រាជធានីភ្នំពេញ ៖ យោងតាមសេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា ដែលបានប្រកាសដល់ពាណិជ្ជករ និងធុរជនទាំងអស់ បានឲ្យដឹងថា ចាប់ពីថ្ងៃទី១ ខែមករា ឆ្នាំ២០១៨នេះតទៅ…
រាជធានីភ្នំពេញ ៖ យោងតាមសេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា ដែលបានប្រកាសដល់ពាណិជ្ជករ និងធុរជនទាំងអស់ បានឲ្យដឹងថា ចាប់ពីថ្ងៃទី១ ខែមករា ឆ្នាំ២០១៨នេះតទៅ អគ្គនាយកដ្ឋានគយ និងរដ្ឋាករ បានសម្រេចកែសម្រួលអត្រាពន្ធអាករលើមុខទំនិញមួយចំនួន ក្នុងនោះរថយន្តប្រភេទគ្រួសារ ក៏ត្រូវបានដំឡើងពី៦៥ដល់៧០% ចំពោះរថយន្តដែលប្រើប្រាស់ចំហេះឥន្ធនៈសុទ្ធ និងមានទំហំស៊ីឡាំងចាប់ពី៣.០០០ CC ឡើងទៅ ។ សេចក្តីប្រកាសមួយទៀតដែលផ្ញើជូនពាណិជ្ជករ និងធុរជននាំចូលរថយន្តនោះ ក៏បានបង្ហាញពីការកើនឡើងពន្ធមួយប្រភេទទៀត រហូតដល់១១០%ផងដែរ ។
លោក សេង វឹង នាយកគ្រប់គ្រងផ្នែករថយន្តហ្វដ នៃក្រុមហ៊ុនអ អិម អេ ខេមបូឌា បានឲ្យដឹងថា ការដំឡើងពន្ធពី៦៥ទៅ៧០% ដែលប្រកាសកាលពីចុងឆ្នាំ២០១៧នេះ គ្មានអ្វីជាឧបសគ្គទេ ក៏ប៉ុន្តែមានពន្ធមួយប្រភេទទៀតដែលរាជរដ្ឋាភិបាលទើបតែបានប្រកាសដំឡើងដូចគ្នានោះបានឡើងរហូតដល់ពីជាង៨០ទៅ១១០% ។ ដូចនេះ នឹងធ្វើឲ្យប៉ះពាល់ដល់ទីផ្សាររថយន្តថ្មីៗនៅក្នុងប្រទេសកម្ពុជាទាំងមូល ព្រោះការដំឡើងនេះ មិនមែនដំឡើងតែរថយន្តហ្វដទាំងអស់ទេ តែដំឡើងដល់គ្រប់ប្រភេទរថយន្តថ្មីៗនៅក្នុងប្រទេសកម្ពុជាតែម្ដង ។
លោកបន្តថា ក្រោយពេលចេញសេចក្ដីប្រកាសថ្មីមួយទៀតដែលរាជរដ្ឋាភិបាលបានប្តូរការគណនា បានធ្វើឲ្យតម្លៃរថយន្តនៅក្នុងទីផ្សារប្រទេសកម្ពុជាត្រូវឡើងថ្លៃបន្ថែមទៀត ហើយការឡើងថ្លៃនេះ ក៏បានធ្វើឲ្យអតិថិជនរអ៊ូរទាំច្រើនណាស់ដែរ រហូតមានអតិថិជនស្ទើរតែលែងជឿជាក់មកលើក្រុមហ៊ុនទៀតផង ។
លោកនិយាយថា ៖« ពន្ធថ្មីដែលរាជរដ្ឋាភិបាលបានប្រកាសដំឡើង បានធ្វើឲ្យតម្លៃរថយន្តថ្មីៗត្រូវឡើងថ្លៃថែមទៀត ។ ជាក់ស្ដែង រថយន្តហ្វដត្រូវឡើងថ្លៃ១ម៉ឺនដុល្លារថែមទៀតក្នុង១គ្រឿង ។ ដូចនេះ វាជាបន្ទុក និងជាបញ្ហាធ្ងន់បំផុតសម្រាប់វិស័យរថយន្តថ្មីៗនៅក្នុងប្រទេសយើង » ។
