រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានណែនាំដល់បុគ្គលិកដែលបម្រើការក្នុងមណ្ឌលព័ត៌មានទេសចរណ៍ នៅអាកាសយានដ្ឋានអន្តរជាតិភ្នំពេញ ត្រូវមានវត្តមានប្រចាំការ២៤ម៉ោង និងមានបដិសណ្ឋារកិច្ចសមរម្យចំពោះភ្ញៀវទេសចរ…
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានណែនាំដល់បុគ្គលិកដែលបម្រើការក្នុងមណ្ឌលព័ត៌មានទេសចរណ៍ នៅអាកាសយានដ្ឋានអន្តរជាតិភ្នំពេញ ត្រូវមានវត្តមានប្រចាំការ២៤ម៉ោង និងមានបដិសណ្ឋារកិច្ចសមរម្យចំពោះភ្ញៀវទេសចរ ហើយអ្វីសំខាន់នោះ គឺត្រូវផ្ដល់ព័ត៌មានពិត និងទាន់សភាពការណ៍ដល់ភ្ញៀវ ខណៈព័ត៌មាននោះ ទៀតសោត ក៏ត្រូវធ្វើបច្ចុប្បន្នភាព (Update) ជាប្រចាំផងដែរ ។
លោករដ្ឋមន្ត្រីថ្លែងបែបនេះក្នុងឱកាសអញ្ជើញសម្ពោធដាក់ឲ្យប្រើប្រាស់មណ្ឌលព័ត៌មានទេសចរណ៍របស់ក្រសួងទេសចរណ៍ នាថ្ងៃទី២៣ មករា នៅក្នុងអាកាសយានដ្ឋានអន្តរជាតិភ្នំពេញ ដោយមានការចូលរួមពីលោក អេរិច ដឺឡូប៊ែល អគ្គនាយកក្រុមហ៊ុនព្រលានយន្តហោះកម្ពុជា ។
លោក អេរិច ដឺឡូប៊ែល អគ្គនាយកក្រុមហ៊ុនព្រលានយន្តហោះ បានឲ្យដឹងថា នៅឆ្នាំ២០១៧ មានអ្នកដំណើរជាង៤លាននាក់បានឆ្លងកាត់អាកាសយានដ្ឋានអន្តរជាតិភ្នំពេញ ហើយនៅឆ្នាំ២០២០ កម្ពុជារំពឹងថា នឹងទទួលបានភ្ញៀវទេសចរអន្តរជាតិយ៉ាងតិច៧លាននាក់។ ដូច្នេះ ការបង្កើតមណ្ឌលព័ត៌មានទេសចរណ៍នេះ ជាការរៀបចំកែលម្អប្រព័ន្ធហេដ្ឋារចនាសម្ព័ន្ធថ្មីៗសម្រាប់អ្នកដំណើរឲ្យកាន់តែល្អប្រសើរជាងមុន ស្របតាមស្ដង់ដាអន្តរជាតិ ។
លោក ថោង ខុន បានថ្លែងថា ដើម្បីទទួលសាទរការមកដល់នៃភ្ញៀវទេសចរ បុគ្គលិកដែលបម្រើការងារក្នុងមណ្ឌលព័ត៌មាននេះ ត្រូវអនុវត្តការងារចាំបាច់មួយចំនួន រួមមាន ៖ ត្រូវមានវត្តមានជាប្រចាំដើម្បីបម្រើសេវាជូនភ្ញៀវ២៤ម៉ោងលើ២៤ម៉ោង ។ ត្រូវមានបដិសណ្ឋារកិច្ច រួសរាយរាក់ទាក់ស្វាគមន៍ភ្ញៀវទេសចរ ផ្ដល់ព័ត៌មានពិតៗ និងទាន់សភាពការណ៍ប្រាប់ដល់ភ្ញៀវ ដើម្បីឲ្យពួកគេស្វែងរក ឬចង់បានអ្វីមួយចំគោលដៅដូចចិត្តដែលគេចង់បាន ។ ប៉ុន្តែការផ្ដល់ព័ត៌មាននេះ ក៏ត្រូវធ្វើបច្ចុប្បន្នភាពជាប្រចាំផងដែរ ពីព្រោះព័ត៌មាននានាក្នុងសង្គមតែងតែវិវត្តន៍ទៅមុខជានិច្ច ។
លោករដ្ឋមន្ត្រីបានបញ្ជាក់ថា នៅឆ្នាំ២០២៣ កម្ពុជានឹងសម្រេចឲ្យបានការមកដល់របស់ភ្ញៀវទេសចរអន្តរជាតិប្រមាណ៦លាននាក់, នៅឆ្នាំ២០២៥ ឲ្យបាន១១លាននាក់ និងនៅឆ្នាំ២០៣០ ឲ្យបាន១៥លាននាក់ ដែលនឹងនាំចំណូលចាក់បញ្ចូលក្នុងសេដ្ឋកិច្ចជាតិដល់ទៅ១០ពាន់លានដុល្លារអាមេរិក និងមានបុគ្គលិកបម្រើការក្នុងវិស័យទេសចរណ៍ជាង១លាន៥សែននាក់ ។ លោកថា ដើម្បីសម្រេចបានគោលដៅនេះ មណ្ឌលព័ត៌មានទេសចរណ៍ ក៏ដើរតួសំខាន់ណាស់ដែរចំពោះការផ្សព្វផ្សាយពីវិស័យទេសចរណ៍នៅកម្ពុជា ។
សូមជម្រាបថា ដើម្បីដំណើរការប្រតិបត្តិការការងាររបស់មណ្ឌលព័ត៌មានទេសចរណ៍កម្ពុជា ប្រកបដោយនិរន្តរភាព ប្រសិទ្ធភាព និងផ្តល់នូវព័ត៌មាន ក៏ដូចជាធានានូវសុខសុវត្ថិភាពជូនភ្ញៀវទេសចរតាមគោលដៅនីមួយៗ មណ្ឌលព័ត៌មានទេសចរណ៍កម្ពុជា ត្រូវបានដាក់ឱ្យដំណើរការក្នុងទម្រង់៣ប្រភេទ រួមមាន ៖
១-មណ្ឌលព័ត៌មានទេសចរណ៍កម្ពុជាសាងសង់ និងគ្រប់គ្រងដោយក្រសួងទេសចរណ៍
២-មណ្ឌលព័ត៌មានទេសចរណ៍កម្ពុជាសាងសង់ និងដំណើរការដោយផ្នែកឯកជន និងមណ្ឌល
៣-មណ្ឌលព័ត៌មានទេសចរណ៍កម្ពុជាសាងសង់ និងដំណើរការរួមគ្នាដោយផ្នែករដ្ឋ-
ឯកជន ៕
ចែករំលែកព័តមាននេះ