រាជធានីភ្នំពេញ ៖ កម្លាំងអាជ្ញាធរខណ្ឌដង្កោដឹកនាំដោយលោក ម៉ុក ពុទ្ធា នាយករដ្ឋបាលសាលាខណ្ឌដង្កោ បានចុះទៅធ្វើការឡោមព័ទ្ធចាប់សត្វពពែ១ហ្វូងចំនួនជាង១០ក្បាល ប៉ុន្តែចាប់បានតែពពែឈ្មោល១ក្បាលប៉ុណ្ណោះ ។ ប្រតិបត្តិការណ៍នោះបានធ្វើឡើងកាលពីវេលាម៉ោង១២ថ្ងៃត្រង់…
រាជធានីភ្នំពេញ ៖ កម្លាំងអាជ្ញាធរខណ្ឌដង្កោដឹកនាំដោយលោក ម៉ុក ពុទ្ធា នាយករដ្ឋបាលសាលាខណ្ឌដង្កោ បានចុះទៅធ្វើការឡោមព័ទ្ធចាប់សត្វពពែ១ហ្វូងចំនួនជាង១០ក្បាល ប៉ុន្តែចាប់បានតែពពែឈ្មោល១ក្បាលប៉ុណ្ណោះ ។ ប្រតិបត្តិការណ៍នោះបានធ្វើឡើងកាលពីវេលាម៉ោង១២ថ្ងៃត្រង់ ថ្ងៃទី២៦ ខែមករា នេះ ចំណុចភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ ។
លោក ម៉ុក ពុទ្ធា នាយករដ្ឋបាលសាលាខណ្ឌដង្កោបានថ្លែងថា មានសត្វពពែ១ហ្វូងចំនួនជាង១០ក្បាល មានញី មានឈ្មោល មានតូច-ធំ ត្រូវបានម្ចាស់លែងចោល អត់បានឃ្វាលឲ្យបានត្រឹមត្រូវឡើយ ។ ពួកវាបានដើរស៊ីស្មៅ និងស្លឹកឈើបែបអនាធិតេយ្យ ជាពិសេសបានដើរស៊ីស្លឹកជ្រៃក្រឹមនៅលើសួនច្បារពុះចែកទ្រូងផ្លូវអស់នៅសល់តែដើមឆ្កឹងៗដែលធ្វើឲ្យដើមឈើនេះប្រឈមនឹងការងាប់ខូចខាតតែម្ដង ។
ប្រភពដដែលបានបន្តទៀតថា ដើមជ្រៃក្រឹមជាច្រើនដើមត្រូវបានដាំកាលពីពេលកន្លងមក ដើម្បីលំអសួនច្បារពុះចែកទ្រូងផ្លូវលេខ២១៧ នោះ ក្រោយការដាំដុះរួច វាបានរស់លូតលាស់ល្អហើយ ស្រាប់តែពេលនេះបានរងការខូចខាតទៅវិញ ដោយសារតែសត្វពពែជាង១០ក្បាលខាងលើ ដែលម្ចាស់លែងចោលឲ្យដើរស៊ីបែបអនាធិបតេយ្យខាងលើ ។ ប្រភពខាងលើបានបន្តថា លោកបានឲ្យមន្ត្រីសាលាខណ្ឌធ្វើការស្រាវជ្រាវរកម្ចាស់របស់វា ដើម្បីឲ្យចាប់ចង ឬឃ្វាលដែរ ប៉ុន្តែរកមិនឃើញសោះ ហើយម្ចាស់មិនបានចេញមុខមកឡើយ ។ ដោយសារតែមិនអាចបណ្ដែតបណ្ដោយតទៅទៀតបាន ទើបលោកដឹកនាំកម្លាំងមន្ត្រីសាលាខណ្ឌ និងកម្លាំងសណ្ដាប់ធ្នាប់ខណ្ឌប្រដាប់ដោយខ្សែចុះទៅព័ទ្ធចាប់បានពពែឈ្មោល១ក្បាល រួចចងជើងលើកដាក់រថយន្តដឹកទៅកាន់សាលាខណ្ឌ ។
ពេលនោះគ្រាន់តែដឹកទៅដល់សាលាខណ្ឌ ស្រាប់តែលេចមុខម្ចាស់ទៅដល់ដែរ គឺចេញមុខភ្លាមតែម្ដង ហើយសុំយកពពែរបស់ខ្លួនវិញ ប៉ុន្តែលោកអភិបាលខណ្ឌបានឲ្យទុកសិន រង់ចាំការណែនាំអប់រំគាត់សិន ។
ប្រជាពលរដ្ឋបាននិយាយថា សត្វពពែពូកែស៊ីខ្លាំងណាស់ គឺវាស៊ីមិនរើសមុខឡើយ ទោះបីជាដើមឈើខ្ពស់ ឬទាបស៊ីបានទាំងអស់ ។ បើហ្វូងវាទៅចំកន្លែងណាហើយ កន្លែងនោះប្រាកដជាខ្ទេចមិនខានឡើយ ដូច្នេះអ្នកចិញ្ចឹមពពែគួរតែចង ឬដាក់ក្រោល និងឃ្វាលឲ្យបានត្រឹមត្រូវចៀសវាងផលប៉ះពាល់នានា ជាពិសេសសម្បត្តិសាធារណៈ និងសួនច្បារតាមដងផ្លូវតែម្ដង ៕
ចែករំលែកព័តមាននេះ