លោកដូណាល់ ត្រាំ ចោទប្រកាន់់EUថា ធ្វើពាណិជ្ជកម្មមិនយុត្តិធម៌
ទីក្រុងឡុងដ៍ ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានថ្លែងក្នុងបទសម្ភាសន៍មួយដែលចេញផ្សាយនៅថ្ងៃអាទិត្យកន្លងមកថា សហភាពអឺរ៉ុប(EU)…
ទីក្រុងឡុងដ៍ ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានថ្លែងក្នុងបទសម្ភាសន៍មួយដែលចេញផ្សាយនៅថ្ងៃអាទិត្យកន្លងមកថា សហភាពអឺរ៉ុប(EU) ធ្វើពាណិជ្ជកម្មជាមួយសហរដ្ឋអាមេរិកដោយមិនយុត្តិធម៌យ៉ាងខ្លាំង និងបានព្រមានថា បញ្ហាដែលលោកមានជាមួយនឹងពួកគេ អាចបង្កឲ្យកាន់តែធំបាន ។
លោកប្រធានាធិបតីថ្លែងថា ៖« សហភាពអឺរ៉ុបបានធ្វើដាក់សហរដ្ឋអាមេរិកដោយមិនយុត្តិធម៌យ៉ាងខ្លាំង បើនិយាយពីការធ្វើពាណិជ្ជកម្ម។ ខ្ញុំមានបញ្ហាជាច្រើនជាមួយនឹងសហភាពអឺរ៉ុប ហើយវាអាចក្លាយទៅជារឿងកាន់តែធំទៅទៀតក្នុងផ្នែកការធ្វើពាណិជ្ជកម្ម »។
ក្នុងការថ្លែងមួយរបស់លោកនាថ្ងៃសុក្រនៅវេទិកាសេដ្ឋកិច្ចពិភពលោកថា តាមគំនិតរបស់លោកមិនមែនមានន័យថា សហរដ្ឋអាមេរិកនៅម្នាក់ឯងទេ ហើយលោកបានឲ្យសញ្ញាថាសហរដ្ឋអាមេរិក អាចនឹងចូលរួមកិច្ចព្រមព្រៀងដៃគូពាណិជ្ជកម្មអន្តរប៉ាស៊ីហ្វិក (TPP)វិញថែមទៀតផង បន្ទាប់ពីបានដកខ្លួនចេញកាលពីឆ្នាំមុន ។
ប៉ុន្តែកាលពីដើមខែនេះ រដ្ឋាភិបាលលោកត្រាំបានដាក់ពន្ធយ៉ាងខ្ពស់លើម៉ាស៊ីនបោកខោអាវនិងផ្ទាំងស្រូបពន្លឺព្រះអាទិត្យដែលនាំចូល ហើយប្រសាសន៍របស់លោកដែលបានផ្សាយកាលពីថ្ងៃអាទិត្យ អាចនឹងធ្វើឲ្យមានការភ្ញាល់ផ្អើលនៅអឺរ៉ុបផងដែរ។
កាលពីឆ្នាំមុន ពួកគេបានសន្យាថានឹងដាក់ពន្ធប្រមាណជិត៣០០%លើយន្តហោះដែលផលិតដោយក្រុមហ៊ុន Bombardier របស់ប្រទេសកាណាដា ។ ជាមួយគ្នានេះដែរ លោកត្រាំបានបង្ហាញការមិនយល់ស្របនឹងការចរចារបស់លោកស្រីនាយករដ្ឋមន្ត្រី Theresa May របស់ប្រទេសអង់គ្លេសផងដែរ ដោយបាននិយាយថាលោកនឹងចរចាក្នុងផ្លូវផ្សេងវិញ ។
យ៉ាងណាក៏ដោយ លោកស្រីនាយករដ្ឋមន្ត្រីនឹងស្វាគមន៍ការព្យាកររបស់លោកត្រាំដែលបានគិតថា អាមេរិកអាចនឹងសម្រេចបានកិច្ចព្រមព្រៀងពាណិជ្ជកម្មជាមួយនឹងអង់គ្លេស បន្ទាប់ពីចាកចេញពីEU ៕
ចែករំលែកព័តមាននេះ