រាជធានីភ្នំពេញ ៖ រថយន្តឡិចស៊ីសមួយគ្រឿងបើកបបរបំពានភ្លើងស្តុប បានជ្រុលទៅបុកនឹងម៉ូតូហុងដាឌ្រីមមួយគ្រឿង ដែលកំពុងតែជិះក្នុងទិសដៅខ្វែងគ្នា បណ្ដាលឲ្យរងការខូចខាតតិចតួច តែសំណាងល្អមិនមានគ្រោះថ្នាក់ដល់អ្នកមនុស្សនោះទេ ហេតុការណ៍នេះបានកើតឡើង នៅវេលាម៉ោង១១និង៣០នាទីយប់ ថ្ងៃទី២៤ ខែមករា ឆ្នាំ២០១៨ ចំណុចផ្លូវ១៩៩ កែងនឹងម៉ៅសេងទុង សង្កាត់ទំនប់ទឹក ខណ្ឌចំការមន ។
តាមប្រភព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់មិនដឹងថាគោលបំណងទៅណានោះទេ គឺបានជិះម៉ូតូហុងដាឌ្រីម ស៊េរី២០១៥ ពណ៌ខ្មៅពាក់ស្លាកលេខ បាត់ដំបង ១A-០២៧០ ធ្វើដំណើរតាមផ្លូវ១៩៩ ទិសដៅពីកើតទៅលិច ខណៈមកដល់ចំណុចកើតហេតុ ដែលជាផ្លូវបំបែកជាបួន ព្រមទាំងមានភ្លើងស្តុបផងនោះ ក៏ស្រាប់តែមានប្តីប្រពន្ធពីរនាក់ មិនដឹងថាប្រញាប់ទៅណានោះទេ គឺបានបើករថយន្តម៉ាកឡិចស៊ីស RX៣៣០ ពណ៌ស ពាក់ស្លាកលេខ ភ្នំពេញ ២AN-៣០៩៧ ធ្វើដំណើរតាមផ្លូវម៉ៅសេងទុង ក្នុងទិសដៅពីជើងទៅត្បូង ក្នុងល្បឿនលឿន ហើយបំពានភ្លើងស្តុប ផងនោះបានជ្រុលទៅបុកនឹងម៉ូតូហុងដាឌ្រីមចំពីមុខពេញទំហឹង បណ្ដាលឲ្យអ្នកបើកម៉ូតូរងរបួសរលាត់ដៃរលាត់ជើងតិចតួច ចំណែកម៉ូតូរងការខូចខាតបែកក្បាំងចំហៀងខាងស្តាំ ។ ដោយឡែកខាងរថយន្តវិញរងការខូចខាតក្រពិតកាងខាងមុខចំហៀងខាងឆ្វេង តែមិនមានគ្រោះថ្នាក់ដល់មនុស្សដែលជិះក្នុងរថយន្តនោះទេ ។
ក្រោយពេលកើតហេតុ សមត្ថកិច្ចមូលដ្ឋានបានចុះទៅដល់កន្លែងកើតហេតុ រួចហើយបានឲ្យភាគីទាំងសងខាងសម្របសម្រួលគ្នា ដោយខាងរថយន្តដឹងខ្លួនខុសបានសងសំណងទៅខាងម៉ូតូចំនួន១០ម៉ឺនរៀល ដើម្បីបញ្ចប់រឿង ៕
ចែករំលែកព័តមាននេះ