ខេត្តកណ្តាល ៖ គ្រូមន្តអាគមខាងស្រោចទឹកព្យាបាលរំដោះគ្រោះម្នាក់ ដែលគេឱ្យឈ្មោះថា«គ្រូបោ៉ក» បានត្រូវនគរបាលប៉ុស្តិ៍សំរោងធំឃាត់ខ្លួន តាមពាក្យបណ្តឹងរបស់ស្ត្រីម្នាក់ កាលពីវេលាម៉ោង៩និង៤០នាទីព្រឹកថ្ងៃទី២២ ខែមករា នៅនឹងផ្ទះស្ថិតក្នុងភូមិជ័យឧត្តម២ ឃុំសំរោងធំស្រុកកៀនស្វាយ…
ខេត្តកណ្តាល ៖ គ្រូមន្តអាគមខាងស្រោចទឹកព្យាបាលរំដោះគ្រោះម្នាក់ ដែលគេឱ្យឈ្មោះថា«គ្រូបោ៉ក» បានត្រូវនគរបាលប៉ុស្តិ៍សំរោងធំឃាត់ខ្លួន តាមពាក្យបណ្តឹងរបស់ស្ត្រីម្នាក់ កាលពីវេលាម៉ោង៩និង៤០នាទីព្រឹកថ្ងៃទី២២ ខែមករា នៅនឹងផ្ទះស្ថិតក្នុងភូមិជ័យឧត្តម២ ឃុំសំរោងធំស្រុកកៀនស្វាយ ពីបទរំលោភសេពសន្ថវៈក្នុងអាស្រមរបស់ខ្លួន ដែលអាស្រមនោះមើលទៅពិតជាគ្មានវាចានឹងថ្លែងឡើយ ។
បើតាមពាក្យបណ្តឹងនោះ គឺការរំលោភសេពសន្ថវៈបានកើតមានតាំងពីថ្ងៃទី២០ ខែសីហា ឆ្នាំ២០១៧ នៅនឹងផ្ទះគ្រូប៉ោកជាប់ចោទនេះ ។ គ្រូចេះមន្តអាគមស្រោចទឹកតែបែរជាស្រោចគល់ខ្លួនឯងនេះឈ្មោះ ឯក កុសល ហៅចយ ភេទប្រុស អាយុ៣៩ឆ្នាំ ដែលក្រៅពីស្រោចទឹករំដោះគ្រោះក៏មានមុខរបររត់រ៉ឺម៉កកង់បីដែរ មានប្រពន្ធអាយុ៣៦ឆ្នាំ ជាកម្មការិនីរោងចក្រ ។ ចំណែកស្ត្រីជាដើមបណ្តឹង អាយុ២៦ឆ្នាំ ជាកម្មការិនីរោងចក្រដែរ និងមានស្រុកកំណើតនៅស្រុកស្វាយជ្រំ ខេត្តស្វាយរៀង ។
នៅក្នុងពាក្យបណ្តឹងរបស់ស្ត្រីរងគ្រោះរៀបរាប់ថា ដោយរូបនាងមានជំងឺប្រចាំកាយក៏បានមកស្នាក់នៅផ្ទះគ្រូស្រោចទឹករូបនេះ ព្រោះឮល្បីថាពូកែ ។ ចំណែកគ្រូបោ៉កស្រោចទឹកក្នុងពេលទទួលការព្យាបាលបានប្រាប់នាងពេលចូលរូបក្នុងអាស្រមថា បារមីកូនរបស់ខ្លួនបានចូលមកសណ្ឋិត និងនិយាយថា បើមិនព្រមរួមរស់ជាមួយគ្រូស្រោចទឹកទេ គឺបារមីនោះនឹងកាច់បងប្អូនឪពុកម្តាយនាងឲ្យស្លាប់ទាំងអស់ មិនខាន ។
គ្រូចូលរូបនេះនិយាយបណ្តើរបំពានលើរូបកាយនាងបណ្តើរ តែដោយសារឮគ្រូនិយាយបែបនេះនាងក៏លែងហ៊ានមាត់ គឺសម្ងំឲ្យគ្រូនេះធ្វើសកម្មភាពរួមរ័កបានសម្រេច២ទៅ៣ដងក្នុង១យប់ជារៀងរហូតមក ។ លុះមកដល់ថ្ងៃទី២២ ខែមករា នាងសម្រេចចិត្តមកដាក់ពាក្យប្តឹងនៅប៉ុស្តិ៍នគរបាលសំរោងធំ ទើបមានការឃាត់ខ្លួនគ្រូប៉ោករូបនេះយកមកសាកសួរនៅវេលាម៉ោង៩និង៤០នាទីព្រឹកថ្ងៃដដែល និងបានកសាងសំណុំរឿងបញ្ជូនបន្តទៅអធិការដ្ឋាននគរបាលស្រុកកៀនស្វាយតាមនីតិវិធី ។
ដោយឡែក បើតាមស្ត្រីឈ្មោះ នុត ចន្ធី ជាប្រពន្ធគ្រូស្រោចទឹកនេះនិយាយថា គាត់ទៅធ្វើការមិនសូវបាននៅផ្ទះទេ ប៉ុន្តែបើនិយាយតាមការពិត ស្ត្រីរងគ្រោះមិនមែនមកព្យាបាលជំងឺទេ គឺគាត់ក៏ជាអ្នកចូលរូបដែរ និងបានវេចខោអាវមកស្នាក់នៅជាមួយប្តីគាត់ ។ ចំពោះរូបគាត់ យូរៗមកលេងផ្ទះម្តង ឃើញស្ត្រីរូបនេះ និងប្តីដេកនៅក្នុងមុងជាមួយគ្នា ឱបគ្នាលើសប្តីប្រពន្ធទៅទៀត ប៉ុន្តែរូបគាត់ជាប្រពន្ធមិនប្រកាន់ទេដោយសារនឹកឃើញថា ពួកគាត់ទាំង២នាក់ជាអ្នកចូលរូបដូចគ្នា ។ ចំណែកស្ត្រីរងគ្រោះក៏ធ្លាប់ប្រាប់រូបគាត់ដែរថា រូបគេគ្រាន់តែចូលរូបទេ មិនចង់បានប្តីគាត់ទេ ។
ស្ត្រីជាប្រពន្ធគ្រូប៉ោករូបនោះនិយាយទៀតថាតាមពិតស្ត្រីរូបនេះប្តឹងប្តីរបស់គាត់ គឺចង់បានលុយរហូតដល់ទៅ២.០០០ដុល្លារ តែគ្រួសារគាត់ក្រីក្រគ្មានលុយឯណាបង់ឲ្យទេ ។ សព្វថ្ងៃ គ្រួសារគាត់រស់នៅក្នុងខ្ទមតូចមួយរកព្រឹកខ្វះល្ងាចបានល្ងាចខ្វះព្រឹក ចុះបើចង់ប្តឹងពីបទរំលោភកាលពីដំបូងម៉េចក៏មិនប្តឹង ?
ទោះជាយ៉ាងណា ករណីនេះលោក វង សែ អធិការរងនគរបាលស្រុកកៀនស្វាយទទួលផែនយុត្តិធម៌ បានឲ្យដឹងថា លោកកំពុងប្រមូលផ្តុំឯកសារដើម្បីកសាងសំណុំរឿងបញ្ជូនគ្រូបោ៉កជនសង្ស័យបន្តទៅស្នងការដ្ឋានខេត្តនៅថ្ងៃទី២៤ ខែមករា ៕
ចែករំលែកព័តមាននេះ