លោកបន្ថែមថា រាជរដ្ឋាភិបាលគួរតែប្រាប់ដំណឹងមកក្រុមហ៊ុនលក់រថយន្តទាំងអស់ពីគោលការណ៍ដំឡើងពន្ធ យ៉ាងហោចណាស់ពី៣ទៅ៦ខែដែរ មុននឹងចេញសេចក្តីជូនដំណឹងឲ្យក្រុមហ៊ុនលក់រថយន្តចាប់ផ្ដើមអនុវត្តដើម្បីឲ្យក្រុមហ៊ុនទាំងអស់បានពិភាក្សា និងកំណត់ចំនួននាំចូល តែបើសិនជារាជរដ្ឋាភិបាលមិនជូនដំណឹងមុនទេ អាចនឹងធ្វើឲ្យប៉ះពាល់ដល់អាជីវកម្មក្រុមហ៊ុន ហើយក៏អាចឈានដល់ការបិទទ្វារក្រុមហ៊ុនផងដែរ ។
លោកថា ៖« មុននឹងយើងដាក់បញ្ជាទិញនាំចូលរថយន្ត យើងបានកំណត់តម្លៃជូនអតិថិជន ហើយអតិថិជនក៏ព្រមព្រៀងទិញក្នុងតម្លៃមួយផ្សេង តែនៅពេលដែលរាជរដ្ឋាភិបាលប្រកាសដំឡើងពន្ធ តម្លៃរថយន្តក៏ត្រូវឡើង ដូចនេះអតិថិជននឹងមិនទទួលយករថយន្តនោះវិញ ព្រោះតែតម្លៃខុសគ្នាខ្ពស់ពេក ។ ទាំងនេះ គឺជាហេតុធ្វើឲ្យក្រុមហ៊ុនដួលរលំបាន ប្រសិនជានាំចូលរថយន្តហើយមិនមានអ្នកទិញនោះ » ។
លោកបញ្ជាក់ថា ការសម្រេចដំឡើងពន្ធបន្ថែមរបស់រាជរដ្ឋាភិបាលកម្ពុជា លោកយល់ថា គឺជាការលើកទឹកចិត្ត និងជំរុញឲ្យមានការនាំចូលរថយន្តមួយទឹកកាន់តែច្រើនមកកាន់ទីផ្សារកម្ពុជា ព្រោះតម្លៃរថយន្តថ្មីកាន់តែខ្ពស់ ប្រជាពលរដ្ឋដែលមានលទ្ធភាពទិញរថយន្តថ្មី កាន់តែតិច ហើយត្រូវងាកមកទិញរថយន្តមួយទឹកប្រើប្រាស់វិញ ដោយសារតែតម្លៃរថយន្តមួយទឹកនៅទាប ។
លោកស្រី អ៊ុន កញ្ញា អ្នកគ្រប់គ្រងទូទៅនៃក្រុមហ៊ុន HGB Auto នាំចូល និងចែកចាយរថយន្តជាច្រើនប្រភេទមកកម្ពុជាដែរនោះ បានឲ្យដឹងថា ផលប៉ះពាល់ប្រាកដជាមានចំពោះការដំឡើងពន្ធរថយន្ត ។ ជាក់ស្ដែង នៅពេលរាជរដ្ឋាភិបាលដំឡើងពន្ធ រថយន្ដនឹងឡើងថ្លៃ ហើយពេលនោះ អតិថិជនប្រាកដជានឹងមិនទិញរថយន្តថ្មីទេ ហើយងាកទៅប្រើរថយន្តមួយទឹកវិញ ។ ដូចនេះ គោលការណ៍កាត់បន្ថយការប្រើប្រាស់រថយន្តមួយទឹកនៅកម្ពុជា នឹងគ្មានប្រសិទ្ធភាព ។
