រាជធានីភ្នំពេញ ៖ នគរបាលព្រហ្មទណ្ឌស្រុកអង្គស្នួល សហការជាមួយនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត បានបំបែកសំណុំរឿងឃាតកម្មចាក់សម្លាប់ភ្នាក់ងារម្នាក់នៃកាសែតសម្លេងប្រជាជន ក្នុងរយៈពេលតែ៤ថ្ងៃ ។ តាមរយៈការស្រាវជ្រាវក៏ឈានដល់ការចាប់ខ្លួនស្ត្រីជាឃាតករដៃឆៅម្នាក់ មិនតែប៉ុណ្ណោះឃាតករត្រូវជាស្រីស្នេហ៍របស់ជនរងគ្រោះទៀតផង ។ ចំណែកការចាក់សម្លាប់ជនរងគ្រោះនេះ គឺជាចេតនាប្លន់យកទ្រព្យសម្បត្តិមានជាប់ខ្លួនដូចជាគ្រឿងអលង្ការ លុយនិងម៉ូតូ១គ្រឿង ។
ការបំបែកសំណុំរឿងខាងលើនោះក្រោយពីការកើតមានអំពើឃាតកម្មលើបុរសជាភ្នាក់ងារកាសែតកាលពី៤ថ្ងៃមុន ហើយឃាតករត្រូវនគរបាលចាប់ខ្លួនបាន កាលពីវេលាម៉ោង៦ល្ងាចថ្ងៃទី២៤ មករា នៅចំណុចផ្ទះជួលស្ថិតនៅក្នុងភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ គឺពិតជាឈាមស្រែកស្បែកហៅមែន ។
ស្ត្រីរូបនោះឈ្មោះ ផេង ណាន អាយុ៣០ឆ្នាំ លាបសក់អស់ទាស់ ។ ចំណែកបុរសរងគ្រោះដល់ស្លាប់បាត់បង់ជីវិតនោះឈ្មោះ នួន សុភាព អាយុ៥៨ឆ្នាំ មុខរបរបើកហាងកោសជប់និងម៉ាស្សានិងជាអ្នកសារព័ត៌មានសំឡេងប្រជាជន ដែលមិនធ្លាប់ឮឈ្មោះ ហើយក៏ជាមន្ត្រីយោធានៅអង្គភាពទ័ពពិសេសឆត្រយោងលេខ៩១១ផងដែរ ។ ជនរងគ្រោះមានទីលំនៅក្នុងភូមិស្រែអំពិល សង្កាត់ស្នោរខណ្ឌពោធិ៍សែនជ័យ រាជធានីភ្នំពេញត្រូវបានស្រីស្នេហ៍ចាក់ប្រហារចំនួន១៧កាំបិត ចំត្រង់ពោះ,ចង្អុលដៃស្ដាំ,ខ្នងដៃខាងឆ្វេង ,បាតដៃខាងឆ្វេង,និងភ្លៅស្ដាំ ។
យុវជនម្នាក់ដែលជាកូនប្រុសជនរងគ្រោះបានអះអាងថា ឪពុករបស់ខ្លួនបាត់បង់ ខ្សែកប្លាទីន១ខ្សែទម្ងន់២តម្លឹង ចិញ្ចៀនត្រាមាស១វង់ទម្ងន់១ម្លឹង លុយចំនួន១,២០០ដុល្លារ និងម៉ូតូ១គ្រឿងម៉ាកហុងដាឌ្រីមសេ១២៥ស៊េរីឆ្នាំ២០១៨ពណ៌ខ្មៅ ដែលសរុបក្នុងការបាត់បង់នេះមានចំនួនប្រហែលជាង៧ពាន់ដុល្លារ ។
នគរបាលបានឱ្យដឹងថា ក្រោយការចាប់ខ្លួននាំទៅសួរចម្លើយ ស្ត្រីដែលជាជនសង្ស័យបានសារភាពថា ខ្លួនពិតជាបានចាក់សម្លាប់បុរសជាសង្សារមែន ដើម្បីប្លន់យកទ្រព្យសម្បត្តិទៅដោះប្តីដែលជាប់ពន្ធនាគារព្រៃស ពីបទជួញដូរគ្រឿងញៀន ហើយត្រូវការរកលុយចំនួន២,៥០០ដុល្លារដើម្បីយកទៅឱ្យតុលាការ ។
