រាជធានីភ្នំពេញ ៖ លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្ដារ និងអភិវឌ្ឍន៍វិស័យកសិកម្ម និងជនបទ បានស្នើឲ្យប្រជាកសិករជ្រើសរើសពូជស្រូវដែលមានហាងឆេងសម្រាប់នាំចេញទៅកាន់ទីផ្សារអន្តរជាតិ និងលក់បានថ្លៃមកដាំដុះនៅក្នុងប្រទេសកម្ពុជា…
រាជធានីភ្នំពេញ ៖ លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្ដារ និងអភិវឌ្ឍន៍វិស័យកសិកម្ម និងជនបទ បានស្នើឲ្យប្រជាកសិករជ្រើសរើសពូជស្រូវដែលមានហាងឆេងសម្រាប់នាំចេញទៅកាន់ទីផ្សារអន្តរជាតិ និងលក់បានថ្លៃមកដាំដុះនៅក្នុងប្រទេសកម្ពុជា ដើម្បីត្រៀមផ្គត់ផ្គង់ទៅកាន់ប្រទេសដែលមានតម្រូវការ ជាពិសេសប្រទេសជាដៃគូជាមួយកម្ពុជា ។
លោកបានថ្លែងបែបនេះនៅក្នុងឱកាសបើកវេទិកាស្រូវអង្ករកម្ពុជា លើកទី៦ នៅសណ្ឋាគារ ស៊ូហ្វីតែល ភ្នំពេញ ភូគីត្រា នាព្រឹកថ្ងៃទី២២ មករា កន្លងមក ។
លោកឧបនាយករដ្ឋមន្ត្រីបន្ដថា កសិករគួរតែងាកមកដាំដុះពូជស្រូវល្អៗ និងមានហាងឆេងសម្រាប់នាំចេញទៅកាន់ទីផ្សារអន្តរជាតិដែលកម្ពុជាកំពុងមានស្រាប់ ។ លោកថ្លែងថា ៖« បច្ចុប្បន្ន អង្ករក្រអូបកម្ពុជាបានជាប់ចំណាត់ថ្នាក់ជាអង្ករបាយឆ្ងាញ់ និងមានគុណភាពលំដាប់ពិភពលោក ។ ដូចនេះ អង្ករយើងក៏បានល្បីល្បាញទៅបណ្ដាប្រទេសជាច្រើនទៀត ហើយប្រទេសទាំងនោះ ក៏ចង់បានអង្ករពីយើងទៅផ្គត់ផ្គង់ក្នុងប្រទេសរបស់គេដែរ ។ កត្តាទាំងនេះ វាជាឱកាសដ៏ល្អសម្រាប់ប្រជាកសិករ ក្នុងការយកពូជស្រូវដែលល្អ និងមានគុណភាពមកដាំដុះ ផ្គត់ផ្គង់ និងនាំចេញ » ។
លោក សុខ ពុទ្ធីវុធ ប្រធានសហព័ន្ធស្រូវអង្ករកម្ពុជា បានលើកឡើងថា ក្នុងនាមជាសហព័ន្ធស្រូវអង្ករកម្ពុជា លោកធ្វើការយ៉ាងជិតស្និទ្ធជាមួយប្រជាកសិករ ហើយជំរុញនិងលើកទឹកចិត្តពួកគាត់ឲ្យងាកមកដាំដុះពូជស្រូវណាដែលមានទីផ្សារនិងតម្លៃខ្ពស់ ដើម្បីនាំចេញទៅកាន់ទីផ្សារអន្តរជាតិ ហើយជាពិសេសនោះ ក៏អាចលើកកម្ពស់កម្រិតជីវភាពប្រជាកសិករបានមួយកម្រិតផងដែរ ។
លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានមានប្រសាសន៍ផងដែរថា នៅឆ្នាំនេះ ប្រទេសចិនបានត្រៀមនាំអង្ករក្រអូបពីកម្ពុជាចំនួន៣០ម៉ឺនតោន ព្រោះប្រទេសចិនបានដាក់គោលការណ៍លែងផលិតអង្ករ ដែលយកប្រភពទឹកក្រោមដីមកប្រើដូចមុនទៀតហើយ ព្រោះគេខ្លាចប៉ះពាល់ដល់បរិស្ថានរបស់ប្រទេសគេ ។
ដូចនេះហើយចិនត្រូវងាកមករកអង្ករពីប្រទេសផ្សេងទៅផ្គត់ផ្គង់វិញ ក្នុងនោះកម្ពុជា ក៏ជាប្រទេសដៃគូមួយរបស់ចិនផងដែរ ។
លោកបន្តថា ថ្មីៗនេះកម្ពុជាក៏បានចុះអនុស្សរណៈយោគយល់គ្នាជាមួយវិទ្យាស្ថានស្រាវជ្រាវពូជស្រូវមួយនៅខេត្តយូណាន ប្រទេសចិន ដើម្បីពិចារណានាំអង្ករពីកម្ពុជាទៅចិនបន្ថែមទៀត ក្នុងបរិមាណ៣០ម៉ឺនតោនក្នុង១ឆ្នាំ ។
តំណាងសហគមន៍គ្រឹងលាវ ស្រុករលាប្អៀរ ខេត្តកំពង់ឆ្នាំង លោក គង់ វុទ្ធី បានឲ្យដឹងថា បញ្ហាប្រឈមសម្រាប់កសិករក្នុងការផលិតពូជស្រូវក្រអូបនោះ គឺកង្វះទឹកសម្រាប់ស្រោចស្រព ព្រោះស្រូវក្រអូបត្រូវការទឹកគ្រប់គ្រាន់ ខុសពីពូជស្រូវដែលកសិករដាំដុះសព្វថ្ងៃ ។ ដោយសារកត្តាទាំងនេះហើយ ទើបកសិករមួយចំនួននៅតែដាំដុះពូជស្រូវដែលសល់ពីដូនតា ជាប្រភេទអង្ករបាយរឹងបន្តទៀត ៕
ចែករំលែកព័តមាននេះ