ខេត្តពោធិ៍សាត់ ៖ កន្លងមកនេះលោក ស៊ុយ សែម រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងារថ្នាក់កណ្ដាលចុះជួយខេត្តពោធិ៍សាត់តែងបានក្រើនរំលឹកនៅតាមកម្មវិធីជួបសំណេះសំណាលផ្សេងៗ ។
សូមឲ្យកូនចៅប្រជាពលរដ្ឋដែលគ្មានការងារធ្វើ និងជីវភាពក្រលំបាកខ្លាំងនាំគ្នារៀនជំនាញផ្សេងៗដូចជា ជាងជុសជុលម៉ូតូ ជាងអ៊ុតសក់ ធ្វើសក់ ជាងកាត់សក់ ជាងកាត់ដេរ ជាងប៉ះកង់ ឫដាំបន្លែបង្កាជាដើម ។ល។ ដើម្បីបង្កើតមុខរបររកប្រាក់ចំណូលចិញ្ចឹមជីវិត ចៀសវាងយកពេលទំនេរ លេងល្បែងស៊ីសង ទទួលទានគ្រឿងស្រវឹង ឫអង្គុយនិយាយដើមគ្នាជារឿងឥតប្រយោជន៍ ។
ជាក់ស្ដែងកាលពីថ្ងៃទី២៨ ខែមករា ឆ្នាំ២០១៨ លោក ស៊ុយ សែម រួមដំណើរដោយលោក ខូយ សុខា ប្រធានក្រុមប្រឹក្សាខេត្តបានចុះទៅប្រគល់ឧបករណ៍កាត់សក់ដល់ប្រជាពលរដ្ឋពីរគ្រួសារនៅភូមិកោះស្វាយ ឃុំខ្នារទទឹង និងភូមិអូររំចេក ឃុំត្រពាំងជង ស្រុកបាកាន ។
ក្នុងថ្ងៃដដែលនោះលោក ស៊ុយ សែម ក៏បានបន្តដំណើរទៅសួរសុខទុក្ខលោក ស្ងួន ជី មេភូមិដើមរកាឃុំខ្នារទទឹង ដែលលោកបានជូនម៉ូតូម៉ាកហុងដាមួយគ្រឿងកាលពីប៉ុន្មានខែមុននេះសម្រាប់ជាមធ្យោបាយជិះបំរើការងារជូនប្រជាពលរដ្ឋដោយមើលឃើញពីការខ្វះខាតជាក់ស្ដែងលោកបានជូនថវិកាលោកមេភូមិចំនួនមួយលានរៀល និងទូរទស្សន៍មួយគ្រឿងសម្រាប់បើកមើលព័ត៌មានផ្សេងៗ ពិសេសរាល់សកម្មភាពរបស់រាជរដ្ឋាភិបាលដែលដឹកនាំដោយសម្ដេចតេជោ ហ៊ុន សែន ។
ដោយឡែកអ្នកដែលបានទៅចូលរួមក្នុងនោះមានចាស់ជរា០៣នាក់លោកបានឧបត្ថម្ភថវិកាម្នាក់៤០ម៉ឺនរៀលប្រជាពលរដ្ឋជាង២០នាក់ម្នាក់២ម៉ឺនរៀល ព្រមទាំងបានឧបត្ថម្ភស៊ីម៉ង់ត៍ចំនួន១០តោនចូលរួមកសាងកុដិវត្តរស្មីឈូកសផងដែរ ៕
ចែករំលែកព័តមាននេះ