បង្ក្រាបទីតាំងពលរដ្ឋលួចដាំកញ្ឆាខុសច្បាប់ចំនួន៥៦ទីតាំង
- តាកែវ
ខេត្តតាកែវ ៖ នៅព្រឹកថ្ងៃព្រហស្បតិ៍ ៩កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៥ ខែមករា…
ខេត្តតាកែវ ៖ នៅព្រឹកថ្ងៃព្រហស្បតិ៍ ៩កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៥ ខែមករា ឆ្នាំ២០១៨ វេលាម៉ោង០៦ និង៣០នាទី លោក ភិន សុភ័ក្ត្រ អភិបាលរងស្រុកគិរីវង់ បានសហការណ៍ជាមួយលោកវរសេនីយ៍ទោ ម៉ាក់ សេរីវឌ្ឍនា នាយការិយាល័យប្រឆាំងគ្រឿងញៀន ខេត្តតាកែវ លោកវរសេនីយ៍ឯក យុគ សារ៉ាត់ អធិការស្រុកគីរីវង់ បានដឹកកម្លាំងជំនាញចុះបង្ក្រាបទីតាំង ដែលប្រជាពលរដ្ឋលួចដាំកញ្ឆាខុសច្បាប់ចំនួន៥៦ទីតាំងស្មើនឹង២១,៣៧១ដើម អណ្តូងប្រស់ទឹកចំនួន ៦៣អណ្តូង ដែលស្ថិតនៅចំណុច ជ្រោះឃ្លៃ ដុមកំរ៉ែង ដាខ្មៅ នៅខាងក្រោមជួរភ្នំបាយ៉ង់កោ និងគុហាចិន ដែលស្ថិនៅក្នុងភូមិជ្រោយ ឃុំព្រះបាទជាន់ជុំ ស្រុកគីរីវង់ ខេត្តតាកែវ ដាំដុះនៅលើផ្ទៃដីចំនួន៨,០៩២ ម៉ែត្រការេ។
លោកវរសេនីឯក អធិការស្រុកគីរីវង់បានឲ្យដឹងថា ដំណាំកញ្ឆាដែលកម្លាំងជំនាញ បានកាប់បំផ្លាញ ហើយប្រមូលដុតចោលនៅនឹងកន្លែង បន្ទាប់មកកម្លាំងដុតកម្ទេចចោលហើយ លោកបានដាក់បញ្ជាឲ្យកម្លាំងរបស់លោកស្រាវជ្រាវរកឲ្យឃើញមុខម្ចាស់ដំណាំកញ្ឆានេះ ដើម្បីយកទៅផ្តន្ទាទោសតាមច្បាប់ឲ្យខាងតែបាន។ ម្យ៉ាងទៀតលោកបានបញ្ជាក់បន្ថែមថា ចំពោះការបង្ក្រាបដំណាំកញ្ឆានេះ គឺដោយមានការចង្អុលបង្ហាញ នឹងដាក់បញ្ជាដូចភ្លៀងរលឹមពីសំណាក់ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ ជាពិសេសបញ្ហាគ្រឿងញៀន ហើយចាប់ពីចូលខែមករា ឆ្នាំ២០១៨ មកដល់ថ្ងៃទី២៥ ខែមករា កម្លាំងជំនាញបង្ក្រាបបានសរុបចំនួន ៣៣,៥៨៧ដើម អណ្តូងចំនួន១០៩អណ្តូង និង១០១ទីតាំងផងដែរ។ ក្នុងនោះអ្នកចូលរួមមានលោកអធិការរងទាំង០៤នាក់ លោកនាយ នាយរងផ្នែកទាំង០៨ លោកនាយ នាយរងប៉ុស្តិ៍ទាំង១២ និងមានការចូលរួមពីក្រុមប្រឹក្សាឃុំព្រះបាទជាន់ជុំ សរុបរួម៧១នាក់។ គួបញ្ជាក់ផងដែរថា នៅឆ្នាំ២០១៧កន្លងទៅនេះ កម្លាំងប៉ូលិសស្រុកគីរីវង់បានដក និងដុតដំណាំកញ្ឆាបានរាប់សែនដើម៕
ចែករំលែកព័តមាននេះ