ប្រទេសហ្វ៊ីលីពីន ៖ កាលពីថ្ងៃទី២៧ មករា អាជ្ញាធរបានព្រមានថា ផេះ និងដុំថ្មក្តៅច្រើនលានតោនដែលបញ្ចេញពីភ្នំភ្លើង MAYON កំពុងផ្ទុះនៅហ្វ៊ីលីពីនអាចលាយជាមួយទឹកភ្លៀងគំរាមកំហែងប្រជាជនរស់នៅជុំវិញភ្នំភ្លើងនេះ ដែលច្រើនសិបពាន់នាក់ត្រូវបានជម្លៀសចេញរួចហើយ ។
វិទ្យាស្ថានសិក្សាភ្នំភ្លើង និងការរញ្ជួយដីហ្វ៊ីលីពីន PHIVOLCS បានធ្វើការព្រមាននេះ ចំណែកភ្លៀងកំពុងធ្លាក់ខ្លាំងលើភ្នំភ្លើង ដែលផ្ទុះពីពាក់កណ្តាលខែមករា មកបញ្ចេញកំអែ ព្រមទាំងពពកផេះក្តៅយ៉ាងខ្លាំង ។
ផេះភ្នំភ្លើង ដុំថ្ម និងទឹកភ្លៀង អាចបង្កើតការហូរភក់យ៉ាងធំ និងដោយរហ័សហៅ «LAHARS» ដែលអាចបំផ្លាញបណ្តាភូមិទាំងមូល ។ វិទ្យាស្ថានខាងលើគូសបញ្ជាក់ថា LAHARS ទាំងនេះជាបាតុភូតគួរឱ្យខ្លាចនៅហ្វ៊ីលីពីន ព្រោះវាអាចហូរចូលក្នុងបណ្តាខ្សែទឹក ហើយអំពាវនាវដល់អាជ្ញាធរឱ្យជម្លៀសចេញប្រជាជនរស់នៅជិតស្ទឹងទាំងឡាយ ។
មនុស្សជាង៨៤.០០០នាក់ ត្រូវបានជម្លៀសចេញរួចហើយពីតំបន់៩គីឡូម៉ែត្រជុំវិញភ្នំភ្លើង MAYON ។ ផេះ និងដុំថ្ម ព្រមទាំងអ្វីៗទៀតដែលភ្នំភ្លើងនេះបានបញ្ចេញនាពេលថ្មីៗនេះមានទំហំប្រមាណជា២៥លានម៉ែត្រគូប ស្ថិតនៅចង្កេះភ្នំ ព្រមទាំងបណ្តាតំបន់ក្បែរៗភ្នំភ្លើង ។ កាលពីខែសីហា ឆ្នាំ១៩៨៦ ការផ្ទុះភ្នំភ្លើង MAYON ពុំបណ្តាលឱ្យមានមនុស្សស្លាប់ដោយផ្ទាល់ឡើយ ក៏ប៉ុន្តែការបាក់កាកសំណាល់ភ្នំភ្លើងនេះនៅចង្កេះភ្នំ កើតមាន៤ខែក្រោយមក ដោយសារព្យុះមួយសម្លាប់មនុស្សដល់ទៅប្រមាណជា១.០០០នាក់ ៕
ចែករំលែកព័តមាននេះ