រាជធានីភ្នំពេញ ៖ រហូតមកទល់នឹងពេលនេះមនុស្សភាគតិចណាស់ដែលដឹងថា កីឡាម៉ារ៉ាតុងនៅកម្ពុជាចាប់កំណើតតាំងពីពេលណាហើយអ្នកណាជាអ្នកនាំចូលកីឡាប្រភេទនេះមកស្រុកខ្មែរ? សូម្បីតែកីឡាករមួយចំនួនក៏អត់បានដឹងដែរ។
បើតាមការបកស្រាយរបស់លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ឱ្យដឹងថា កីឡាម៉ារ៉ាតុងជាប្រភេទកីឡាបរទសមិនមែនជាកីឡាប្រពៃណីរបស់ខ្មែរយើងទេ ហើយបារាំងជាអ្នកនាំកីឡានេះចូលប្រទេសកម្ពុជាមុនគេនៅក្នុងតំបន់អាស៊ានតាំងពីស្តាតចាស់ដែលពីមុនគេហៅថា ស្តាតឡាំប៊ែរត្រូវបានសាងសង់រួចក្នុងឆ្នាំ១៩៩៣ ។ អំឡុងពេលនោះ បារាំងបាននាំចូលកីឡាជាច្រើនប្រភេទរួមមានកីឡាអត្តពលកម្ម រត់ល្បឿន ចោលដុំដែក និងចោលស្នជាដើម ព្រមទាំងគ្រូជំនាញមកជួយបង្ហាត់ដល់អត្តពលិកកម្ពុជាទៀតផង ដូច្នេះហើយបានជាប្រទេសភាគច្រើននៅក្នុងតំបន់អាស៊ានក៏ដូចជាឥណ្ឌូចិនទៅមិនរួចជាមួយអត្តពលិកកម្ពុជាយើងទេ ។ មិនតែប៉ុណ្ណោះអ្នកជំនាញបារាំងបានបញ្ចូលកម្មវិធីប្រកួតកីឡាទាំងនេះទៅតាមសាលារៀនថែមទៀត ទើបធ្វើឱ្យវិស័យកីឡាកម្ពុជាកាលណោះខ្លាំងជាងគេ។
លោក វ៉ាត់ ចំរើន បន្តថា ម៉ារ៉ាតុងជាប្រភេទកីឡាប្រមូលផ្ដុំមនុស្សយ៉ាងច្រើនហើយការប្រកួតត្រូវរៀបចំឡើងជាលក្ខណៈបើកចំហ ។ ប៉ុន្តែបើការប្រកួតរៀបចំជាលក្ខណៈជើងឯកសម្រាប់អ្នកអាជីពវិញគឺមិនសូវមានអ្នករត់នោះទេជាពិសេសនៅកម្ពុជាយើង ព្រោះកីឡាម៉ារ៉ាតុងនេះចម្ងាយពេញតាមស្តង់ដាររបស់វាគឺ៤២គីឡូម៉ែត្រ១៩៥ម៉ែត្រ ។
សព្វថ្ងៃយើងបានបង្កើតវាឱ្យក្លាយជាព្រឹត្តិការណ៍កីឡាទេសចរណ៍ កីឡាមហាជន ធ្វើយ៉ាងណាដើម្បីទាក់ទាញអ្នករត់ឱ្យបានច្រើនជាពិសេសយុវជន ដើម្បីឱ្យមានភាពស៊ាំជាមួយនឹងប្រភេទកីឡាចម្ងាយឆ្ងាយនេះ។ ម្យ៉ាងវិញទៀត កីឡាចម្ងាយឆ្ងាយនេះ វាត្រូវការហ្វឹកហាត់ឱ្យបានខ្លាំងក្លា ត្រូវការមនុស្សដែលមានលក្ខណៈសម្បត្តិទៅតាមវិទ្យាសាស្ត្រ គេបានកំណត់ថា មានតែមនុស្សដែលមានឈាមប្រភេទAប៉ុណ្ណោះដែលអាចលេងកីឡានេះបានល្អ ព្រោះអ្នកដែលមានប្រភេទឈាមAមានភាពអំណត់ច្រើន ទើបរត់ដល់គោលដៅបាន ។
សព្វថ្ងៃនេះកីឡាម៉ារ៉ាតុងបានក្លាយជាប្រភេទកីឡាដែលមានប្រជាប្រិយភាពបំផុតនៅលើពិភពលោក ។ ចំណែកកម្ពុជាវិញបានប្រែក្លាយការប្រកួតកីឡានេះទៅជាព្រឹត្តិការណ៍កីឡាទេសចរណ៍ ហើយត្រូវបានគណៈកម្មាធិការជាតិអូឡាំពិកកម្ពុជា សហការជាមួយក្រសួងទេសចរណ៍ រៀបចំឱ្យក្លាយទៅជាទិវារត់ប្រណាំងដែលធ្វើឡើងរៀងរាល់មួយឆ្នាំម្ដង ហើយទិវានេះត្រូវបានរៀបចំឡើងរយៈពេល២២ឆ្នាំមកហើយ ។ ទិវារត់ប្រណាំងលើកទី១ធ្វើឡើងនៅថ្ងៃទី២២ ខែធ្នូ ឆ្នាំ១៩៩៦ ដោយបានកិច្ចសហការរវាងគណៈកម្មាធិការជាតិអូឡាំពិកកម្ពុជា និងអង្គការមូលនិធិគាំទ្រអង្គការសហប្រជាជាតិ(Foundation Support For United Nation)។ បន្ទាប់មកនៅឆ្នាំ២០០២ត្រូវបានអង្គការបេះដូងមាសជប៉ុន(Heart Of Gold)ជួយបន្តរៀបចំរហូតដល់បច្ចុប្បន្ននេះ។
លោក វ៉ាត់ ចំរើន បញ្ជាក់ថា ការចាប់ផ្ដើមពីដំបូងពិតជាមានការលំបាកខ្លាំងណាស់ ប៉ុន្តែកត្តាសុខសន្តិភាព ស្ថេរភាពនយោបាយ គឺជាឱកាសដ៏ប្រពៃដែលបានបង្កលក្ខណៈឱ្យយើងទាំងអស់គ្នាបន្តការខិតខំប្រឹងប្រែងរក្សានិរន្តរភាពនៃការរៀបចំទិវារត់ប្រណាំងជារៀងរាល់ឆ្នាំ ។
ជាពិសេសការគាំទ្រយ៉ាងពេញទំហឹងពីរាជរដ្ឋាភិបាល ក្រុមហ៊ុនឯកជន កីឡាករ-កីឡាការិនីជាតិ និងអន្តរជាតិ គឺជាសក្ខីភាពនៃជោគជ័យសម្រាប់ទិវារត់ប្រណាំងពាក់កណ្ដាលម៉ារ៉ាតុងអន្តរជាតិរយៈពេល២២ឆ្នាំមកនេះ៕
ចែករំលែកព័តមាននេះ