រាជធានីភ្នំពេញ ៖ គម្រោងសាងសង់អាកាសយានដ្ឋានអន្តរជាតិថ្មីមួយ ដែលមានតម្លៃទឹកប្រាក់ប្រមាណជាង១ពាន់លានដុល្លារ លើផ្ទៃដី៧០០ហិកតា ដែលតាមគម្រោងថានឹងសាងសង់នៅតំបន់វាលបឹងកំផ្លោកដ៏ធំមួយ(ហៅបឹងរៀន)ស្ថិតក្នុងស្រុកកណ្តាលស្ទឹង ខេត្តកណ្តាល ត្រូវបានអ្នកជំនាញសេដ្ឋកិច្ចមើលឃើញថា ទីតាំងគម្រោងនេះហាក់នៅកៀកនឹងទីក្រុងពេក ខណៈកំណើនប្រជាជននៅទីក្រុងភ្នំពេញឡើងឥតឈប់ឈរពីមួយថ្ងៃទៅមួយថ្ងៃ ដែលអ្នកជំនាញទាំងនោះយល់ថា គួរតែសិក្សាឱ្យបានច្បាស់លាស់ មុននឹងសាងសង់ ហើយប្រសិនបើរកទីតាំងដែលឆ្ងាយជាងនេះ កាន់តែល្អ ។
បើតាមការបញ្ជាក់ពីអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា ដែលបានឱ្យដឹងកាលពីពេលថ្មីៗនេះ ទីតាំងព្រលានយន្តហោះថ្មីជាផ្ទៃបឹង ហើយនឹងត្រូវបូមខ្សាច់បំពេញនាពេលខាងមុខនេះ ដើម្បីចាប់ផ្តើមសាងសង់ព្រលានយន្តហោះ និងមជ្ឈមណ្ឌលពាណិជ្ជកម្មជុំវិញ ។ គម្រោងសាងសង់នេះ ស្ថិតនៅតាមបណ្តោយផ្លូវជាតិលេខ២១ នៅតំបន់វាលបឹងកំផ្លោកដ៏ធំមួយ(ហៅបឹងរៀន)ដែលស្ថិតក្នុងរង្វង់ផ្លូវក្រវាត់ក្រុងទី៣នាពេលអនាគត ពោល បើសិនជាគិតពីកន្ទុយផ្លូវ៦០ម៉ែត្រ គឺទីតាំងព្រលានយន្តហោះថ្មីនេះ មានចម្ងាយប្រមាណ៩គីឡូម៉ែត្រប៉ុណ្ណោះ ។
អ្នកជំនាញផ្នែកសេដ្ឋកិច្ច និងជាទីប្រឹក្សាជាន់ខ្ពស់ផ្នែកវិនិយោគនៃក្រុមហ៊ុន Emerging Markets Consulting លោក ង៉ែត ជូ បានប្រាប់កោះសន្តិភាពថា ប្រសិនបើសម្រេចសាងសង់ ព្រលានយន្តហោះថ្មីនៅតំបន់នោះមែន វាហាក់នៅកៀកទីក្រុងពេក ដោយសារទីក្រុងភ្នំពេញបច្ចុប្បន្នកំពុងតែមានការអភិវឌ្ឍលឿន ជាពិសេសកំណើនប្រជាពលរដ្ឋដែលកើនឡើងជាលំដាប់ ដែលរហូតដល់ឆ្នាំ២០៣៥ អាចនឹងកើនរហូតទៅជាង៣លាននាក់ ។
លោកលើកឡើងដូច្នេះថា ៖« វាប៉ះពាល់ ជាឧបសគ្គក្នុងការពង្រីកទីក្រុង ព្រោះយើងអត់បានសិក្សាច្បាស់លាស់ បើដឹងថាកំណើនប្រជាជនយើងនឹងកើន យើងត្រូវការទីតាំងច្រើនដើម្បីពង្រីកក្រុង ពេលយើងដាក់ព្រលានយន្តហោះនៅជិតក្រុងពេក វាទៅជាឧបសគ្គ »។
លោកបន្ថែមថា មុននឹងសាងសង់អ្វីមួយ គួរតែមានការសិក្សាឱ្យបានច្បាស់ ៖« កន្លងមកយើងអត់ទាន់ដឹងថាមានការសិក្សាច្បាស់លាស់ហើយឬនៅទេ ប្រសិនបើមានការសិក្សាហើយ ខ្ញុំគិតថាលទ្ធផលនៃការសិក្សាគួរតែចែករំលែក មុននឹងការចែករំលែកព័ត៌មាននៃការសម្រេចចិត្តសាងសង់ »។
