រាជធានីភ្នំពេញ ៖ កម្ពុជាជាប្រទេសកសិកម្មដ៏ល្បីមួយនៅក្នុងតំបន់អាស៊ី ថែមទាំងបាននាំចេញនូវផលិតផលកសិកម្មរបស់ខ្លួនទៅកាន់បណ្ដាប្រទេសធំៗទាំងក្នុងនិងក្រៅតំបន់ ប៉ុន្តែការនាំចេញទាំងនោះហាក់នៅមានកម្រិតតិចតួចនៅឡើយ ខណៈដែលការនាំចូលមានចំនួនច្រើនលើសលប់ ។ កត្តាទាំងនេះហើយ បានធ្វើឲ្យកសិករជាអ្នកផលិតមួយចំនួនបានបោះបង់ ហើយងាកទៅគាំទ្រផលិតផលបរទេសវិញ…
រាជធានីភ្នំពេញ ៖ កម្ពុជាជាប្រទេសកសិកម្មដ៏ល្បីមួយនៅក្នុងតំបន់អាស៊ី ថែមទាំងបាននាំចេញនូវផលិតផលកសិកម្មរបស់ខ្លួនទៅកាន់បណ្ដាប្រទេសធំៗទាំងក្នុងនិងក្រៅតំបន់ ប៉ុន្តែការនាំចេញទាំងនោះហាក់នៅមានកម្រិតតិចតួចនៅឡើយ ខណៈដែលការនាំចូលមានចំនួនច្រើនលើសលប់ ។ កត្តាទាំងនេះហើយ បានធ្វើឲ្យកសិករជាអ្នកផលិតមួយចំនួនបានបោះបង់ ហើយងាកទៅគាំទ្រផលិតផលបរទេសវិញ ដែលធ្វើឲ្យផលិតផលក្នុងស្រុកមិនអាចផ្គត់ផ្គង់គ្រប់គ្រាន់ ទីផ្សារមិនប្រាកដប្រជា និងតម្លៃមិនស្ថិតស្ថេរ ពោលគឺស្ថិតនៅលើប្រទេសជិតខាងជាអ្នកកំណត់ ។
ជាការកត់សម្គាល់ ផលិតផលកសិកម្មក្នុងស្រុក ជាពិសេសនៅតាមព្រំដែននៃប្រទេសកម្ពុជា ប្រែប្រួលទៅតាមស្ថានភាពប្រទេសជិតខាង។ ជាក់ស្ដែង ផលិតផលដំឡូងមី ពោត សណ្ដែក និងស្រូវ ហាក់ដូចជាឈ្មួញនៅប្រទេសជិតខាងទាំងនោះជាកំណត់តម្លៃ ពោលគឺនៅមានតម្រូវការ គេឲ្យតម្លៃខ្ពស់បន្តិច ប៉ុន្តែនៅពេលទីផ្សារគ្រប់គ្រាន់ហើយនោះ ក៏ទម្លាក់តម្លៃវិញតែម្ដង ឬហៅថាគ្មានទីផ្សារ ។ ទាំងនេះហើយដែលធ្វើឲ្យកសិករគ្មានទឹកចិត្តក្នុងការផលិត ហើយងាកមកនាំចូលពីប្រទេសជិតខាងដើម្បីបំពេញតម្រូវការក្នុងស្រុក ។
បើតាមតំណាងសហគមន៍គ្រឹងលាវ ក្នុងខេត្តកំពង់ឆ្នាំង លោក គង់ វុទ្ធី បានឲ្យដឹងថា ផលិតផលកសិកម្មរបស់ប្រជាកសិករក្នុងសហគមន៍ គឺសម្បូរទៅតាមរដូវកាល ហើយនៅពេលផលិតសម្បូរ បែរជាតម្លៃមិនសូវបានខ្ពស់ ប៉ុន្តែនៅពេលរដូវខ្សត់ បែរជាតម្លៃឡើងខ្ពស់ ។ លោកចង់ឲ្យមន្ត្រីពាក់ព័ន្ធ និងថ្នាក់ដឹកនាំជួយរក្សាទីផ្សារច្បាស់លាស់សម្រាប់ផលិតផលកសិកម្មក្នុងស្រុក ។
លោក ហ៊ាង លេវ ប្រធានសមាគមដំឡូងមីក្នុងខេត្តប៉ៃលិន ក៏បានឲ្យដឹងដែរថា ឈ្មួញពីប្រទេសជិតខាងតែងតែមកក្រឡុកតម្លៃដំឡូងមីក្នុងស្រុក ដោយពេលខ្លះគេក៏ឲ្យតម្លៃខ្ពស់ ហើយពេលខ្លះក៏ឲ្យតម្លៃទាប មិនស្ថិតស្ថេរឡើយ ។ លោកថា ៖« តាមរយៈទីផ្សារមិនច្បាស់លាស់ កសិករហាក់មានទំនោរទៅតាមតម្លៃកសិផល។ ជាក់ស្ដែង ពេលតម្លៃសណ្ដែកឡើងថ្លៃក៏នាំគ្នាដាំសណ្ដែក តែនៅពេលបានផលសណ្ដែកចុះថ្លៃវិញ ហើយតម្លៃផលិតផលផ្សេងឡើងវិញដូចជា ដំឡូង ឬពោត អីចឹងហើយកសិករនៅតែមិនអាចរកប្រាក់ចំណូលបានខ្ពស់ដដែល »។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ធ្លាប់បានលើកឡើងថា ក្នុងនាមជាក្រសួងស្ថាប័នដែលស្វែងរកទីផ្សារជូនផលិតផលក្នុងស្រុក តែងតែខិតខំផ្សព្វផ្សាយពីផលិតផលក្នុងស្រុកទៅកាន់បរទេសឲ្យគេបានស្គាល់ និងទទួលយកផលិតផលទាំងនោះទៅកាន់ប្រទេសគេ ។ ជាក់ស្ដែង ក្រសួងតែងតែរៀបចំជាព្រឹត្តិការណ៍បង្ហាញផលិតផលទាំងថ្នាក់ជាតិ និងអន្តរជាតិ ដើម្បីផ្ដល់ឱកាសដល់អ្នកផលិតនាំយកផលិតផលរបស់ខ្លួនមកដាក់បង្ហាញឲ្យមើល ។
លោកបន្តថា ម្យ៉ាងទៀត រាជរដ្ឋាភិបាលក៏បានខិតខំប្រឹងប្រែងស្វែងរក និងអំពាវនាវឲ្យមានការវិនិយោគលើការកែច្នៃផលិតផលក្នុងស្រុកមុននឹងនាំចេញទៅកាន់ទីផ្សារអន្តរជាតិ ហើយជាលទ្ធផល ក៏មានវិនិយោគិនក្នុងស្រុក និងក្រៅស្រុកមួយចំនួនបានមកបណ្ដាក់ទុនវិនិយោគលើរោងចក្រកែច្នៃផលិតផលក្នុងស្រុក ។ ទោះជាយ៉ាងណា ក៏មិនទាន់ឆ្លើយតបនៅឡើយទេ ដូចនេះ យើងត្រូវតែបន្តអំពាវនាវឲ្យមានការវិនិយោគបន្ថែមទៀត ៕
ចែករំលែកព័តមាននេះ