ខេត្តព្រះសីហនុ ៖ កិច្ចប្រជុំសេចក្តីព្រាងច្បាប់ស្តីពីសារព័ត៌មានជំហានដំបូង ត្រូវបានបញ្ចប់ដោយជោគជ័យ ក្រោយពីមានការជជែកវែកញែករយៈពេល៣ថ្ងៃ បន្ទាប់ពីច្បាប់នេះត្រូវបានរៀបរាងតាក់តែង អស់រយៈពេលជាង១៤ឆ្នាំ នេះបើយោងតាមកិច្ចសម្ភាសន៍មួយក្រោយបញ្ចប់កិច្ចប្រជុំរបស់ លោក ខៀវ កញ្ញារិទ្ឋ រដ្ឋមន្ត្រីក្រសួងព័ត៌មាន។
ថ្លែងបញ្ជាក់ប្រាប់បណ្តាញសារព័ត៌មានក្រោយកិច្ចប្រជុំ លោកបានគូសបញ្ជាក់ថា វាគឺជាជោគជ័យមួយដ៏វិសេសវិសាល ដែលកម្ពុជាបាននឹងកំពុងអនុវត្តន៍លើសេចក្តីព្រាងច្បាប់ស្តីពីសារព័ត៌មាន ដែលមានអង្គការ និងសង្គមស៊ីវិលចូលរួមក្នុងកិច្ចប្រជុំនេះ ដែលពិភពលោកកម្រនឹងធ្វើបានដូចកម្ពុជា ។
ច្បាប់ស្តីសារព័ត៌មាននេះ នឹងចេញក្នុងពេលឆាប់នេះ បន្ទាប់ពីការសម្រេចបាននាកិច្ចប្រជុំនេះដាក់ជូនទៅ សម្តេចនាយករដ្ឋមន្ត្រី ដើម្បីស្នើសុំបើកកិច្ច ប្រជុំអន្តរក្រសួងរួចដាក់ចូលគណៈរដ្ឋមន្ត្រី នឹងចុងក្រោយសេចក្តីព្រាងច្បាប់នេះដាក់ជូនរដ្ឋសភាសម្រេចចុងក្រោយ ។
កិច្ចប្រជុំរយៈពេលនេះដែរ យើងបានផ្លាស់ប្តូរយោបល់ និងទស្សនៈផ្សេងៗគ្នាមកច្របាច់បញ្ជូលគ្នា បង្កើតបានសេចក្តីព្រាងច្បាប់មួយបែបស្តង់ដាអន្តរជាតិ ។ (ឃ្លឹបសំឡេងលោក ខៀវ កញ្ញារិទ្ឋ រដ្ឋមន្ត្រីក្រសួងព័ត៏មាន) ស្ថិតក្នុងឱកាសនោះដែរ លោក Anne Lemaistre តំណាងអង្គការយូនីស្កូរ បានគូសបញ្ជាក់ថា វាជាភាពជោគជ័យសម្រាប់កម្ពុជា ហើយវាក៏ជាលើកទីមួយដែរ ដែលកម្ពុជារៀបចំកិច្ចប្រជុំពង្រៀងច្បាប់ ស្តីពីសិទ្ធទទួលបានព័ត៌មាន ដែលមានសង្គមស៊ីវិល និងអង្គការក្រៅរដ្ឋាភិបាល ដែលបានចូលរូមលើសេចក្តីព្រាងច្បាប់នេះ ។ វាគឺជាគំរូដ៏ល្អមួយរបស់កម្ពុជាក្នុងតំបន់អាស៊ាន ក៏ដូចជាពិភពលោក ដែលកម្ពុជាអាសម្រេចវាគឺសមិទ្ធផលដ៏អស្ចារ្យ ដែលយើងសម្រេចបាន ដោយពុំនឹកស្មានដល់ប្រកបដោយស្តង់ដាខ្ពស់ ៕
ចែករំលែកព័តមាននេះ