រាជធានីភ្នំពេញ ៖ នៅថ្ងៃទី១ កុម្ភៈ ឆ្នាំ២០១៨ខាងមុខនេះ គណៈកម្មាធិការជាតិអូឡាំពិកកម្ពុជា(NOCC) នឹងរៀបចំធ្វើមហាសន្និបាតបញ្ចប់អាណត្តិទី៦បន្តអាណត្តិទី៧ (២០១៨-២០២២)របស់ខ្លួនជាបន្តទៀត ហើយមន្ត្រីជាន់ខ្ពស់របស់NOCCចាត់ទុកអាណត្តិថ្មីនេះ ជាអាណត្តិយុទ្ធសាស្ត្រដើម្បីត្រៀមខ្លួនធ្វើជាម្ចាស់ផ្ទះប្រកួតកីឡាស៊ីហ្គេមលើកទី៣២ឆ្នាំ២០២៣។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា អាណត្តិថ្មីរបស់គណៈកម្មាធិការជាតិអូឡាំពិកកម្ពុជា មានលក្ខណៈពិសេសបំផុត ព្រោះការងារស្ទើរតែទាំងអស់ធ្វើឡើងសម្រាប់រៀបចំការប្រកួតកីឡាស៊ីហ្គេមលើកទី៣២ឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ ។
គណៈកម្មាធិការជាតិអូឡាំពិកកម្ពុជាដែលមានលោកបណ្ឌិត ថោង ខុន ជាប្រធាន បានដាក់ចេញនូវផែនការយុទ្ធសាស្ត្រសំខាន់២សម្រាប់ប្រកាសចេញនៅក្នុងអង្គមហាសន្និបាត គឺទី១សេចក្ដីប្រកាសសកម្មភាពមុនការប្រកួតកីឡាស៊ីហ្គេម និងទី២សេចក្ដីប្រកាសពីការប្ដេជ្ញាចិត្តឱ្យសហព័ន្ធនីមួយៗសម្រេចឱ្យបាននូវការដណ្ដើមមេដាយស៊ីហ្គេមឆ្នាំ២០២៣ ។ លោកបញ្ជាក់ថាកាលណាយើងបានដាក់ចេញនូវចំនួនមេដាយរួចហើយ សហព័ន្ធកីឡាជាតិ គណៈកម្មាធិការជាតិអូឡាំពិកកម្ពុជា ក៏ដូចជាក្រសួងអប់រំ យុវជននិងកីឡា ត្រូវប្រមូលផ្គុំកម្លាំងគ្នាធ្វើឱ្យសម្រេចនូវសន្ទុះមេដាយតាមការកំណត់ ។
លោកបានឱ្យដឹងថា មហាសន្និបាតបញ្ចប់អាណត្តិថ្មីនេះជាមហាសន្និបាតដ៏ពិសេសនិងជាចម្បងរៀបចំឱ្យមានដំណើរសកម្មភាពឆ្ពោះទៅរកការប្រកួតកីឡាស៊ីហ្គេមឆ្នាំ២០២៣ដោយរលូន ។ មហាសន្និបាតនេះនឹងធ្វើការបូកសរុបនូវបញ្ហាក៏ដូចជារបាយការណ៍មួយចំនួន និងផ្ដោតការយកចិត្តទុកដាក់លើបញ្ហាប្រឈមវឌ្ឍនភាពរបស់សហព័ន្ធកីឡាជាតិ។ នេះជាការលើកឡើងរបស់លោកបណ្ឌិតថោង ខុន នៅក្នុងការប្រជុំជាមួយសហព័ន្ធកីឡាជាតិនាពេលកន្លងមកមុនពេលធ្វើមហាសន្និបាត ។
ការប្រជុំនេះទៀតសោតដើម្បីបានស្ដាប់នូវផែនការយុទ្ធសាស្ត្រ និងការប្ដេជ្ញាចិត្តរបស់សហព័ន្ធនីមួយៗដើម្បីធ្វើជាយុទ្ធសាស្ត្រសម្រាប់ដាក់ចេញនៅពេលធ្វើមហាសន្និបាត ។ ទាំងអស់នេះជាដំណើរការយ៉ាងទៀងទាត់នូវរាល់សកម្មភាពរបស់សហព័ន្ធកីឡាជាតិ ដើម្បីលើកកម្ពស់វឌ្ឍនភាព សកម្មភាពទាំងអស់នោះ ដោយផ្អែកទៅលើសកម្មភាព៣ចម្បងគឺសកម្មភាពការអភិវឌ្ឍធនធានមនុស្ស សកម្មភាពការអភិវឌ្ឍបច្ចេកទេសក្នុងការហ្វឹកហាត់ និងសកម្មភាពនៃការគ្រប់គ្រងដឹកនាំដែលជាផែនការណ៍យុទ្ធសាស្ត្រររបស់សហព័ន្ធកីឡាជាតិ៕
ចែករំលែកព័តមាននេះ