រាជធានីភ្នំពេញ ៖ កិច្ចប្រជុំរំលឹកខួបអនុស្សាវរីយ៍២៥ឆ្នាំ នៃទំនាក់ទំនងភាពជាដៃគូសន្ទនាអាស៊ាន-ឥណ្ឌាបានប្រារព្ធឡើងក្រោមប្រធានបទ« កិច្ចសហប្រតិបត្តិការលំហសមុទ្រ និងសន្តិសុខ » ។ នៅក្នុងកិច្ចប្រជុំកំពូលដ៏មានសារៈសំខាន់នោះ អ្នកដឹកនាំអាស៊ាន-ឥណ្ឌាបានប្តេជ្ញាក្នុងការខិតខំប្រឹងប្រែង និងសហការអនុវត្តន៍ផែនការសកម្មភាព ដើម្បីអនុវត្តភាពជាដៃគូអាស៊ាន ឥណ្ឌាសម្រាប់សន្តិភាព វឌ្ឍនភាព និងវិបុលភាពរួម(២០១៦-២០២០)ឲ្យបានពេញលេញមានប្រសិទ្ធភាព និងទាន់ពេលវេលា ។
មេដឹកនាំទាំងអស់ក៏បានបន្តគាំទ្រ និងចូលរួមចំណែកដល់សមាហរណកម្មអាស៊ាន និងដំណើរការកសាងសហគមន៍អាស៊ានឆ្ពោះទៅរកការសម្រេចបាននូវចក្ខុវិស័យសហគមន៍អាស៊ានឆ្នាំ២០២៥ ។ ជាមួយគ្នានេះមេដឹកនាំទាំងអស់បានបញ្ជាក់សារជាថ្មី ពីសារៈសំខាន់នៃការថែរក្សា និងលើកកំពស់សន្តិភាព ស្ថិរភាព សុវត្ថិភាព និងសន្តិសុខលំហសមុទ្រសេរីភាពនៃការធ្វើនាវាចរណ៍ និងការហោះហើរនៅក្នុងតំបន់ និងការប្រើប្រាស់ដែនសមុទ្រស្របច្បាប់ដ៏ទៃទៀត និងការធ្វើពាណិជ្ជកម្មក្នុងលំហសមុទ្រដោយមិនមានការរារាំង ដើម្បីលើកកម្ពស់ដំណោះស្រាយដោយសន្តិវិធីនៃជម្លោះស្របតាមគោលការណ៍ទទួលស្គាល់ជាសកលនៃច្បាប់អន្តរជាតិរួមទាំងអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ១៩៨២ ( UNCLOS) និងស្តង់ដារពាក់ព័ន្ធ នឹងការអនុវត្តដោយអង្គការអាកាសចរណ៍ស៊ីវិលអន្តរជាតិ(ICAO) និងអង្គការសមុទ្រអន្តរជាតិ(IMO) ។
បញ្ជាក់សារជាថ្មី នូវការប្តេជ្ញាចិត្តការបងើ្កនការតភ្ជាប់រូបវន្ត និងឌីជីថល ស្របតាមផែនការមេស្តីពីការតភ្ជាប់អាស៊ានឆ្នាំ២០២៥ និងផែនការមេស្តីពីបច្ចេកវិទ្យាព័ត៌មាន និងទូរគមនាគមន៍ឆ្នាំ២០២០ តាមរយៈការប្រើប្រាស់ឥណទាន១ប៊ី លានដុល្លារអាមេរិកដែលឥណ្ឌាបានប្រកាស ដើម្បីលើកកម្ពស់ការតភ្ជាប់ហេដ្ឋារចនាសម្ព័ន្ធជារូបវន្ត និងឌីជីថល ។ ជាមួយគ្នានេះមេដឹកនាំអាស៊ានបានស្វាគមន៍ការបន្តគាំទ្ររបស់ឥណ្ឌាចំពោះកិច្ចខិតខំប្រឹងប្រែងរបស់អាស៊ានតាមរយៈការអនុវត្តផែនការ ការងារទី៣នៃគំនិតផ្តួចផ្តើមសម្រាប់សមាហរណកម្មអាស៊ាន ។ ថ្លែងទៅកាន់បណ្តាមេដឹកនាំអាស៊ាន-ឥណ្ឌាក្នុងកិច្ចប្រជុំកំពូលដ៏មានសារៈសំខាន់នោះ សម្តេចតេជោនាយករដ្ឋមន្ត្រីហ៊ុនសែនបានគូសបញ្ជាក់ថា សមិទ្ធិផលដែលបានឡើងក្នុងរយៈពេល២៥ឆ្នាំកន្លងមក ជាមោទនភាពមួយសម្រាប់រូបសម្តេចដែលបានដឹកនាំកិច្ចប្រជុំកំពូលអាស៊ាន-ឥណ្ឌាលើកទី១កាលពីឆ្នាំ២០០២ នៅទីក្រុងភ្នំពេញនឹងបានដើរតួនាទីជាប្រទេសសម្របសម្រួលទំនាក់ទំនងអាស៊ាន-ឥណ្ឌាពីឆ្នាំ២០០៩ដល់ឆ្នាំ២០១២ ក្នុងខណៈដែលឥណ្ឌាទទួលធ្វើជាម្ចាស់ផ្ទះរៀបចំកិច្ចប្រជុំកំពូលរំលឹកខួបអនុស្សាវរីយ៍អាស៊ាន-ឥណ្ឌាលើកទី១នៅឆ្នាំ២០១២ និងបានចូលរួមចំណែកដល់ការលើកកម្ពស់ភាពជាដៃគូអាស៊ាន -ឥណ្ឌាទៅជាដៃគូយុទ្ធសាស្ត្រ ។ សម្តេចតេជោ នាយករដ្ឋមន្ត្រីក៏បានស្នើឲ្យមានការទាញអារម្មណ៍ពីមេដឹកនាំអាស៊ានឥណ្ឌាក្នុងការពិចារណាកំណត់ទិសដៅអនាគតលើការងារសំខាន់ៗចំនួន៦ ដែលជាទិសដៅ និងចក្ខុវិស័យដ៏ត្រចះត្រចង់នៃទំនាក់ទំនងអាស៊ានឥណ្ឌា ។
សម្តេចតេជោក៏បានថ្លែងដែរថា កម្ពុជាគាំទ្រ និងបន្តចូលរួមក្នុងសកម្មភាពនានា និងតាមរយៈយន្តការនានាដែលមានស្រាប់នាំមុខដោយអាស៊ាន ដើម្បីដោះស្រាយបញ្ហាប្រឈមរួមក្នុងបញ្ហាលំហសមុទ្របង្កើនទំនុកចិត្ត និងលើលកម្ពស់កិច្ចសន្ទនា ក្នុងចំណោមភាគីពាក់ព័ន្ធស្តីពីកិច្ចសហប្រតិបត្តិការសន្តិសុខតាមសមុទ្រក្នុងការជួយសង្គ្រោះការរុករកការស្រាវជ្រាវវិទ្យាសាស្ត្រ និងការប្រយុទ្ធប្រឆាំងចោរកម្មនៅក្នុងលំហសមុទ្រ ។
ជាមួយគ្នានេះកម្ពុជាស្វាគមន៍ទស្សនទានសេដ្ឋកិច្ចពណ៌ខៀវ(Blue Economy) ដើម្បីបង្កើនកិច្ចសហប្រតិបត្តិការលំហសមុទ្ររវាងប្រទេសមាជិកអាស៊ាន និងដៃគូសន្ទនាក្នុងន័យបង្កើនការអភិវឌ្ឍ និងកំណើនសេដ្ឋកិច្ចតំបន់តាមរយៈការលើកស្ទួយសកម្មភាពរួម និងគម្រោងអភិវឌ្ឍរលើកកម្ពស់ការទុកចិត្តគ្នាទៅវិញទៅមក ៕
ចែករំលែកព័តមាននេះ