រាជធានីភ្នំពេញ ៖ ព្រឹត្តិការណ៍ប្រកួតប្រដាល់អន្តរជាតិដែលមានឈ្មោះថា កំពូលអ្នកប្រយុទ្ធកណ្ដាប់ដៃដែក ISI Palm នៅលើសង្វៀនស៊ីអិនស៊ីនឹងត្រូវចាប់ផ្ដើមនៅថ្ងៃអាទិត្យទី៤ កុម្ភៈ សប្ដាហ៍នេះ ដោយមានកីឡាករជើងខ្លាំងកម្ពុជា៤នាក់ ថៃ២នាក់ និងឡាវ២នាក់ប្រកួតគ្នា។
លោក ស៊ីថូ ណាថាន់ អ្នកគ្រប់គ្រងកម្មវិធីប្រកួតប្រចាំស្ថានីយទូរទស្សន៍ស៊ីអិនស៊ីបានឱ្យដឹងនៅក្នុងសន្និសីទសារព័ត៌មានកាលពីរសៀលថ្ងៃទី២៨ មករា ថា ការប្រកួតនេះធ្វើឡើងក្នុងប្រភេទទម្ងន់៦៧គីឡូក្រាម ដែលមានកីឡាករកម្ពុជា៤រូប ដូចជាឡៅ ចន្ទ្រា
មកពីក្លិបកងទ័ពឆត្រយោង៩១១, ឆៃ សារ៉ា មកពីសមាគមកីឡាប្រដាល់ក្រសួងការពារ
ជាតិ, ពុទ្ធ ឆាយរិទ្ធី មកពីក្លិបពុទ្ធសិរីវង្សពោធិសែនជ័យ និងមាស សុជាតិ មកពីក្លិបឃ្លាំងមឿងកីឡា ។ ចំណែកកីឡាករថៃ២រូបមាននឹងត្រាកានក.កាមន្តវ៉ាត់ និងកីឡាករ រុងណាក់ផា ស.សំរ៉ូង យីម និងកីឡាករឡាវ២រូបទៀតមានកីឡាករ ឆានឆៃ ស៊ីត.ស.ថ ណាក់រ៉ុង និងកីឡាករ ផាន់ឆៃ រុងរៀនក្រៈធាមវិត្យា ។
ការប្រកួតនេះធ្វើឡើងតាមរូបមន្តជម្រុះក្នុងពូលដោយពូលកម្ពុជាមានកីឡាករ៤រូបត្រូវជួបប្រកួតជាមួយកីឡាករថៃ និងឡាវរួមគ្នា។
លោក ហូរ រតនៈ អគ្គនាយកស្ថានីយទូរទស្សន៍ស៊ីអិនស៊ី បានឱ្យដឹងថា កម្មវិធីប្រកួតពានអន្តរជាតិកំពូលអ្នកប្រយុទ្ធកណ្ដាប់ដៃដែក នាពេលនេះកើតឡើងដោយការសហការគ្នារវាងស្ថានីយទូរទស្សន៍ស៊ីអិនស៊ី និងក្រុមហ៊ុន ISI Steel ក្រោមការជួយជ្រោមជ្រែងពីសហព័ន្ធកីឡាប្រដាល់គុនខ្មែរ ។ លោកឱ្យដឹងទៀតថា គោលបំណងសំខាន់ដែលស្ថានីយទូរទស្សន៍ស៊ីអិនស៊ីរៀបចំឱ្យមានព្រឹត្តិការណ៍នៃការប្រកួតដណ្ដើមខ្សែក្រវាត់កំពូលអ្នកប្រយុទ្ធកណ្ដាប់ដៃដែកនេះឡើងគឺដើម្បីចូលរួមចំណែកលើកស្ទួយក៏ដូចជាការអភិវឌ្ឍវិស័យកីឡាប្រដាល់គុនខ្មែរឱ្យកាន់តែរីកចម្រើននិងពង្រីកមុខមាត់ថែមទៀតនៅលើឆាកអន្តរជាតិ ។ ជាងនេះទៅទៀតក៏ជាការរួមចំណែកលើកស្ទួយជីវភាពកីឡាករប្រដាល់គុនខ្មែរឱ្យកាន់តែល្អថែមមួយកម្រិតទៀត។
លោក សុខ វិចិត្រ នាយកផ្នែកលក់ក្រុមហ៊ុន ISI Steelបានឱ្យដឹងផងដែរថា ក្រុមហ៊ុនរបស់លោកដែលបានសហការជាមួយស្ថានីយទូរទស្សន៍ស៊ីអិនស៊ីផលិតកម្មវិធីប្រកួតប្រដាល់ដណ្ដើមពានរង្វាន់អន្តរជាតិ កំពូលអ្នកប្រយុទ្ធកណ្ដាប់ដៃដែកនេះឡើង ដើម្បីលើកស្ទួយនិងអភិរក្សវិស័យកីឡាប្រដាល់ក្បាច់គុនបុរាណខ្មែរ ក៏ដូចជាបម្រើអារម្មណ៍ទស្សនិកជនដែលនិយមចូលចិត្តវិស័យកីឡាប្រដាល់ផងដែរ ។ ការប្រកួតនេះធ្វើឡើងរៀងរាល់ថ្ងៃអាទិត្យវេលាម៉ោង១១ថ្ងៃត្រង់។
លោក ម៉ិល កាដូ អគ្គលេខាធិការសហព័ន្ធកីឡាប្រដាល់គុនខ្មែរបានឱ្យដឹងថា កន្លងមក
សហព័ន្ធកីឡាប្រដាល់កម្ពុជា តែងរួមចំណែកនិងផ្ដល់នូវកិច្ចសហការយ៉ាងល្អជាមួយស្ថានីយទូរទស្សន៍ស៊ីអិនស៊ីក៏ដូចជាបណ្ដាក្រុមហ៊ុនមួយចំនួនដែលចាប់អារម្មណ៍ជាមួយវិស័យកីឡាប្រដាល់គុនខ្មែរនេះ ។
មិនតែប៉ុណ្ណោះ សហព័ន្ធតែងតែដាស់តឿនដល់កីឡាករ ក៏ដូចជាគ្រូបង្ហាត់ ធ្វើយ៉ាងណាត្រូវតែរក្សាឱ្យបាននូវភាពថ្លៃថ្នូរក្នុងនាមយើងជាម្ចាស់ក្បាច់គុនបុរាណខ្មែរ ។ ជាពិសេសដូចជាកម្មវិធីកំពូលអ្នកប្រយុទ្ធកណ្ដាប់ដៃដែកលើកនេះ លោកនឹងគាំទ្រឱ្យបានពេញទំហឹង ព្រោះថាបើពុំមានដៃគូសហការពីវិស័យឯកជនទេនោះ វិស័យកីឡាប្រដាល់គុនខ្មែរពិតជាមិនអាចរីកចម្រើនទៅបានឡើយ ៕
ចែករំលែកព័តមាននេះ