ខេត្តកំពត ៖ ពិតជាគួរឲ្យសង្វែកណាស់សំរាប់កុមារា និងកុមារីពីរនាក់បងប្អូនដែលម្តាយបានធ្វើអត្តឃាតចង.កសម្លាប់ខ្លួនស្លាប់យ៉ាងអាណោចអាធ័មចោលកូនតូចៗពីរនាក់បងប្អូន និងប្តីដោយមិនដឹងមូលហេតុ ។
តាមសមត្ថកិច្ចជំនាញដែលចុះទៅពិនិត្យសាកសពបានឲ្យដឹងថា ស្ត្រីជាជនរងគ្រោះមានឈ្មោះ នួន មាគ៌ា អាយុ៣៦ឆ្នាំ ជាកម្មការិនីរោងចក្រដេរបាល់ក្នុងក្រុងកំពត មានទីលំនៅភូមិស្រែ សង្កាត់ត្រើយកោះ ក្រុងកំពត ប្តីឈ្មោះ សុខ ទូច អាយុ៣០ឆ្នាំ ជាកម្មករបញ្ចូលអំបិលអ៊ីយ៉ូតមានកូនក្នុងបន្ទុក២នាក់ ។
បើតាមការរៀបរាប់របស់បុរសឈ្មោះ សុខ ទូច ជាប្តីស្ត្រីរងគ្រោះបានឲ្យដឹងថា មុនពេលកើតហេតុប្រពន្ធរបស់ខ្លួន និងកូន២នាក់បានទៅមើលទូរទស្សន៍នៅផ្ទះម្តាយបង្កើតខាងប្រពន្ធនៅខាងត្បូងផ្ទះខ្លួនដែលមានចម្ងាយប្រហែល១០០ម៉ែត្រ ចំណែកខ្លួនទៅអង្គុយនិយាយគ្នាលេងនៅផ្ទះបងជីដូនមួយខាងកើតផ្ទះចម្ងាយ៥០ម៉ែត្រ ។ លុះដល់ម៉ោង៩ទើបប្រពន្ធមកផ្ទះវិញតែ ម្នាក់ឯងចំណែកកូននៅដេកផ្ទះយាយ ។ ពេលខ្លួនដឹងថា ប្រពន្ធមកផ្ទះហើយខ្លួនក៏ឈប់និយាយលេងផ្ទះហើយដើរមកផ្ទះវិញដែរពេលមកដល់ផ្ទះខ្លួនបានរៀបបាយរួចក៏ហៅប្រពន្ធហូបបាយជាមួយគ្នា ។ ពេលហូបបាយរួចក៏នាំគ្នាដេករៀងៗខ្លួនដោយគ្រែម្នាក់មួយ ។
លុះដល់ម៉ោងប្រហែលជា១២យប់ខ្លួនបានឡើងបត់ជើងតូចមើលទៅគ្រែប្រពន្ធឃើញប្រពន្ធនៅដេកធម្មតាខ្លួនក៏ដេកលក់ទល់ភ្លឺមិនដឹងថា ប្រពន្ធទៅលួចចង.កតាំងពីម៉ោងណានោះទេ លុះម៉ោង៦ព្រឹក ថ្ងៃទី២៩ ខែមករា ឆ្នាំ២០១៨ ខ្លួនបានក្រោកពីដំណេកអត់ឃើញប្រពន្ធនៅលើគ្រែដែលប្រពន្ធដេកខ្លួននឹកស្មានថា ប្រពន្ធចេញមកក្រៅផ្ទះមិនដឹងប្រពន្ធចង.ក និងខ្សែនីឡុងថៃនៅនឹងធ្នឹមផ្ទះស្លាប់បាត់ទៅហើយនោះទេ ដោយសារកន្លែងដែលប្រពន្ធចង.កនេះមានបាំងវាំងននផង ។
លុះកូនប្រុសមកដល់ផ្ទះឃើញម្តាយវាចង.កស្លាប់បាត់ទៅហើយកូនក៏ស្រែកយំទើបខ្លួនរត់ចូលមកក្នុងផ្ទះឃើញប្រពន្ធចង.កនឹងធ្នឹមផ្ទះស្លាប់បាត់ទៅហើយរួចខ្លួនក៏ស្រែកហៅបងប្អូននិងអ្នកជិតខាងឲ្យមកជួយសង្គ្រោះខ្លួនឡើងកាត់ចំណងខ្សែដាក់ចុះ ប៉ុន្តែប្រពន្ធបានស្លាប់បាត់ទៅហើយ ក្រោយមកក៏ទូរស័ព្ទរាយការទៅនគរបាលប៉ុស្តិ៍ឲ្យមកពិនិត្យ ។
សមត្ថកិច្ចប៉ុស្តិ៍ក៏មកពិនិត្យកន្លែងកើតហេតុឃើញនៅកន្លែងលើគ្រែស្ត្រីរងគ្រោះដេកមានប្រឡាក់ឈាមនៅលើគ្រែ និងមានកាំបិតមុខពីរចិត្តបន្លែនៅកន្លែងដេកផងដែរនៅកដៃខាងឆ្វេងមានស្នាមរបួសពីរកន្លែង និងនៅកមានស្នាមខ្សែនីឡុងថៃរឹតក និងខ្សែនីឡុងដែលប្តីកាត់ពីធ្នឹមផ្ទះ ។
ក្រោយពីការពិនិត្យធ្វើកោសល្យវិច្ច័យរបស់សមត្ថកិច្ចជំនាញស្នងការដ្ឋាននគរបាលខេត្តមិនទាន់សន្និដ្ឋានពីមូលហេតុធ្វើអត្តឃាតរបស់ស្ត្រីរងគ្រោះខាងលើនេះនៅឡើយដោយនៅធ្វើការស្រាវជ្រាវរកមូលហេតុបន្តទៀត ៕
ចែករំលែកព័តមាននេះ