រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានស្នើសុំឱ្យភាគីជប៉ុន បន្តជួយ និងគាំទ្រដល់ការបោះឆ្នោតសកលនៅកម្ពុជា ដែលនឹងប្រព្រឹត្តិទៅនៅថ្ងៃទី២៩ កក្កដា ឆ្នាំ២០១៨ នឹងបានស្នើសុំឱ្យបញ្ជូនអ្នកសង្កេតការជប៉ុនមកចូលរួមសង្កេតការនៅក្នុងថ្ងៃបោះឆ្នោត ដើម្បីឃ្លាំមើលការបោះឆ្នោតប្រកបដោយសេរី ត្រឹមត្រូវ និងយុត្តិធម៌ ដែលជាដំណើរការលទ្ធិប្រជាធិបតេយ្យនៅក្នុងប្រទេសកម្ពុជា។
សម្តេចបានថ្លែងបែបនេះនៅក្នុងជំនួបពិភាក្សាការងារជាមួយលោក កាហ្ស៊ូយូគី ណាកាណេ( Kazuyuki NAKANE) អនុរដ្ឋមន្ត្រី ក្រសួងការបរទេសជប៉ុន នៅវិមានសន្តិភាព រាជធានីភ្នំពេញ នៅថ្ងៃទី២៩ ខែមករា ឆ្នាំ ២០១៨ នេះ ។
លោក Kazuyuki NAKANE បានគោរពជំរាបជូនសម្តេចតេជោ អំពីការរីកចម្រើននៃទំនាក់ទំនង និងសហប្រតិបត្តិការរវាងកម្ពុជា និងជប៉ុន ជាពិសេសនៅក្នុងខួបលើកទី៦៥ឆ្នាំ នៃទំនាក់ទំនងការទូតដ៏ល្អរវាងប្រទេសទាំងពីរ ដែលពេលនេះប្រទេសជប៉ុនបានសម្រេចបើកអគ្គកុងស៊ុលនៅទីក្រុងសៀមរាបបន្ថែមទៀត ដែលឆ្លុះបញ្ចាំងអំពីទំនាក់ទំនងស៊ីជម្រៅរវាងប្រទេសទាំងពីរ។ លោករដ្ឋលេខាធិការបានប្តេជ្ញាក្នុងការជំរុញទំនាក់ទំនងរវាងប្រទេសទាំងពីរឱ្យកាន់តែល្អរឹងមាំខ្លាំងឡើងថែមទៀត។
ជាមួយគ្នានេះដែរ លោកបានបញ្ជាក់ថា ទិសដៅរបស់ជប៉ុនក្នុងការរួមចំណែកនៅក្នុងតំបន់ គឺជួយជំរុញការអភិវឌ្ឍរបៀងខាងត្បូងដែលក្នុងនោះមានការការអភិវឌ្ឍហេដ្ឋារចនាសម្ព័ន្ធ ការចូលរួមចំណែកអភិវឌ្ឍកំពង់ផែខេត្តព្រះសីហនុ ,បណ្តាញខ្សែអគ្គិសនី និងការអភិវឌ្ឍធនធានមនុស្ស ដែលជប៉ុនបានសម្រេចបង្កើតមហាវិទ្យាល័យបណ្តុះបណ្តាលគ្រូបង្រៀននៅកម្ពុជាទៀតផង។ លោក Kazuyuki NAKANE បានថ្លែងអំណរគុណ សម្តេចតេជោ ដែលតែងតែគាំទ្រ និងទទួលជួបក្រុមនាវាយុវជនកន្លងមក។
ជាការឆ្លើយតបសម្តេចតេជោ ហ៊ុន សែន បានថ្លែងអំណរគុណ ចំពោះលោក Kazuyuki NAKANE និងរដ្ឋាភិបាលជប៉ុន ដែលបានជួយកម្ពុជាកន្លងមក និងគម្រោងជំនួយនានាមកកម្ពុជាមកទល់សេព្វថ្ងៃដែលសុទ្ធតែជួយចំគោលដៅអាទិភាពរបស់កម្ពុជាដែលផ្តោតលើ «ធនធានមនុស្ស , ទឹក, ភ្លើង និងផ្លូវ»។ ទន្ទឹមនឹងនេះ សម្តេចតេជោបានគាំទ្រចំពោះសកម្មភាពនាវាយុវជនអាស៊ានដែលបានតភ្ជាប់រវាងយុវជនកម្ពុជា យុវជនអាស៊ាន និងយុវជនជប៉ុនឱ្យមានទំនាក់ទំនងល្អ។ ស្របជាមួយគ្នានេះដែរ យុវជនកម្ពុជាក៏បានបង្កើតសមាគមនាវាយុវជនកម្ពុជា ដើម្បីចូលរួមសកម្មភាពជាមួយនាវាយុវជនអាស៊ាន-ជប៉ុន ដែលសមាជិកកំពុងមានការកើនឡើងជារៀងរាល់ឆ្នាំផងដែរ។
សូមបញ្ជាក់ថា វត្តមានរបស់លោក Kazuyuki NAKANE មកកាន់កម្ពុជា រូបលោកក៏ជាអធិបតីនៃពិធីបើកការិយាល័យកុងស៊ុលជប៉ុនក្នុងខេត្តសៀមរាប ដែលប្រព្រឹត្តទៅកាលពីថ្ងៃទី ២៨ ខែមករា ឆ្នាំ២០១៨ នៅសណ្ឋាគារសុខាផាឡេស ខេត្តសៀមរាប ផងដែរ៕
ចែករំលែកព័តមាននេះ