រាជធានីភ្នំពេញ ៖ បុរសជាអ្នករត់តាក់ស៊ីម្នាក់ បើករថយន្តដឹកភ្ញៀវងោកមួយផាំង ក៏រេចង្កូតបើកឡើងលើខឿនពុះចែកទ្រូងផ្លូវឆ្លងទៅផ្លូវម្ខាងទៀត ជ្រុលទៅបុកនឹងដើមក្រខុបមួយដើមបាក់ដាច់ចេញពីគល់ បង្កឲ្យមានការភ្ញាក់ផ្អើលឡើងកាលពីវេលាម៉ោង៣និង៣០នាទីទៀបភ្លឺថ្ងៃទី២៤ ខែមករានេះត្រង់ចំណុចខាងជើងស្ពានលេង៤ តាមបណ្តោយផ្លូវជាតិលេខ៦A ស្ថិតក្នុងភូមិបាក់ខែង សង្កាត់ព្រែកលាប ខណ្ឌជ្រោយចង្វារ ។
រថយន្តបង្ក ពណ៌ស ស្លាកលេខភ្នំពេញ ២Q-៥៧៨៨បើកបរដោយបុរសម្នាក់ មិនស្គាល់ឈ្មោះ វ័យ៣៥ឆ្នាំ ជាអ្នករត់តាក់ស៊ីឯកជន ។
សម្តីពីបុរសបើកររថយន្តបង្កខាងលើបានប្រាប់ឲ្យដឹងថា នៅមុនពេលកើតហេតុគាត់បានបើកបររថយន្តដឹកបុរសម្នាក់ដែលជាភ្ញៀវចេញមកពីភ្នំពេញឆ្ពោះទៅខេត្តព្រែវែង ក្នុងតម្លៃ១០ម៉ឺនរៀល ដោយធ្វើដំណើរតាមបណ្តោយផ្លូវជាតិលេខ៦A ពីត្បូងទៅជើង និងក្នុងល្បឿនយ៉ាងលឿន លុះមកដល់ចំណុចកើតហេតុដែលជាផ្លូវកោង ដោយសារតែគាត់ងងុយដេកខ្លាំងពេកក៏ងោកមួយផាំង បណ្តាលឲ្យរថយន្តរេចង្កូតទៅខាងឆ្វេងឡើងលើខឿនសួនច្បារ ពុះចែកទ្រូងផ្លូវ តែរថយន្តបង្កនៅមិនទាន់អស់ល្បឿនក៏ឆ្លងទៅផ្លូវម្ខាងទៀតទៅបុក និងដើមក្រខុបមួយដើម ដែលដាំនៅលើខឿនតាមចិញ្ចើមផ្លូវខាងមុខផ្ទះប្រជាពលរដ្ឋ បណ្តាលឲ្យបាក់ដាច់ចេញពីគល់និងបាក់បែកផើងផ្កាមួយចំនួនទៀត ។
ចំណែកឯរថយន្តបង្ករងការខូចខាតក្រពឹតទ្វារខាងមុខនិងបាច់កង់ក្រោយចំហៀងស្តាំ តែសំណាងល្អដែលមិនបង្កឲ្យមានអ្នករងរបួស ភ្លាមៗនោះបុរសដែលជាភ្ញៀវរួមដំណើរលើរថយន្តបានឡើងជិះរថយន្តមួយគ្រឿងទៀត ជិះចេញទៅបាត់បន្សល់ទុកតែម្ចាស់រថយន្តបង្កនៅនឹងកន្លែងកើតហេតុ ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុ ហើយបានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងយករថយន្តបង្ក និងអ្នកបើកបររថយន្តទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញ ដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