ខេត្តកំពត ៖ តាមប្រភពពត៌មានពីអធិការស្រុកអង្គរជ័យបានរាយការណ៍មកស្នងការដ្ឋាននគរបាលខេត្ត កាលពីវេលាម៉ោង១១ និង១៥នាទី ថ្ងៃទី៣០ ខែមករា ឆ្នាំ២០១៨នេះថា មានស្ត្រីម្នាក់ និងកូនប្រុស២នាក់បានមកដេកផ្ទះសំណាក់មួយមានឈ្មោះ សុខមនោរម្យ ស្ថិតនៅភូមិត្រពាំងខ្វា ឃុំភ្នំកុង ស្រុកអង្គរជ័យ ខេត្តកំពត ចំនួន២យប់រួចមកហើយ។ ហើយនៅព្រឹកថ្ងៃទី៣០ ខែមករា ឆ្នាំ២០១៨នេះ ដោយមិនបានបញ្ជាក់ម៉ោងទេ ស្ត្រីរូបនេះបានយកថ្នាំពុលមកលាយក្នុងបាយឲ្យ កូនទទួលទានរួមទាំងខ្លួនឯងផង បណ្តាលឲ្យកូនពុលធ្ងន់ធ្ងរដឹកទៅសង្គ្រោះនៅមន្ទីរពេទ្យខេត្តតាកែវ ហើយកូនប្រុសទាំងពីរបានស្លាប់ពាក់កណ្តាលផ្លូវ រីឯម្តាយ អាការៈធ្ងន់ធ្ងរកំពុងសង្គ្រោះនៅក្នុងមន្ទីរពេទ្យ ខេត្តតាកែវ។ លោកវរសេនីយឯក សៅ សំអឿន ស្នងការរង ទទួលផែនព្រហ្មទណ្ឌបានឲ្យដឹងថា ក្រោយពី មានព័ត៌មានថា មានមនុស្សបានពុលថ្នាំស្លាប់នៅផ្ទះសំណាក់ខាងលើ កម្លាំងអធិការស្រុកអង្គរជ័យ បានទៅដល់កន្លែងកើតហេតុ ហើយបានធ្វើការសាកសួរម្ចាស់ផ្ទះសំណាក់ ពីហេតុការណ៍កើតឡើង ត្រូវបានម្ចាស់ផ្ទះសំណាក់ឲ្យដឹងថា មាននារីម្នាក់ឈ្មោះ ប៉ាក សុខហេង អាយុប្រហែល៣០ឆ្នាំ មានកូនប្រុស២នាក់។
កូនប្រុសទី១-ឈ្មោះ ហ៊ាល សុវណ្ណាមិ អាយុ១០ឆ្នាំ កូនប្រុសទី២- ឈ្មោះ ហ៊ាល ក្តាន់ អាយុ៦ឆ្នាំ ទាំង៣នាក់ម្តាយ និងកូនមានទីលំនៅឃុំព្រៃស្លឹក ស្រុកទ្រាំង ខេត្តតាកែវ។ មកស្នាក់នៅផ្ទះសំណាក់យីហោ សុខមនោរម្យ នេះរយៈពេលពីរយប់ហើយ បើតាមប្រភពពត៌មានថា ការដែលចាកចេញពីផ្ទះទាំងបីនាក់ម្តាយ និងកូនមកស្នាក់នៅផ្ទះសំណាក់នេះដោយមាន ការឈ្លោះប្រកែកគ្នាជាមួយប្តីផង។ ប្រភពដដែលឲ្យដឹងទៀតថា ស្រាប់តែនៅនៅថ្ងៃទី៣០ មករា ២០១៨នេះ មានហេតុការណ៍ថា ម្តាយបានលាយថ្នាំពុលក្នុងបាយឲ្យកូនហូប ហើយខ្លួនឯងក៏ហូប ជាមួយកូនដើម្បីសម្លាប់ខ្លួន។
ពេលនោះក៏លេចឮព័ត៌មាននេះដល់ប្តី ពេលនោះប្តីក៏បានមកដឹកប្រពនន្ធ និងកូនយកទៅជួយសង្គ្រោះនៅឯមន្ទីរពេទ្យខេត្តតាកែវ ប៉ុន្តែជាអកុសល កូនប្រុសពីរនាក់ដោយសារតែ ជាតិថ្នាំជ្រាបពេញខ្លួនក៏បានស្លាប់នៅពាក់កណ្តាលផ្លូវ ចំណែកម្តាយក៏ធ្ងន់ ធ្ងរដែរកំពុងសង្គ្រោះ នៅមន្ទីរពេទ្យខេត្តតាកែវ។ ប្តីស្ត្រីរងគ្រោះមានឈ្មោះ ហ៊ិន ម៉ាត អាយុជាង៣០ឆ្នាំ មានទីលំនៅភូមិឃុំ ជាមួយគ្នានឹងស្ត្រីរងគ្រោះ។ សូមបញ្ជាក់ថា ចំពោះហេតុការណ៍នៃការឈ្លោះប្រកែក គ្នារហូតឈានដល់ ប្រពនន្ធនាំកូនចុះចេញពីផ្ទះ ហើយលេបថ្នាំបំពុលទាំងម្តាយទាំងកូនដើម្បីបញ្ចប់រឿងយ៉ាងនេះ សមត្ថកិច្ចមិនទាន់សាកសួរដល់បុរសជាប្តីនៅឡើយទេ ពីព្រោះកូន២នាក់ក៏ស្លាប់ ម្តាយក៏នៅធ្ងន់ធ្ងរកំពុង សង្គ្រោះ ដូច្នេះសមត្ថកិច្ចមិនទាន់អាចធ្វើការសាកសួរបានឡើយ៕
ចែករំលែកព័តមាននេះ