រាជធានីភ្នំពេញ ៖ នគរបាលផ្នែកព្រហ្មទណ្ឌខណ្ឌដូនពេញបានចាប់ឃាត់ខ្លួនបុរសម្នាក់នៅកែងផ្លូវលេខ២៤០ និងផ្លូវលេខ៦៣ ស្ថិតក្នុងសង្កាត់ចតុមុខ ខណ្ឌដូនពេញ កាលពីវេលាមោ៉ង១រសៀលថ្ងៃទី៨ ធ្នូ ខណៈពេលជននោះកំពុងអង្គុយលើមូ៉តូមា៉កនិច ពណ៌បៃតងរង់ចាំម៉ូយមកយកថ្នាំញៀន ។
មន្ត្រីនគរបាលឲ្យដឹងថា ជនសង្ស័យជួញដូរថ្នាំញៀនដែលត្រូវនគរបាលឃាត់ខ្លួននេះ ឈ្មោះអុិន យុទ្ធថា អាយុ២៦ឆ្នាំ ស្នាក់នៅផ្ទះលេខ៣០៤ ផ្លូវលេខ២៤០ សង្កាត់ចតុមុខ ខណ្ឌដូនពេញ ។ មុនពេលឃាត់ខ្លួន ជនរូបនេះបានអង្គុយលើមូ៉តូនៅកែងផ្លូវលេខ២៤០ និងផ្លូវលេខ៦៣ ស្ថិតក្នុងសង្កាត់ចតុមុខរង់ចាំម៉ូយមកយកថ្នាំញៀន ហើយនៅវេលាមោ៉ង១រសៀលថ្ងៃទី៨ ធ្នូ ឆ្នាំ២០១២ កម្លាំងនគរបាលផ្នែកព្រហ្មទណ្ឌខណ្ឌដូនពេញក៏ចាប់ឃាត់ខ្លួន និងរកឃើញថ្នាំញៀនប្រភេទមា៉ទឹកកកចំនួន៦កញ្ចប់តូច ដែលជននេះ លាក់ទុកក្នុងប្រអប់ពណ៌ខៀវលាយពណ៌ទឹកក្រូចសរសេរអក្សរ ECLIPSE នៅក្នុងកាបូបស្ពាយពណ៌ទឹកដោះគោ ។
មន្រ្តីនគរបាលដដែលបានបញ្ជាក់ថា កន្លងមកការចាប់ឃាត់ខ្លួនបានជនសង្ស័យជួញដូរថ្នាំញៀនជាបន្តបន្ទាប់នេះគឺដោយសារតែមានការសហការពីប្រជាពលរដ្ឋផងដែរ ។ជនសង្ស័យត្រូវបានឃាត់ខ្លួនជាបណ្តោះអាសន្ននៅអធិការដ្ឋាននគរបាលខណ្ឌដូនពេញដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ៕
ចែករំលែកព័តមាននេះ