រាជធានីភ្នំពេញ ៖ តារាភាពយន្តកញ្ញានី មុន្នីនាថ ត្រៀមនឹងលាតត្រដាងការណ៍ពិតជាមួយអតីតគូដណ្តឹងលោកអ៊ឹង សូឡាង បន្ទាប់រឿងក្តីបញ្ចប់ ។
ខណៈពេលរឿងក្តីនៅក្នុងដៃតុលាការនៅ ឡើយ នី មុន្នីនាថ បកស្រាយលម្អិតណាមួយពាក់ព័ន្ធទៅនឹងពាក្យបណ្តឹងរបស់លោកអ៊ឹង សូឡាង ពីបទនាងបោកប្រាស់នោះឡើយ។ មុនីនាថបានប្រគល់កិច្ចការទាំងស្រុងឲ្យទៅមេធាវីរបស់នាងជាអ្នកចាត់ចែង ។ នាងរំពឹងទុកថា រឿងក្តីមួយនេះនាងនឹងទទួលបានជោគជ័យពីអតីតគូដណ្តឹងលោកអ៊ឹង សូឡាង ។
នី មុន្នីនាថ បានស្នើសុំដល់សារព័ត៌មាននៅក្នុងស្រុកនានា កុំឲ្យចុះផ្សាយអ្វីដែលខុសពីការណ៍ពិត ហើយមិនបានសួរនាងដោយផ្ទាល់ ក្នុងពេលដែលនាងត្រៀមខ្លួនរួចជាស្រេចដើម្បីឆ្លើយតប ក្រោយបញ្ចប់រឿងក្តី ។
នី មុន្នីនាថ កាលពីពេល ថ្មីៗកន្លងមកនិយាយថានាងនឹងលាតត្រដាងការណ៍ពិតពាក់ព័ន្ធជាមួយនឹងលោកអ៊ឹង សូឡាង ក្រោយពេលដំណើរការក្តីរបស់នាងរួចរាល់ ដោយសារតែពេលនេះមេធាវីរបស់នាងកំពុងតែចាត់ចែង ។
ពាក់ព័ន្ធទៅនឹងពាក្យបណ្តឹងនេះដែរ ប្រភពក្រៅផ្លូវការមួយអះអាងប្រាប់សារព័ត៌មានថា អតីតគូដណ្តឹងនាងនីមុន្នីនាថ លោកអ៊ឹង សូឡាង បានមកដល់ប្រទេសកម្ពុជាហើយ ដើម្បីតតាំងជាមួយនាង ខណៈពេលដែលរឿងក្តីមួយនេះកាន់តែអូសបន្លាយយូរ ។
អតីតគូដណ្តឹងតារាសម្តែងនាងនី មុន្នីនាថ ដែលជាអាណិកជនអាមេរិកលោកអ៊ឹង សូឡាង បានដាក់ពាក្យបណ្តឹងទាមទារឱ្យនាងសងជំងឺចិត្តមកឱ្យខ្លួនជាង១០ម៉ឺនដុល្លារ បន្ទាប់ពីអ្នកទាំងពីរកាត់ផ្តាច់ចំណងស្នេហ៍ ។ លោកអ៊ឹង សូឡាង ចាត់ទុកនី មុន្នីនាថ ថាបោកប្រាស់ខ្លួនក្នុងពេលនៅស្និទ្ធស្នាលជាមួយគ្នា ដោយលោកបានទិញរបស់របរមានតម្លៃមួយចំនួនឱ្យនាង តែដល់ពេលធ្លាក់ទិដ្ឋាការឲ្យនាងទៅនៅអាមេរិកជាមួយគ្នានោះ ត្រូវនាងបដិសេធទៅវិញ ។
យោងតាមពាក្យបណ្តឹងរបស់លោកអ៊ឹង សូឡាង បញ្ជាក់ថា លោកបានស្នើសុំតុលាការបង្គាប់ឱ្យនី មុន្នីនាថ សងប្រាក់ចំនួន៧ម៉ឺនដុល្លារ និងប្រាក់សងជំងឺចិត្តមកលោកចំនួន៥ម៉ឺនដុល្លារទៀត ។
ពាក់ព័ន្ធពាក្យបណ្តឹងនេះដែរ ម្តាយរបស់នី មុន្នីនាថ ធ្លាប់បដិសេធថា កូនស្រីគាត់មិនបានបោកប្រាស់គូដណ្ដឹងយកលុយទិញផ្ទះ ឡាន ដី មាសពេជ្រ និងគ្រឿងអលង្ការទេ ៕
ចែករំលែកព័តមាននេះ