រាជធានីភ្នំពេញ ៖ បណ្តឹងរបស់លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិត្រូវបានតុលាការកំពូលសម្រេចច្រានចោល កាលពីថ្ងៃទី២៩ ខែមករា ឆ្នាំ២០១៨នេះ ដោយមិនលើកយកមកជំនុំជម្រះឡើងវិញទេ ចំពោះការរំលាយបក្សប្រឆាំងកន្លងមក។ នេះបើយោងតាមដីកាសម្រេចរបស់តុលាការកំពូល ។
សូមរម្លឹកថា កាលពីថ្ងៃទី១៦ ខែវិច្ឆិកា ឆ្នាំ២០១៧ ចៅក្រុមជំនុំជម្រះតុលាការកំពូលបានសម្រេចប្រកាសសាលដីការំលាយគណបក្សសង្គ្រោះជាតិ និងហាមឃាត់ថ្នាក់ដឹកនាំតំណាងរាស្ត្រ និងសកម្មជនគណបក្សប្រឆាំងចំនួន១១៨រូប មិនឲ្យធ្វើនយោបាយ៥ឆ្នាំនិងបិទផ្លូវប្តឹងតវ៉ា។
ក្រោយមកនៅថ្ងៃទី២៨ ខែធ្នូ ឆ្នាំ២០១៧ បណ្តឹងសើរើរបស់លោក អ៊ូ ច័ន្ទរ័ត្ន និងសហការីរបស់ខ្លួនត្រូវបានមេធាវីលោក ផែង ហេង បានយកទៅដាក់នៅតុលាការកំពូល ក្នុងគោលបំណងប្តឹងតវ៉ាលើដីកាសម្រេចរបស់តុលាការកំពូល។
យ៉ាងណាមិញ តុលាការបានច្រានចោលបណ្តឹងរបស់លោកទាក់ទងនឹងបណ្ដឹងសុំឱ្យជំនុំជម្រះសារជាថ្មីលើសំណុំរឿង លេខ៣៤០(ឆ) ទាក់ទងនឹងការរំលាយគណបក្សសង្គ្រោះជាតិ, ការសុំឱ្យចេញរក្សាការពារសមាជិកក្រុមប្រឹក្សា រាជធានី-ខេត្ត ក្រុង-ស្រុក-ខណ្ឌ និងឃុំ-សង្កាត់ និងបណ្ដឹងទាមទារសិទ្ធិធ្វើនយោបាយឡើងវិញ។
ចែករំលែកព័តមាននេះ