ព្រលានយន្តហោះអន្តរជាតិថ្មីនេះ គឺជាការវិនិយោគដោយក្រុមហ៊ុន «ខេមបូឌា អ៊ែរផត អ៊ិនវេសមិន ខូ អិលធីឌី ( Cambodia Airport Investment Co,ltd » ដែលជាក្រុមហ៊ុនភាពជាដៃគូវិនិយោគរវាងវិស័យសាធារណៈនិងឯកជន (PPP) ដោយគ្រោងនឹងសាងសង់លើផ្ទៃដីទំហំប្រមាណ២.៦០០ហិកតា ។ គម្រោងសាងសងព្រលានយន្តហោះខ្នាតយក្សមួយនេះ មានទុនវិនិយោគសរុប១.៥០០លានដុល្លារអាមេរិក ។ ក្នុងចំណោមទឹកប្រាក់វិនិយោគនោះ មួយភាគធំគឺជាកម្ចីពីធនាគារចិន ដែលមានចំនួនទឹកប្រាក់១.១០០ដុល្លារ និងមួយផ្នែកទៀតគឺជារបស់ក្រុមហ៊ុនអូស៊ីអាយស៊ី(OCIC)របស់លោកឧកញ៉ា ពុង ឃាវសែ ។
លោកបណ្ឌិត គី សិរីវឌ្ឍន៍ បណ្ឌិតសេដ្ឋកិច្ច និងជាអ្នកស្រាវជ្រាវនៅរាជបណ្ឌិត្យសភា មានប្រសាសន៍ដែរថា វាជារឿងល្អដែលកម្ពុជាសាងសង់ព្រលានយន្តហោះថ្មី ដោយសារកម្ពុជា ត្រូវការព្រលានយន្តហោះដែលមានលទ្ធភាពឱ្យយន្ដហោះធំៗអាចចុះចតបាន ព្រោះកន្លងមក កម្ពុជាបានខាតជើងយន្ដហោះច្រើន ព្រោះតែគ្មានកន្លែងឲ្យយន្ដហោះប្រភេទធំៗចុះចតបាន ។
ចំពោះទីតាំងគ្រោងនឹងសាងសង់នេះ លោកលើកឡើងថា វាហាក់នៅជិតក្រុងពេក បើបានទីតាំងឆ្ងាយជាងនេះ រឹតតែល្អ ដើម្បីកុំឱ្យប៉ះពាល់ដល់ការពង្រីកក្រុងនាពេលអនាគត ។ បែបនេះក្តី លោកបញ្ជាក់ថា ទីតាំងនេះក៏អាចទទួលយកបានដែរ ព្រោះនៅតំបន់វាលដែលវាសមស្រប ក្នុងការសាងសង់ និងសមស្របកម្រិតសេដ្ឋកិច្ចកម្ពុជានាពេលបច្ចុប្បន្ន ។
បណ្ឌិតសេដ្ឋកិច្ចរូបនេះបានបន្តថា ៖ « សម្រាប់ពេលអនាគត វានឹងអាចមានផលប៉ះពាល់ទៅលើការពង្រីកទីក្រុង ព្រោះទីក្រុងនឹងធំជាងហ្នឹង ដូច្នេះហើយ ក្នុងរង្វង់៩គីឡូ (ពីកន្ទុយផ្លូវ៦០ម៉ែត្រ) ហាក់ដូចជាជិត ។ ដូចខ្ញុំនិយាយថា ក្នុងចំណាក់កាលនេះក្នុងចម្ងាយប៉ុណ្ណេះ មិនទាន់អីទេ ប៉ុន្តែនៅពេលអនាគត ប្រហែលជា២០ឬ៣០ឆ្នាំទៀត ការពង្រីកទីក្រុងនឹងអាចឈានធំជាងហ្នឹង ។ បើយើងមើលពីប្រវត្តិនៃការកសាងព្រលានយន្តហោះកន្លងមក ដូចពោធិ៍ចិនតុងហ្នឹង កាលពីមុននៅជាយក្រុង តែឥឡូវវាក្លាយជាកណ្តាលក្រុង ព្រលានយន្តហោះមួយនៅបាត់ដំបងដែលហៅវាលបែកចាន កាលពីមុនក៏វានៅជាយក្រុងដែរ តែឥឡូវវានៅកណ្តាលក្រុងដែរ»។
លោកបន្ថែម បើពង្រីកក្រុងនាពេលអនាគត គួរកុំពង្រីកទៅទិសខាងនោះទៀត អាចបង្វែរមកទិសផ្សេងវិញ ដើម្បីកុំប៉ះពាល់ដល់ព្រលានយន្តហោះនេះ ។
