ខេត្តកណ្ដាល ៖ នគរបានព្រហ្មទណ្ឌស្រុកអង្គស្នួលសហការជាមួយកម្លាំងនគរបាលព្រហ្មទណ្ឌកម្រិតធ្ងន់នៃស្នងការនគរបាលខេត្តកណ្ដាល បានបំបែកសំណុំរឿងឃាតកម្មចាក់សម្លាប់ភ្នាក់ងារកាសែតសម្លេងប្រជាជនហើយ ។ តាមរយៈការស្រាវជ្រាវបានឈានដល់ការចាប់ខ្លួនស្ត្រីជាឃាតករដៃឆៅម្នាក់ ហើយមិនតែប៉ុណ្ណោះជាឃាតករត្រូវជាស្រីស្នេហ៍របស់ជនរងគ្រោះប្រាកដមែន ។
ការបំបែកសំណុំរឿងខាងលើនោះ ក្រោយពីការកើតមានអំពើឃាតកម្មលើបុរសជាអ្នកកាសែតកាលពី៤ថ្ងៃមុន ហើយឃាតករត្រូវបាននគរបាលចាប់ខ្លួនបានកាលពីវេលាម៉ោង៦ល្ងាច ថ្ងៃទី២៤ ខែមករានេះ នៅចំណុចផ្ទះជួលស្ថិតនៅក្នុងភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ ។
ស្ត្រីឃាតករនោះឈ្មោះ ផេង ណាន អាយុ៣០ឆ្នាំ ស្នាក់នៅផ្ទះជួលក្នុងភូមិព្រៃបឹង សង្កាត់កន្ទោក ធ្លាប់ជាកូនចៅនៅហាងម៉ាស្សារបស់ជនរងគ្រោះផង និងជាស្រីស្នេហ៍របស់គាត់ផងដែរ ។ ចំណែកបុរសរងគ្រោះដល់ស្លាប់បាត់បង់ជីវិតឈ្មោះ នួន សុភាព អាយុ៥៨ឆ្នាំ ជនជាតិខ្មែរ មុខរបរបើកហាងកោសជប់ និងម៉ាស្សាផង និងជាអ្នកសារព័ត៌មានសម្លេងប្រជាជន ហើយក៏ជាមន្ត្រីយោធានៅអង្គភាពទ័ព ពិសេសឆ័ត្រយោងលេខ៩១១ផងដែរ ដែលមានទីលំនៅក្នុងភូមិស្រែអំពិល សង្កាត់ស្នោរ ខណ្ឌពោធិ៍សែនជ័យ ។
ជនរងគ្រោះត្រូវបានស្រីស្នេហ៍ចាក់ប្រហារចំនួន១៧កាំបិត ចំត្រង់ពោះ ចង្អុលដៃស្ដាំ ខ្នងដៃខាងឆ្វេង បាតដៃខាងឆ្វេង និងភ្លៅស្ដាំ ។ តាមយុវជនម្នាក់ដែលជាកូនប្រុសគាត់បានអះអាងថា បុរសរងគ្រោះជាឪពុកបាត់បង់ខ្សែកប្លាទីន១ខ្សែ ទម្ងន់២តម្លឹង ចិញ្ចៀនត្រាមាស១វង់ ទម្ងន់១ម្លឹង លុយចំនួន១,២០០ដុល្លារ និងម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ ដែលសរុបក្នុងការបាត់បង់នេះមានចំនួនប្រហែលជាង៧ពាន់ដុល្លារ ។
នគរបាលបានឲ្យដឹងថា ក្រោយការចាប់ខ្លួននាំទៅធ្វើការសាកសួរស្ត្រីដែលជាជនសង្ស័យបានសារភាពថា ខ្លួនពិតជាបានចាក់សម្លាប់បុរសរងគ្រោះមែន ដើម្បីប្លន់យកទ្រព្យសម្បត្តិខាងលើ ព្រោះប្ដីនាងជាប់ពន្ធនាគារគ្មានអ្នករកស៊ីចិញ្ចឹម ហើយនាងជំពាក់លុយគេច្រើនណាស់គ្មានលទ្ធភាពសងគេ ក៏បានបែកគំនិតប្លន់ ហើយខណៈពេលដែលបុរសនោះនាំនាងទៅដែកផ្ទះសំណាក់ខាងលើ នាងក៏បានចាក់សម្លាប់ប្លន់តែម្ដង ។
នគរបាលបាននាំឃាតករទៅកន្លែងលក់ម៉ូតូនៅជិតសាលាខណ្ឌព្រែកព្នៅ រាជធានីភ្នំពេញ ថាលក់ក្នុងតម្លៃ១៤៦០ដុល្លារ ហើយក្រោយមកអ្នកទិញបានលក់បន្តទៅទៀត នៅក្នុងខេត្តកំពង់ចាមលក់ក្នុងតម្លៃ១៧៥០ដុល្លារ ។ ពេលកម្លាំងចុះទៅដល់ស្ត្រីអ្នកទិញម៉ូតូចោរបានលាក់លៀម ក៏ត្រូវបាននគរបាលចាប់ខ្លួននាំយកទៅកាន់អធិការដ្ឋាននគរបាលស្រុកអង្គស្នួលរង់ចាំការចាត់ការតាមច្បាប់ ៕
https://www.youtube.com/watch?v=JbWvPY43htA
ចែករំលែកព័តមាននេះ