រាជធានីភ្នំពេញ ៖ នៅក្នុងដំណើរទស្សនកិច្ចរបស់ប្រមុខដឹកនាំកម្ពុជា សម្ដេចតេជោហ៊ុន សែននៅប្រទេសឥណ្ឌាកាលពីសប្ដាហ៍មុននេះ ក៏មានការរៀបចំជាធុរកិច្ចឥណ្ឌា-កម្ពុជា ដើម្បីចងសម្ព័ន្ធភាព និងបង្កើនធុរកិច្ចទៅវិញទៅមករវាងកម្ពុជា-ឥណ្ឌាផងដែរ ។ នៅក្នុងវេទិកាដ៏សំខាន់នោះ សម្ដេចតេជោ ហ៊ុន សែន បានស្វាគមន៍ចំពោះធុរជនឥណ្ឌាដែលមានបំណងមកបណ្ដាក់ទុនវិនិយោគនៅកម្ពុជា ។
សម្តេចតេជោបានបង្ហាញពីសក្ដានុពលលើការវិនិយោគមួយចំនួនទៅកាន់វិនិយោគិនឥណ្ឌា ដែលនឹងមានបំណងមកកាន់កម្ពុជា ដូចជាវិស័យទេសចរណ៍ ព័ត៌មានវិទ្យា កសិកម្ម និងវិស័យមួយចំនួនទៀតដែលកំពុងតែមានការរីកចម្រើន និងត្រូវការវិនិយោគបន្តបន្ទាប់ទៀតនៅថ្ងៃអនាគត ។ សម្តេចតេជោក៏បានបញ្ជាក់ផងដែរអំពីស្ថិរភាពនយោបាយកម្ពុជាល្អ ជាមួយកំណើនសេដ្ឋកិច្ចល្អ មានការបើកចំហឲ្យប្រើប្រាស់រូបិយប័ណ្ណបរទេស ដោយមិនចាំបាច់ប្តូរមកប្រាក់រៀល ពាណិជ្ជករបរទេសអាចមានសិទ្ធិវិនិយោគ១០០% ដោយមិនចាំបាច់មានពាណិជ្ជករក្នុងស្រុកឈរភាគហ៊ុនជាមួយ ហើយច្បាប់វិនិយោគកម្ពុជាក៏បានលើកទឹកចិត្ត និងផ្តល់នូវអត្ថប្រយោជន៍ជាច្រើនផងដែរ ។ ទន្ទឹមនឹងនេះ កម្ពុជាក៏សម្បូរធនធានមនុស្សដែលជាកម្លាំងពលករប្រមាណ៧០% ដែលអាចនឹងជួយឲ្យកិច្ចការវិនិយោគនៅកម្ពុជាទទួលបានជោគជ័យជាមិនខាន ។
សម្តេចតេជោ បានអំពាវនាវឲ្យវិនិយោគិនឥណ្ឌាអញ្ជើញទៅទស្សនាកម្ពុជា ហើយសិក្សាអំពីសក្តារនុពលទាំងឡាយដែលអាចធ្វើពាណិជ្ជកម្ម និងវិនិយោគបាននៅក្នុងប្រទេសកម្ពុជាស្របពេលដែលនាយករដ្ឋមន្ត្រីនៃប្រទេសទាំងពីរកំពុងពង្រឹងនិងពង្រីកទំហំពាណិជ្ជកម្ម និងកិច្ចសហប្រតិបត្តិការដែលធានាចំពោះផលប្រយោជន៍នៃការបណ្តាក់ទុនវិនិយោគដែលនាំមកនូវផលប្រយោជន៍ជាច្រើនសម្រាប់ប្រទេសទាំងពីរ ។
បើតាមអ្នករកទទួលខាងវិស័យទេសចរណ៍បានលើកឡើងផងដែរថា កម្ពុជាមានតំបន់មួយចំនួនដែលអាចឲ្យភ្ញៀវទេសចរឥណ្ឌាមកទស្សនា ជាក់ស្ដែងប្រាង្គប្រាសាទមួយចំនួននៅលើទឹកដីកម្ពុជា ក៏មានជាប់ទាក់ទងទៅនឹងជំនឿសាសនារបស់ប្រជាជនឥណ្ឌា ដូចនេះពួកគេអាចមកគោរពប្រណិប័តន៍ និងបួងសួងដល់ព្រះរបស់ពួកគេដែលបានសាងសង់នៅលើទឹកដីកម្ពុជាតាំងពីរយូរ ។
លោក លូ ម៉េង សមាជិកមួយរូបនៃសមាគមភោជនីយដ្ឋានកម្ពុជា បានលើកឡើងថា បច្ចុប្បន្នភ្ញៀវទេសចរឥណ្ឌានៅកម្ពុជាមិនទាន់មានច្រើនប៉ុន្មានទេ ក៏ប៉ុន្តែកម្ពុជាអាចមានលទ្ធភាពទទួលភ្ញៀវទេសចរទាំងនោះបាន ព្រោះភោជនីយដ្ឋានបែបឥណ្ឌាក៏មានវត្តមានមួយចំនួនផងដែរនៅប្រទេសកម្ពុជា ។ ដូចនេះ បើសិនជាមានការតភ្ជាប់ជើងហោះហើរត្រង់ពីឥណ្ឌាមកកាន់កម្ពុជា សង្ឃឹមថាភ្ញៀវទេសចរឥណ្ឌាមកទស្សនានៅកម្ពុជាកាន់តែច្រើន ហើយជាពិសេសទំនាក់ទំនងរវាងប្រទេសទាំងពីរក៏កាន់តែជិតស្និទ្ធបន្ថែមទៀតផង ។
បើតាមប្រសាសន៍សម្ដេចតេជោថា ពេលនេះគឺជាឱកាសដ៏ល្អបំផុតសម្រាប់ពាណិជ្ជករ និងវិនិយោគិនឥណ្ឌាមកបណ្តាក់ទុននៅកម្ពុជា។ កន្លងមកគឺមានគម្រោងឯកជនប្រមាណ៥ ដែលវិនិយោគនៅកម្ពុជាលើទឹកប្រាក់ប្រមាណ១០៥លានដុល្លារ ។ សម្តេចតេជោចង់ឃើញក្រុមហ៊ុនឥណ្ឌាជាច្រើនទៀតមកកម្ពុជា និងចង់ឲ្យមានជើងហោះហើរត្រង់ពីឥណ្ឌាមកកម្ពុជាផងដែរ ដើម្បីជួយសម្រួលអ្នកទេសចរ និងពាណិជ្ជករកាន់តែងាយស្រួលក្នុងការធ្វើដំណើរ និងដឹកជញ្ជូនទំនិញ ។
កាលពីឆ្នាំ២០១៦ ភ្ញៀវទេសចរឥណ្ឌាមកកម្ពុជាមានជាង៤ម៉ឺននាក់ប៉ុណ្ណោះ ។ ចំណែកទំហំពាណិជ្ជកម្មរវាងឥណ្ឌា និងកម្ពុជាក្នុងឆ្នាំ២០១៥ មានប្រមាណ១២០លានដុល្លារ និងឆ្នាំ២០១៦ មាន១១១លានដុល្លារអាមេរិក ៕
ចែករំលែកព័តមាននេះ