មិនតែប៉ុណ្ណោះស្ត្រីរូបនេះឱ្យដឹងដែរថា បានជំពាក់លុយគេច្រើនណាស់ គ្មានលទ្ធភាពសងគេទេ ទើបបែកគំនិតចាក់សម្លាបគាត់ដើម្បីប្លន់យកទ្រព្យសម្បត្តិ ។
ស្ត្រីជាឃាតករបានបន្តទៀតថា កាលពីមុននាងធ្លាប់ធ្វើការងារជាស្ត្រីម៉ាស្សារបស់បុរសរងគ្រោះ ប៉ុន្តែក្រោយមកបានឈប់វិញមួយរយៈ រហូតដល់មុនពេលកើតហេតុ បុរសរងគ្រោះបានបើកហាងម៉ាស្សាកោសជប់ថ្មីមួយកន្លែងទៀត និងត្រូវការមនុស្សស្រីធ្វើការងារនៅទីនោះ នាងក៏បានទំនាក់ទំនងសុំការងារធ្វើ ក៏ត្រូវជនរងគ្រោះបាននាំនាងទៅដេក នៅផ្ទះសំណាក់«សំណាងណាស់» ។ ពេលនោះនាងក៏បានព្រមទៅជាមួយ ព្រោះជាឱកាសល្អ សម្រាប់នាងប្លន់យកទ្រព្យសម្បត្តិពីគាត់ទៅដោះប្តី ។ពេលទៅដល់ក្នុងបន្ទប់ផ្ទះសំណាក់នាងបានយកកូនកាំបិតលាក់នៅក្រោមខ្នើយ ហើយក្រោយពេលងូតទឹកសម្អាតខ្លួនរួចហើយ ក៏បានរួមរ័កគ្នា ដោយជនរងគ្រោះដេកឱ្យនាងចាត់ការពីលើ ។ ឆ្លៀតពេលដែលជនរងគ្រោះកំពុងស្រណុកស្រួល ភ្លេចខ្លួននាងក៏បានទាញកូនកាំបិតពីក្រោមខ្នើយចាក់ពោះភ្លាម ។ ពេលនោះជនរងគ្រោះបានប្រកាច់ធ្លាក់ពីលើគ្រែ ទើបនាងស្ទុះទៅចាក់ថែមច្រើនកាំបិតទៀត រហូតដល់ស្លាប់ទើបឈប់ ។ មុនពេលស្លាប់ជនរងគ្រោះបានសួរនាងថា ហេតុអ្វីបានធ្វើបែបនេះ ? ហើយនាងក៏បានសុំទោសរួចប្រាប់ថា ដើម្បីយកលុយដោះប្តីចេញពីគុក ។
ឃាតករសារភាពទៀតថា ក្រោយពេលសម្លាប់រួច នាងក៏ប្រឡាក់ឈាមដែរ ប៉ុន្តែនាងបានដោះយកគ្រឿងអលង្ការនិងលុយពីជនរងគ្រោះរួច បានលាងសម្អាតឈាមរួចរាល់ទើបចេញមកក្រៅ ហើយបានទៅអង្គុយលើម៉ូតូធ្វើជានិយាយទូរស័ព្ទ ដើម្បីកុំឱ្យម្ចាស់ផ្ទះសំណាក់ដឹងឬសង្ស័យ ។ បន្ទាប់មកទើបយកម៉ូតូជិះគេចខ្លួនហើយបានយកគ្រឿងអលង្ការ និងទូរស័ព្ទ១គ្រឿងផង ទៅលក់នៅក្នុងផ្សារជម្ពូវ័នបានលុយមួយចំនួន ។ ចំណែកម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ ពាក់ផ្លាកលេខភ្នំពេញ១GG-៧៧៨៥ទៅលក់នៅកន្លែង ទិញលក់យីហោ«សុខ ឃីម»លក់-ទិញ ម៉ូតូនិងរថយន្តគ្រប់ប្រភេទដែលមានទីតាំងស្ថិតនៅតាមបណ្ដោយផ្លូវជាតិលេខ៥ ខាងជើងអធិការដ្ឋាននគរបាលខណ្ឌព្រែកព្នៅក្នុងតម្លៃ១,៤៥០ដុល្លារ ។
