ខេត្តកោះកុង ៖ យុវជន២នាក់ដែលបានដើរថតរូបនៅតំបន់មាត់សមុទ្រ ក្នុងស្រុកគីរីសាគរ ខេត្តកោះកុង ហើយត្រូវសមត្ថកិច្ចចាប់ឃុំខ្លួនកាលពីជាង៤ខែកន្លងមក ត្រូវបានសាលាដំបូងខេត្តកោះកុង បើកអង្គ សវនាការជម្រះក្តីហើយ នៅព្រឹកថ្ងៃទី២៥ ខែមករា ឆ្នាំ២០១៨នេះ ក្រោមការឃ្លាំមើលយ៉ាងយកចិត្ត ទុកដាក់ពីមេធាវីការពារក្តី និងអង្គការសង្គមស៊ីវីលមួយចំនួនដូចជា ឧត្តមស្នងការ អង្គការអាដហុក និងអង្គការលីកាដូ ព្រមទាំងប្រជាពលរដ្ឋជាច្រើននាក់ទៀត។
សូមរំលឹកថា យុវជនទាំង២រូបខាងលើ១.ឈ្មោះ ហ៊ុន វណ្ណៈ អាយុ៣៥ឆ្នាំ ២.ឈ្មោះ ឌឹម គុនឌី អាយុ២១ឆ្នាំ អតីតជាសកម្មជនរបស់អង្គការមាតាធម្មជាតិ ហើយត្រូវសមត្ថកិច្ចនគរបាលស្រុក ចាប់រួចបញ្ជូនមក ឃុំខ្លួនកាលពីថ្ងៃទី១២ ខែកញ្ញា ឆ្នាំ២០១៧ តាមពាក្យបណ្តឹងរបស់ក្រុមហ៊ុន អិលវ៉ាយភី គ្រូប បន្ទាប់ពីពួកគាត់ទាំង២បានទៅជិះទូកកម្សាន្តរួចបានថតរូប និងថតឃ្លីបវីដេអូរផ្តិតយករូបភាព ក្នុងចំណុចភូមិ.ឃុំព្រែកខ្សាច់ស្រុកគីរីសាគរ ក្បែរទីតាំងបូមខ្សាច់សេលីការរបស់ក្រុមហ៊ុន អិលវ៉ាយភី។
មន្ត្រីអង្គការអាដហុកប្រចាំខេត្តកោះកុងបញ្ជាក់ថា បន្ទាប់ពីការចាប់ខ្លួនយុវជនទាំង២រូបរួចបញ្ជូនទៅ តុលាការ ចៅក្រមបានចោទយុវជនទាំង២រូបពីបទ “ប៉ះពាល់ដល់សិទ្ធិខាងរូបភាពនៃបុគ្គល និងបទញុះញង់ឲ្យប្រព្រឹត្តបទឧក្រិដ្ឋជាអាថ៌”។ មន្ត្រីដដែលបញ្ជាក់ទៀតថា អង្គសវនាការត្រូវបានបញ្ចប់ នៅម៉ោង១២ និង៣០នាទីថ្ងៃត្រង់ ហើយលើកការប្រកាសសាលក្រមនៅថ្ងៃស្អែក ទី២៦ ខែមករា ឆ្នាំ២០១៨៕
ចែករំលែកព័តមាននេះ