ខេត្តកំពង់ឆ្នាំង ៖ ប្រជាពលរដ្ឋចំនួន៥នាក់ រស់នៅក្នុងឃុំសែប ស្រុកកំពង់ត្រឡាច នៅព្រឹកថ្ងៃទី២៣ ខែមករា ឆ្នាំ២០១៨ បានទទួលអំណោយលើកទឹកចិត្តពី លោកឧត្តមសេនីយ៍ត្រី ធន ធឿន មេបញ្ជាការតំបន់សឹករងកំពង់ឆ្នាំង បន្ទាប់ពីបានសហការណ៍ផ្តល់ព័ត៌មានចង្ហុលបង្ហាញផ្នូរសពរបស់កងទ័ពស្ម័គ្រចិត្តវៀតណាម ជូនដល់អង្គភាពកា៩០ ចំនួន៨សព កាលពីពេលកន្លងទៅ ។
លោកមេបញ្ជាការតំបន់សឹករងកំពង់ឆ្នាំងបានថ្លែងថា បើនិយាយតាមជំនឿអ្នកកាន់ព្រះពុទ្ធសាសនា ប្រជាពលរដ្ឋដែលជាអ្នកជីក និងលើកយកអដ្ឋិធាតុកងទ័ពវៀតណាមវិលទៅជួបជុំប្រពន្ធកូននៅក្នុងស្រុកវិញ គឺទទួលបានបុណ្យកុសលច្រើនណាស់ ។ លោកបានថ្លែងបន្តទៀតថា អដ្ឋិធាតុរបស់កងទ័ពវៀតណាមខាងនេះ គឺជាអ្នកបំពេញកាត្វកិច្ចអន្តរជាតិសុខចិត្តលះបង់ជីវិត សហការណ៍ជាមួយកងទ័ពរណសិរ្យសង្គ្រោះជាតិកម្ពុជា នៅក្នុងអំឡុងឆ្នាំ១៩៧៩ ដល់ឆ្នាំ១៩៩០ វាយពួកប្រល័យពូជសាសន៍ប៉ុលពត រំដោះទឹកដី និងរំដោះជីវិតប្រជាពលរដ្ឋកម្ពុជាជាង៣លាននាក់ឲ្យរស់រានមានជីវិតឡើងវិញ ដែលជារឿងពិតមិនអាចក្រឡៃបាននៅក្នុងប្រវត្តិសាស្ត្ររបស់ប្រទេសកម្ពុជា ។ ការសហការណ៍របស់ប្រជាពលរដ្ឋកម្ពុជាក្នុងការជួយស្វែងរកអដ្ឋិធាតុរបស់កងទ័ពស្មគ្រ័ចិត្តវៀតណាមធ្វើមាតុភូមិនិវត្តន៍ទៅកាន់មាតុភូមិវិញដើម្បីជួបជុំក្រុមគ្រួសារ គឺជាអំពើមនុស្សធម៌មួយដ៏ថ្លៃថ្លាមិនអាចកាត់ថ្លៃបាន ។
ក្នុងនាមមេបញ្ជាការតំបន់សឹករងកំពង់ឆ្នាំង តំណាងឲ្យ លោក ឈួរ ច័ន្ទឌឿន អភិបាលខេត្តកំពង់ឆ្នាំង និងតំណាយឲ្យ លោកវរៈសេនីយ៍ឯក ថាម ផាញ់ញឺង មេបញ្ជាការអង្គភាពកា៩០កងទ័ពប្រជាជនវៀតណាម លោកឧត្តមសេនីយ៍ ធន ធឿន សូមថ្លែងអំណរគុណយ៉ាងជ្រាវជ្រៅដល់ប្រជាពលរដ្ឋទាំង៥នាក់នៅក្នុងឃុំសែប ដែលបានសហការយ៉ាងជិតស្និតផ្តល់ព័ត៌មាន ដល់អង្គភាពកា៩០ បានរុករកឃើញអដ្ឋិធាតុកងទ័ពវៀតណាមចំនួន៥សពនៅក្នុងឃុំសែប ។ ដែលនៅក្នុងពិធីនេះ លោកឧត្តមសេនីយ៍ ធន ធឿន បានឧបត្ថម្ភថវិកាលើកទឹកចិត្តក្នុងម្នាក់ៗ២០ម៉ឺនរៀល ។
នៅក្នុងកម្មវិធីនេះ លោកវរៈសេនីយ៍ឯក ថាម ផាញ់ញឺង មេបញ្ជាការអង្គភាពកា៩០កងទ័ពប្រជាជនវៀតណាម ក៏បានឧបត្ថមកាដូនូវគ្រឿងឧបភោគបរិភោគ និងថវិការមួយចំនួន ដើម្បីលើកទឹកចិត្តចំពោះប្រជាពលរដ្ឋទាំង៥នាក់រស់នៅក្នុងឃុំសែបនេះផងដែរ ៕
ចែករំលែកព័តមាននេះ