ក្រោយមកបានយកលុយចាយវាយនិងទិញគ្រឿងអលង្ការសម្រាប់ពាក់លម្អរខ្លួនមួយចំនួន និងលេងល្បែងចាញ់អស់ អត់បានយកលុយទៅដោះប្ដីចេញពីគុកឡើយ ។ បន្ទាប់មកបានសម្ងំលាក់ខ្លួននៅក្នុងផ្ទះជួល ស្ថិតនៅក្នុងភូមិព្រៃបឹង សង្កាត់កន្ទោក ខណ្ឌពោធិ៍សែនជ័យក៏ត្រូវបាននគរបាលមកចាប់ខ្លួនតែម្តង ។
ដោយឡែកនៅវេលាព្រឹកថ្ងៃទី២៥ ខែមករា ឆ្នាំ២០១៨ នគរបាលស្រុកអង្គស្នួល និងនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តកណ្ដាល បាននាំស្ត្រីជាឃាតករទៅកាន់កន្លែងដែលយកម៉ូតូទៅលក់ គឺទីតាំងលក់-ទិញម៉ូតូនិងរថយន្តយីហោ«សុខ ឃីម លក់-ទិញ ម៉ូតូនិងរថយន្តគ្រប់ប្រភេទ»ដើម្បីយកម៉ូតូមកវិញ ។ ប៉ុន្តែពេលចុះទៅដល់ត្រូវបានស្ត្រីឈ្មោះ ចាន់ សុឃីម អាយុជាង៣០ឆ្នាំ ដែលជាម្ចាស់ទីតាំងបានបដិសេធថាមិនបានដឹង មិនបានទិញម៉ូតូនោះទេ ព្រមទាំងនិយាយឡូឡាដាក់នគរបាលថែមទៀត ។
ទោះបីជានគរបាលយកឃាតករទៅនិយាយតទល់ជាមួយហើយក្ដី ខណៈនោះនគរបាលបានសម្រេចចិត្តឃាត់ខ្លួនម្ចាស់ទីតាំងខាងលើរុញបញ្ចូលទៅក្នុងរថយន្ត ។ គ្រាន់តែរុញចូលដល់ក្នុងរថយន្តភ្លាម ស្រាប់តែស្ត្រីនោះលើកដៃសំពះសុំឱ្យនគរបាលដោះលែងខ្លួនវិញ និងបានប្រាប់ត្រង់ថា ខ្លួនពិតជាបានទិញម៉ូតូនោះមែន ។
ស្ត្រីនោះបានប្រាប់នគរបាលថា បានទិញម៉ូតូខាងលើពីឃាតករក្នុងតម្លៃ១,៤៥០ដុល្លារព្រោះឃើញមានឯកសារគ្រប់គ្រាន់ បន្ទាប់មកនាងបានយកម៉ូតូនោះទៅលក់ឱ្យអ្នកផ្សេងទៀតនៅខេត្តកំពង់ចាមក្នុងតម្លៃ១,៦៩០ដុល្លារ ។ ស្ត្រីរូបនេះបាននិយាយកុហកនគរបាលច្រើនណាស់ដោយអួតអាងម្ដងថា ប្ដីនាងជាអ្នកបើកបររថយន្តឱ្យថ្នាក់ដឹកនាំនិងម្ដងទៀតនិយាយថា ប្តីធ្វើការធនាគារគឺនិយាយម្ដងអញ្ចេះ ម្ដងអញ្ចុះរកសាច់ការមិនបានឡើយ ។ ពេលនេះនគរបាលបានឃុំខ្លួនម្ចាស់ទីតាំងទិញម៉ូតូចោរជាបណ្ដោះអាសន្ននៅអធិការដ្ឋាននគរបាលស្រុកអង្គស្នួល ដើម្បីចាត់ការតាមច្បាប់ ។ ចំណែកស្ត្រីជាឃាតករត្រូវបាននគរបាលនាំទៅធ្វើត្រាប់ពីសកម្មភាពចាក់សម្លាប់ជនរងគ្រោះខាងលើនៅក្នុងផ្ទះសំណាក់«សំណាងណាស់»នាវេលារសៀលថ្ងៃទី២៥ មករា ដដែលនោះផងដែរ ៕
ចែករំលែកព័តមាននេះ