ខេត្តព្រៃវែង ៖ ក្រុមអ្នកលួចឆក់ត្រីពេលយប់ចំនួន២នាក់ ត្រូវបានកម្លាំងប៉ូលិសរដ្ឋបាលឃុំធាយ ចេញបង្ក្រាប និងចាប់ខ្លួនបានរួមជាមួយ និងវត្ថុតាងដែលជាឧបករណ៍សម្រាប់ឆក់ត្រីមួយចំនួនផងដែរ ។ សកម្មភាពចុះបង្ក្រាបក្រុមអ្នកឆក់ត្រីខាងលើបានធ្វើឡើងកាលពីម៉ោង១០និង៣០នាទីយប់ ថ្ងៃទី២៦…
ខេត្តព្រៃវែង ៖ ក្រុមអ្នកលួចឆក់ត្រីពេលយប់ចំនួន២នាក់ ត្រូវបានកម្លាំងប៉ូលិសរដ្ឋបាលឃុំធាយ ចេញបង្ក្រាប និងចាប់ខ្លួនបានរួមជាមួយ និងវត្ថុតាងដែលជាឧបករណ៍សម្រាប់ឆក់ត្រីមួយចំនួនផងដែរ ។ សកម្មភាពចុះបង្ក្រាបក្រុមអ្នកឆក់ត្រីខាងលើបានធ្វើឡើងកាលពីម៉ោង១០និង៣០នាទីយប់ ថ្ងៃទី២៦ ខែមករានេះ នៅចំណុចវាលបឹងកំពង់ក្អុក ដែលស្ថិតក្នុងភូមិស្នេហ៍ ឃុំធាយ ស្រុកបាភ្នំ ខេត្តព្រៃវែង ។ ដែលសកម្មភាពនេះទទួលបានការគាំទ្រជាខ្លាំងពីសំណាក់ប្រជាពលរដ្ឋនៅក្នុងមូលដ្ឋាន ។
ជនសង្ស័យជាក្រុមអ្នកឆក់ត្រីត្រូវចាប់ខ្លួនបាននោះទី១- ឈ្មោះ សឿន សារ៉ន ភេទប្រុស អាយុ៣១ឆ្នាំ មុខរបរធ្វើស្រែ និងទី២- ឈ្មោះ ដៀប វឌ្ឍនា ភេទប្រុស អាយុ៣៨ឆ្នាំ មុខរបរធ្វើស្រែ អ្នកទាំង២មានទីលំនៅ ក្នុងភូមិខ្សាច់ស ឃុំរក្សជ័យ ស្រុកបាភ្នំ ខេត្តព្រៃវែង ។ ចំណែកវត្ថុតាងដែលដកហូតបានរួមមាន ទូកជ័រពណ៍សលាយខៀវ ទំហំ៦តឹក គុណ៧ម៉ែត្រ ចំនួន២គ្រឿង ម៉ាស៊ីនសាំង៦សេស ចំនួនពីរគ្រឿង អាគុយចំនួន៣គ្រឿង ដងឬស្សីភ្ជាប់ដែកឆក់ចំនួន៤ និងដុំសំរាប់ឆក់ចំនួនពីរគ្រឿង ។
ក្រោយពីចាប់ខ្លួនជនសង្ស័យទាំង២នាក់បាន សមត្ថកិច្ចប៉ូលិសរដ្ឋបាលឃុំធាយ កសាងសំណុំរឿង និងប្រគល់ជនសង្ស័យរួមជាមួយវត្ថុតាងទៅឲ្យមន្ត្រីជំនាញខណ្ឌជលផលខេត្ត ជាអ្នកចាត់ការបន្ត ប៉ុន្តែក្រោយពីមន្ត្រីជលផលនាំខ្លួនជនសង្ស័យទាំង២ទៅបាត់ បានតែ១ថ្ងៃ ក៏ស្រាប់តែឃើញជនសង្ស័យទាំង២នាក់ ត្រឡប់មកផ្ទះវិញយ៉ាងស្រួលធ្វើឲ្យប្រជាពលរដ្ឋមានការងឿងឆ្ងល់ និងហួសចិត្តជាខ្លាំង ។
ជុំវិញបញ្ហានេះត្រូវបានលោក អូន ស៊ីណាត ប្រធានខណ្ឌជលផលខេត្តព្រៃវែង បញ្ជាក់ឲ្យដឹងថា ជនសង្ស័យទាំង២នាក់នោះមិនមែនត្រូវបានគេដោះលែងនោះទេ គឺគេគ្រាន់តែអនុញ្ញាតិឲ្យនៅក្រៅឃុំ ហើយអ្នកអនុញ្ញាតិនោះមិនមែនមន្ត្រីជលផលទេ គឺព្រះរាជអាជ្ញាជាអ្នកអនុញ្ញាតិ ហើយតុលាការនៅតែបន្តនីតិវិធី និងមានការកោះហៅជនសង្ស័យឲ្យចូលខ្លួនក្នុងពេលណាមួយ ដោយមិនឲ្យរួចខ្លួនស្រួលៗនោះទេ ៕
ចែករំលែកព័តមាននេះ