ខេត្តប៉ៃលិន ៖ ប្រជាពលរដ្ឋជាច្រើននាក់រស់នៅក្នុងក្រុងប៉ៃលិនបាននាំគ្នានិយាយរិះគន់ទៅ លើលោក នុត សោភិរក្ស ជាប្រធានមន្ទីរសេដ្ឋកិច្ច និងហិរញ្ញវត្ថុ ដែលទើបនឹងឡើងតំណែងថ្មីៗថា បានសង់រោងការកូនស្រីរបស់ខ្លួនដោយបិទផ្លូវសាធារណៈនាំឱ្យប៉ះពាល់ដល់ការធ្វើដំណើររបស់ប្រជាពលរដ្ឋចេញចូលទៅមក ។ ការសង់រោងការនេះស្ថិតនៅទល់មុខនឹងកាកបាទក្រហមសាខាខេត្តប៉ៃលិន កាលពីព្រឹកថ្ងៃទី២៦ ខែមករា ឆ្នាំ២០១៨ ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។
ប្រជាពលរដ្ឋបានលើកឡើងរិះគន់នៅតាមហាងកាហ្វេខ្លាំងៗថា ផ្លូវក្រាលកៅស៊ូដែលមានទំហំធំស្មើផ្លូវជាតិហើយធ្លាប់តែប្រជាពលរដ្ឋបើកបរម៉ូតូ និងរថយន្តចេញចូលទៅមករាល់ថ្ងៃ មិនគួរណាលោកប្រធានសេដ្ឋកិច្ចខេត្តប៉ៃលិនដែលទើបនឹងឡើងកាន់តំណែងក្តៅៗបានមួយសន្ទុះយកផ្លូវនេះសង់រោងការកូនស្រីរបស់ខ្លួនធ្វើឱ្យប៉ះពាល់ដល់សណ្តាប់ធ្នាប់សាធារណៈបែបនេះទេ ។ ប្រភពបន្តទៀតថា បើប្រជាពលរដ្ឋធម្មតាៗប្រហែលជាគេមិនហ៊ានអនុញ្ញាឱ្យសង់រោងបិទផ្លូវបែបនេះឡើយ ប្រហែលដោយសារតែគាត់ជាមន្ត្រីរាជការហើយទើបអាជ្ញាធរមូលដ្ឋានហ៊ានចេញលិខិតឱ្យគាត់បិទផ្លូវបែបនេះ ។ ចំណែកអ្នកខ្លះទៀតមានការធុញទ្រាន់ក្នុងការជិះម៉ូតូ និងរថយន្តផ្លូវវាងឆ្ងាយនាំឱ្យខាតពេលវេលាអស់ជាច្រើន ហើយនឹកខឹងតែក្នុងចិត្តមិនហ៊ានចេញស្តីអ្វីនោះឡើយ ។
ពាក់ព័ន្ធទៅនឹងបញ្ហានេះភ្នាក់ងារយើងបានទាក់ទងទៅលោក ហែម ឫទ្ធី នាយករដ្ឋបាល សាលាខេត្តប៉ៃលិនដែរ តែលោកបានឆ្លើយថា មិនពាក់ព័ន្ធខាងលោកទេគឺគេសុំច្បាប់ទៅខាងចៅសង្កាត់ និងមេប៉ុស្តិ៍រដ្ឋបាលប៉ៃលិន ។ ក្រោយមកភ្នាក់ងារយើងបានទាក់ទៅទៅលោក ព្រហ្ម សារ៉ាត់ ចៅសង្កាត់ប៉ៃលិនដែរកាលវេលាម៉ោង១និង២៧នាទីរសៀលថ្ងៃដដែលតែលោកបានបិទទូរស័ព្ទមិនអាចបំភ្លឺបានឡើយ ។ ចំណែកលោក ថី អៀន នាយប៉ុស្តិ៍នគរបាល រដ្ឋបាលសង្កាត់ប៉ៃលិនវិញបានឱ្យដឹងថា ខាងលោកអត់ដឹងរឿងនេះទេហើយមិនបានអនុញ្ញាតឱ្យយករោងការទៅសង់លើផ្លូវសាធារណៈដែរ ប្រហែលជាគេសុំច្បាប់ខាងលើហើយមើលទៅ ។ ខ្លះនិយាយថា ម្តងគេម្តងយើង រឿងសង់រោងបុណ្យឬការមិនគួរចិត្តចង្អៀតពេកទេ ៕
ចែករំលែកព័តមាននេះ