រាប់រយឆ្នាំ កំពុងតែលាក់ខ្លួនពួនអាត្មាក្នុងព្រៃ ស្ថិតនៅចំណុចអូរក្រាក់ ឃុំសៀមបូក ស្រុកសៀមបូក ជាប់ព្រំប្រទល់ស្រុកសំបូរ ខេត្តក្រចេះ ។
តាមការពិនិត្យលើផ្ទាំងថ្មដែលនៅសេសសល់ពីការគាស់កកាយ ប្រាសាទនោះមានសណ្ឋានដូចប្រាសាទព្រះគោនៅទីរួមស្រុកថាឡាបរិវ៉ាត់ និងប្រាសាទសម្បូរព្រៃគុក ខេត្តកំពង់ធំ ហើយប្រាសាទនេះមានទិសច្រើន និងមានស្រះទឹកនៅក្បែរនោះ ។
លោកអភិបាលស្រុកថ្លែងថា «ប្រាសាទដែលប្រទះឃើញនេះមិនទាន់ដឹងថាមានឈ្មោះអ្វីទេ ហើយសាងសង់ក្នុងរជ្ជកាលណាដែរ ដោយខ្ញុំ និងអញ្ជើញក្រុមបច្ចេកទេស អ្នកជំនាញ និងមន្ត្រីមន្ទីរវប្បធម៌ និងវិចិត្រសិល្បៈខេត្តចុះត្រួតពិនិត្យ សិក្សាឈ្វេងយល់ថា តើប្រាសាទនោះ មានឈ្មោះអ្វីសាងសង់ក្នុងសម័យកាលណា ? ហើយក៏នឹងរៀបចំឱ្យមានផ្លូវទៅកាន់ទីនោះ ព្រោះថាទីតាំងភូមិសាស្ត្រមានទឹកទន្លេមេគង្គព្រៃព្រឹក្សា សមជាតំបន់គួរឱ្យទាក់ទាញ ដែលពេលបច្ចុប្បន្ននេះ អាជ្ញាធរស្រុក បានចាត់វិធានការហ៊ុមព័ទ្ធចំណុចជុំវិញប្រាសាទនោះ២គីឡូម៉ែត្រ៤ជ្រុងដើម្បីរង់ចាំក្រុមជំនាញមកពិនិត្យ» ៕
ចែករំលែកព័តមាននេះ