រាជធានីភ្នំពេញ ៖ ក្រសួងយុត្តិធម៌កំពុងរៀបចំដាក់ឱ្យដំណើរសាលាឧទ្ទរណ៍ថ្មីមួយនៅក្នុងខេត្តត្បូងឃ្មុំ ដែលជាខេត្តបែកចេញពីខេត្តកំពង់ចាម នៅពេលខាងមុខនេះ ដើម្បីងាយស្រួលដំណើរការរឿងក្តីនៅប្រព័ន្ធតុលាការ។ នេះបើយោងតាមអ្នកនាំពាក្យក្រសួងយុត្តិធម៌ ។ លោក ជិន…
រាជធានីភ្នំពេញ ៖ ក្រសួងយុត្តិធម៌កំពុងរៀបចំដាក់ឱ្យដំណើរសាលាឧទ្ទរណ៍ថ្មីមួយនៅក្នុងខេត្តត្បូងឃ្មុំ ដែលជាខេត្តបែកចេញពីខេត្តកំពង់ចាម នៅពេលខាងមុខនេះ ដើម្បីងាយស្រួលដំណើរការរឿងក្តីនៅប្រព័ន្ធតុលាការ។ នេះបើយោងតាមអ្នកនាំពាក្យក្រសួងយុត្តិធម៌ ។
លោក ជិន ម៉ាលីន អ្នកនាំពាក្យក្រសួងយុត្តិធម៌បាឲ្យដឹងថា រហូតមកដល់ពេលនេះក្រសួងបាននិងកំពុងរៀបចំសាលាឧទ្ទរណ៍មួយនៅខេត្តត្បូងឃ្មុំ ដែលគ្រោងនឹងដំណើរការនៅក្នុងឆ្នាំ២០១៨នេះ ។ ជាមួយគ្នានេះផងដែរ ក្រសួងនឹងបង្កើតសាលាឧទ្ទរណ៍ នៅតាមបណ្តាខេត្ត-ក្រុងផ្សេងៗទៀត ដូចជានៅក្នុងខេត្តព្រះស៊ីហនុ ខេត្តបាត់ដំបង ដែលជាទិសដៅក្រសួងគ្រោងនឹងបង្កើតឲ្យបានចំនួន៧ សាលាឧទ្ទរណ៍ដើម្បីគ្របដណ្តប់នូវវិសាលភាពដែនដីនៅក្នុងប្រទេសកម្ពុជា។
អ្នកនាំពាក្យក្រសួងយុត្តិធម៌បានគូសបញ្ជាក់ថា៖ « យើងបង្កើតសាលាឧទ្ទរណ៍តែ៧ គឺគ្រប់គ្រាន់ហើយ ប៉ុន្តែយើងធ្វើតាមកម្រិតធនធានថវិការបស់យើង ។ ដោយមិនអាចធ្វើម្តងទាំង៣ ឬទាំង៧ នោះទេ ព្រោះថា យើងត្រូវការទាំងថវិកា និងធនធានមនុស្សក្នុងការបំរើការងារ នៅពេលយើងសាងសង់រួច»។
លោក ជិន ម៉ាលីន បានឲ្យដឹងទៀតថា សម្រាប់ការបង្កើតសាលាឧទ្ទរណ៍នេះ ក្រសួងត្រូវការធ្វើការបណ្តុះបណ្តាលមន្ត្រី ដើម្បីទៅបំពេញការងារនៅសាលាឧទ្ទរណ៍ទាំងនោះ។ សម្រាប់ឆ្នាំ២០១៨នេះ អាចដាក់ឱ្យដំណើរបានតែសាលាឧទ្ទរណ៍នៅខេត្តត្បូងឃ្មុំ តែមួយប៉ុណ្ណោះ ។ នៅពេលនេះក្រសួងយុត្តិធម៌បានត្រៀមមនុស្សរួចជាស្រេចហើយសម្រាប់បំរើការនៅសាលាឧទ្ទរណ៍ខេត្តត្បូងឃ្មុំ ៕
ចែករំលែកព័តមាននេះ