ខេត្តប៉ៃលិន ៖ បន្ទាប់ពីអាជ្ញាធរស្រុកសាលាក្រៅ បានធ្វើសេចក្តីជូនដំណឹងដល់ម្ចាស់ដីឱ្យដកបង្គោលចេញពីផ្លូវសាធារណចំនួន៣លើកមិនស្តាប់ ទើបនៅវេលាព្រឹកថ្ងៃទី២៣ ខែមករា ឆ្នាំ២០១៨ បានចូលរួមអនុវត្តដកបង្គោលចំនួន៥ដើមដែលបានដាំប៉ះពាល់នៅលើផ្លូវ ។ តែម្ចាស់ដីបានអះអាងថា ពួកគេបោះដាំនៅលើដីរបស់ខ្លួនដើម្បីការពារកុំឱ្យធ្វើដំណើរចេះតែរំកិលទៅលើដីរបស់ខ្លួនទៀត ។ ការចុះដកបង្គោលនេះស្ថិតនៅក្នុងភូមិអូររអិល ឃុំស្ទឹងកាច់ ស្រុកសាលាក្រៅ ដែលដឹកនាំដោយលោក ឡូ លុយ អភិបាលរងស្រុកសាលាក្រៅហើយមានការចូលរួមពីការិល័យភូមិបាលស្រុក ក្រុមប្រឹក្សាឃុំស្ទឹងកាច់ មេភូមិអូររអិល សមត្តកិច្ចនគរបាលាស្រុក ប្រជាការពារភូមិ និងប្រជាពលរដ្ឋ សរុបទាំងអស់ចំនួន៣៣នាក់ ។
ប្រភពព័ត៌មានបានឱ្យដឹងថា ដោយឃើញមានម្ចាស់ដីម្នាក់ឈ្មោះ សេង ហាក់ ភេទប្រុស អាយុ៥២ឆ្នាំ រស់នៅក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន បានយកបង្គោលទៅបោះដាំនៅលើចំណីផ្លូវ ទើបប្រជាពលរដ្ឋដែលតែងតែធ្វើដំណើរតាមផ្លូវនោះបាននាំគ្នាប្តឹងឱ្យអាជ្ញាធរជួយសម្រួលលុះប្រាប់អស់រយៈពេល៣លើកមកហើយមិនព្រមធ្វើតាមក៏ចេញវិធានការក្នុងការដឹកនាំកងកម្លាំងសមត្ថកិច្ចចុះទៅដកផ្ទាល់តែម្តង ។
ប្រភពបន្តទៀតថា អាជ្ញាធររង់ចាំមើលការតវ៉ាពីសំណាក់ម្ចាស់ដីដែរតែអត់ឃើញមានអ្វីប្រែប្រួលនោះឡើយ ហើយបង្គោលស៊ីម៉ង់ដែលគាត់បានដាំនោះគឺនៅហួសពីចំណីផ្លូវពោលគឺដាក់ដាំនៅលើផ្លូវតែម្តង ៕
ចែករំលែកព័តមាននេះ