លោកស្រីនិយាយថា ៖« យើងទាំងអស់គ្នាចង់លើកទឹកចិត្តឲ្យពលរដ្ឋងាកមកប្រើប្រាស់រថយន្តថ្មីៗ ដើម្បីកាត់បន្ថយការបំពុលបរិស្ថាន ជាពិសេស ការពារសុវត្ថិភាពនៅតាមដងផ្លូវ ព្រោះរថយន្តជជុះភាគច្រើនអាចនឹងបង្កឲ្យមានបញ្ហាគ្រោះថ្នាក់នានា តួយ៉ាង ដូចជាមានករណីបុករះដោយសារហ្វ្រាំងមិនស៊ី រថយន្ដដាច់ចង្កូត និងបញ្ហាបច្ចេកទេសមួយចំនួនទៀត ក៏ប៉ុន្តែនៅពេលពន្ធឡើងថ្លៃ រថយន្ដថ្មីឡើងថ្លៃដែរ ពលរដ្ឋដែលមានលទ្ធភាពទិញប្រើប្រាស់មានតិចតួច អីចឹង ពួកគាត់នឹងងាកទៅទិញឡានមួយទឹកប្រើប្រាស់វិញ»។
លោកស្រីបញ្ជាក់ថា នៅឆ្នាំ២០១៨នេះ តម្រូវការរថយន្តថ្មីៗនឹងធ្លាក់ចុះ ហើយការលក់របស់ក្រុមហ៊ុននានា ក៏នឹងមិនកើនឡើងដូចកាលឆ្នាំមុនៗដែរ ។ ជាក់ស្ដែង ក្នុងក្រុមហ៊ុន HGB Auto កំណត់យកកំណើនត្រឹមតែ១០% ឬនៅថេរប៉ុណ្ណោះ មិនហ៊ានកំណត់យកខ្ពស់ដូចកាលពីមុនទៀតទេ ។
បើតាមអគ្គនាយកនៃអគ្គនាយកដ្ឋានដឹកជញ្ជូនផ្លូវគោកបានថ្លែងថា ការដំឡើងពន្ធទៅលើរថយន្ដថ្មីដែលមានទំហំស៊ីឡាំងចាប់ពី៣.០០០សេសេនោះ មិនធ្វើឲ្យប៉ះពាល់ដល់ទីផ្សាររថយន្ដថ្មីនោះទេ ព្រោះសុទ្ធតែជារថយន្ដប្រណីតដែលអ្នកមានជីវភាពធូរធារ ទើបមានលទ្ធភាពទិញ ។
លោក ពៅ ម៉ាលី អគ្គនាយកនៃអគ្គនាយកដ្ឋានដឹកជញ្ជូនផ្លូវគោករូបនេះបានថ្លែងកន្លងមកថា ៖« រថយន្ដដែលមានទំហំស៊ីឡាំងចាប់ពី៣ពាន់សេសេនោះ សុទ្ធតែប្រភេទរថយន្ដប្រភេទ៤៧០ឬ៥៧០ ដូច្នេះពលរដ្ឋសមញ្ញ គាត់មិនទិញជិះទេ ហើយការដំឡើងពន្ធនេះថែមទាំងកើនដល់ចំណូលថវិកាជាតិទៀត »។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានថ្លែងកាលពីពេលកន្លងទៅថា គោលការណ៍រាជរដ្ឋាភិបាល គឺកាត់បន្ថយពន្ធពីអ្នកក្រ ហើយដំឡើងពន្ធពីអ្នកមាន។ ក្នុងន័យនេះចង់និយាយថា អ្នកមានទ្រព្យធនច្រើននឹងត្រូវបង់ពន្ធកាន់តែច្រើនចូលរដ្ឋ ហើយអ្នកដែលមិនសូវមានទ្រព្យធន នឹងបង់ពន្ធចូលរដ្ឋតិច ទៅតាមធនធាន ។ ដូចនេះហើយទើបចំណូលមួយផ្នែកពីអ្នកក្រថយចុះ ប៉ុន្តែចំណូលពីអ្នកមានកើនឡើងវិញ ។
យោងតាមរបាយការណ៍របស់ក្រសួងសាធារណៈការនិងដឹកជញ្ជូន បង្ហាញថា គិតចាប់ពីឆ្នាំ១៩៩០ ដល់ខែកញ្ញា ឆ្នាំ២០១៧ មានយានយន្ត និងទោចក្រយានយន្តចុះបញ្ជីនៅក្រសួង ស្មើជាង៤លានគ្រឿង ក្នុងនោះរថយន្តធុនស្រាលជាង៣៧ម៉ឺនគ្រឿង ស្មើ៩,៣%, រថយន្តធុនធ្ងន់ជាង២១ម៉ឺនគ្រឿង ស្មើ៥,៤% និងទោចក្រយានយន្តជាង៣,៤លានគ្រឿង ស្មើ៨៥,៣% ៕
ចែករំលែកព័តមាននេះ