បណ្ឌិតសេដ្ឋកិច្ចរូបនេះបានពន្យល់បន្ថែមថា៖ « ការពង្រីកទីក្រុងនឹងមិនទៅទិសហ្នឹងទៀតទេ គួរងាកមកទិសខាងលិច ឬទិសខាងជើងវិញដែលអត់មានផលប៉ះពាល់ទៅលើទីក្រុង ព្រោះយន្តហោះភាគច្រើនត្រូវហោះលើតំបន់វាលទំនាប បើប្រសិនព្រលានយន្តហោះធ្វើនៅទីតាំងផ្សេង ក៏វាអត់សមស្រប ព្រោះកន្លែងផ្សេងមានតំបន់ភ្នំច្រើនណាស់ ឧទាហរណ៍ដូចជានៅខាងកំពង់ស្ពឺ គឺមានភ្នំច្រើនណាស់ វាគឺជាចំណុចពិបាក។ ទី២ ហេដ្ឋារចនាសម្ព័ន្ធក៏មានការលំបាក ព្រោះនៅពេលធ្វើព្រលានយន្តហោះឆ្ងាយ យើងត្រូវធ្វើផ្លូវសម្រាប់ធ្វើដំណើរពីព្រលានយន្តហោះ និងទី៣ ត្រូវធ្វើឱ្យមានតំបន់អភិវឌ្ឍន៍ដើម្បីរុញឱ្យព្រលានយន្តនេះមានដំណើការសេដ្ឋកិច្ច »។
យ៉ាងណាមិញ បើតាមលោក ស៊ិន ចាន់សិរីវុត្ថា បានថ្លែងឲ្យដឹងថា ការសាងសង់ព្រលានយន្តហោះអន្តរជាតិភ្នំពេញថ្មីនេះ អាចនឹងចាប់ផ្តើមនៅដើមឆ្នាំ២០១៩ខាងមុខ ដោយសារគម្រោងនេះបានអនុម័ត និងមានប្លង់ស្ថាបត្យកម្មរួចហើយ ហេតុនេះរង់ចាំតែពេលវេលាចរចារវាងរាជរដ្ឋាភិបាល និងក្រុមហ៊ុនវិនិយោគសាងសង់ព្រលាននេះប៉ុណ្ណោះ ។
ខណៈដែលទីតាំងនេះ មិនទាន់សម្រេចជាផ្លូវការ លោក ង៉ែត ជូ យល់ថា គម្រោងសាងសង់ព្រលានយន្តហោះខា្នតធំ ដែលនឹងទាក់ទាញភ្ញៀវទេសចរឱ្យកាន់ច្រើនមកកម្ពុជាមួយនេះ គួរធ្វើនៅទីតាំងឆ្ងាយជាងនេះ ដូចជានៅខេត្តកំពង់ឆ្នាំងជាដើម ។
លោក ង៉ែត ជូ ថ្លែងថា ៖« ខ្ញុំមិនមែនជាអ្នកបច្ចេកទេសទេ ប៉ុន្តែបើយើងមើលពីចំណុចមួយដែលទាក់ទងជាមួយនឹងសក្តានុពលការអភិវឌ្ឍក្រុង ហើយតម្រូវការទៅតាំងលំនៅឋានជុំវិញទីក្រុងភ្នំពេញហ្នឹង ជាពិសេសវានៅតំបន់ដែលគេគ្រោងទុកថាប្រហែល៩គីឡូពីផ្លូវ៦០ម៉ែត្រអីហ្នឹង ខ្ញុំគិតថាកៀកពេកហើយ ដូចនៅកំពង់ឆ្នាំងអីក៏ល្អដែរ »។
បើតាមលោក ស៊ិន ចាន់សិរីវុត្ថា ព្រលានយន្តហោះនេះមានទំហំជាង៧០០ហិកតា ប្រហាក់ប្រហែលនឹងព្រលានយន្តហោះអន្តរជាតិខេត្តសៀមរាបថ្មីដែរ ។ ចំណែកផ្ទៃដីដែលនៅសល់ គឺជាទីតាំងសម្រាប់សាងសង់មជ្ឈមណ្ឌលពាណិជ្ជកម្ម និងលំនៅឋាននានា ព្រោះការវិនិយោគព្រលានយន្តហោះ មិនអាចរកផលចំណេញបានទេ គឺមានតែការរៀបចំសេវាកម្ម និងមជ្ឈមណ្ឌលពាណិជ្ជកម្មគាំទ្រ ទើបអ្នកវិនិយោគអាចរកផលចំណេញបាន ។
បើតាមប្លង់គោលទីក្រុងភ្នំពេញ ត្រូវបានពង្រីកវិសាលភាពរហូតដល់ឆ្នាំ២០៣៥ ដែលជាប្លង់តម្រង់ទិសមួយត្រូវបានអនុម័តកាលពីចុងឆ្នាំ២០១៥ បានធ្វើឲ្យក្រឡាផ្ទៃទីក្រុងកើនរហូតដល់ទំហំ៦៧៨គីឡូម៉ែត្រការ៉េ ហើយអាជ្ញាធររាជធានីបានធ្វើការពង្រីកភូមិ និងសង្កាត់មួយចំនួន ដោយផ្អែកលើកត្តាសំខាន់ចំនួន៣គឺកត្តាប្រជាសាស្ត្រ, កត្តាភូមិសាស្ត្រ និងកត្តាសេដ្ឋកិច្ចសង្គម ៕
ចែករំលែកព័តមាននេះ