ការរញ្ជួយដីដ៏ខ្លាំង២ដែលមួយមានកម្រិត៧រីស្ទ័រកើតឡើងនៅប្រទេសភូមា កាលពីយប់ថ្ងៃទី២៤ មីនា កន្លងមក ។ បាតុភូតរញ្ជួយដីនេះកើតឡើងនៅតំបន់ក្បែរព្រំដែនភូមាជាប់ជាមួយប្រទេសចិន ប្រទេសថៃ និងប្រទេសឡាវ ។ នេះបើតាមការឱ្យដឹងដោយមជ្ឈមណ្ឌលស្រាវជ្រាវផ្នែកភូមិសាស្ត្ររបស់អាមេរិក ។ មជ្ឈមណ្ឌលនេះបានឱ្យដឹងទៀតថា ការរញ្ជួយដ៏មានឥទ្ធិពលនេះកើតឡើងនៅភាគខាងកើតភូមាមានចម្ងាយ៥៥ម៉ាយ ប្រហែល៨៩គីឡូម៉ែត្រ ភាគខាងជើងខេត្តឈៀងរ៉ៃ ប្រទេសថៃ ។
គេហទំព័រ MCOT របស់ថៃផ្សាយជាភាសាអង់គ្លេសឱ្យដឹងថា មនុស្សម្នាក់បានស្លាប់បាត់បង់ជីវិត ដោយសារដំបូលអគារធ្លាក់លើនៅក្នុងខេត្តឈៀងរ៉ៃ ។ គេហទំព័រនេះផ្សាយទៀតថា ការរញ្ជួយដីនៅភូមានេះញ័រង្គើដល់ទីក្រុងបាងកក រាជធានីរបស់ថៃ ដែលមានចម្ងាយប្រហែល៧៧២គីឡូម៉ែត្រ ភាគខាងត្បូងចំណុចកណ្តាលនៃការរញ្ជួយដីនោះ ។
មជ្ឈមណ្ឌលស្រាវជ្រាវភូមិសាស្ត្រអាេមរិកនិយាយថា ការរញ្ជួយដីនេះកើតឡើងជម្រៅ១០គីឡូម៉ែត្រក្រោមដី ។
ទោះបីជាបែបណា មជ្ឈមណ្ឌលព្រមានពីរលកស៊ូណាមីប៉ាស៊ីហ្វិកនិយាយថា ការរញ្ជួយដីនៅប្រទេសភូមាមិនទាន់ឈានដល់ការព្រមានពីរលកយក្សស៊ូណាមីនៅឡើយទេ ។ ជាមួយគ្នានេះ ទីភ្នាក់ងារព័ត៌មានចិនស៊ីនហួរាយការណ៍ឱ្យដឹងថា ការរញ្ជួយដីនេះបង្កឱ្យបាក់ដី និងដួលរលំអគារជាច្រើន និងបណ្តាលឱ្យស្លាប់មនុស្ស២៥នាក់ ។
តាមនាយកដ្ឋានឧតុនិយមភូមាថា ការរញ្ជួយដីកើតឡើងនៅតំបន់ Loimwe របស់ភូមានាវេលាម៉ោង៨និង២៩នាទីយប់ ម៉ោងក្នុងស្រុក ជម្រៅ១០គីឡូម៉ែត្រ នៅតាមបណ្តោយព្រំដែនរបស់ភូមាជាប់ជាមួយប្រទេសថៃ និងប្រទេសឡាវតំបន់ត្រីកោណមាសមានចម្ងាយប្រហែល៨៧គីឡូម៉ែត្រ ពីខេត្តឈៀងរ៉ៃភាគខាងជើង
ថៃ ។ រយៈពេលប្រហែល២ម៉ោងក្រោយមានការរញ្ជួយដីមួយទៀតកម្រិត៥,៤រីស្ទ័រ វាយប្រហារតំបន់នោះទៀត ។
តាមប្រភពព័ត៌មានពីប្រទេសភូមាថា ការរញ្ជួយដីដ៏ខ្លាំងនេះប៉ះពាល់ដល់តំបន់ជាច្រើនរបស់ភូមា ។
យោងតាមសាក្សីទាំងឡាយថា ការរញ្ជួយដីទាំងនេះធ្វើឱ្យរង្គើរហូតដល់ក្រុងហាណូយ រដ្ឋធានីវៀតណាម ដោយនៅទីនោះមនុស្សទាំងឡាយត្រូវជម្លៀសចេញពីអគារខ្ពស់ៗ ៕
ចែករំលែកព័តមាននេះ