រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា ចំណតរថយន្តក្រោមដីចំនួន៤កន្លែងផ្សេងៗគ្នា ស្ថិតនៅតាមបណ្តោយខាងក្រោមសួនច្បារ លាតសន្ធឹងចាប់ពីមុខសក្យមុនីចេតីយ៍រហូតជិតដល់មាត់ទន្លេផ្សារចាស់ ក្នុងសង្កាត់វត្តភ្នំ ខណ្ឌដូនពេញ ក្នុងនោះទីតាំងទី១ និងទី២បានសាងសង់រួចរាល់គ្រោងនឹងសម្ពោធដាក់ឲ្យប្រើប្រាស់ក្នុងពេលឆាប់ៗនេះ។…
រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា ចំណតរថយន្តក្រោមដីចំនួន៤កន្លែងផ្សេងៗគ្នា ស្ថិតនៅតាមបណ្តោយខាងក្រោមសួនច្បារ លាតសន្ធឹងចាប់ពីមុខសក្យមុនីចេតីយ៍រហូតជិតដល់មាត់ទន្លេផ្សារចាស់ ក្នុងសង្កាត់វត្តភ្នំ ខណ្ឌដូនពេញ ក្នុងនោះទីតាំងទី១ និងទី២បានសាងសង់រួចរាល់គ្រោងនឹងសម្ពោធដាក់ឲ្យប្រើប្រាស់ក្នុងពេលឆាប់ៗនេះ។ ចំណែកទីតាំងទី៣ស្ថិតនៅខាងក្រោមអតីតទីលានប្រជាធិបតេយ្យបានចាប់ផ្តើមហ៊ុំព័ទ្ធការរដ្ឋាន ដើម្បីដំណើរការសាងសង់ចំណតក្រោមដីចាប់ពីពេលនេះតទៅ និងទីតាំងទី៤ ស្ថិតនៅខាងក្រោមផ្សាររាត្រី បាន និងកំពុងត្រៀមរៀបចំជាបន្តបន្ទាប់គ្នា ដែលចំណតរថយន្តក្រោមដីទាំងនោះនឹងចេញជារូបរាងបន្តបន្ទាប់គ្នាក្នុងពេលឆាប់ៗខាងមុខនេះ។ មន្ត្រីរដ្ឋបាលរាជធានីភ្នំពេញបានឲ្យដឹងថា រដ្ឋបាលរាជធានីភ្នំពេញ បានចាប់យកក្រុមហ៊ុនឯកជនចំនួនពីរបន្ថែមទៀត ដើម្បីសហការក្នុងផែនការសិក្សា និងរៀបចំស្ថាបនាចំណតរថយន្តក្រោមដីចំនួនពីរទីតាំង បន្ទាប់ពីក្រុមហ៊ុនឯកជនចំនួនពីរផ្សេងទៀត បានស្ថាបនាចំនួនពីរទីតាំងដូចគ្នា។ មន្ត្រីដដែលបានបញ្ជាក់ថា ទីតាំងចំណតរថយន្តក្រោមដីទាំង៤ទីតាំងនោះ ស្ថិតនៅចន្លោះផ្លូវភ្លោះ ផ្លូវលេខ១០៦ និងផ្លូវលេខ១០៨ ក្នុងសង្កាត់វត្តភ្នំ ខណ្ឌដូនពេញ ដែលរដ្ឋាភិបាលប្រគល់សិទ្ធទៅឲ្យក្រុមហ៊ុនចំនួន៤ធ្វើការវិនិយោគតាមរួបភាព B.O.T ក្នុងគោលបំណង រក្សាសណ្តាប់ធ្នាប់ និងរបៀបរៀបរយសាធារណៈ ជួយកាត់បន្ថយការកកស្ទះចរាចរណ៍បានច្រើនជាពិសេសនៅតំបន់នោះតែម្តង។
មន្ត្រីរដ្ឋបាលរាជធានីភ្នំពេញបានឲ្យដឹងទៀតថា ចំពោះចំណតនៅខាងក្រោមផ្សាររាត្រី មានប្លង់គោល និងបានឯកភាពគ្នាហើយ ប៉ុន្តែអាជ្ញាធរតម្រូវឲ្យក្រុមហ៊ុនសិក្សាបន្ថែមពីស្ថានភាពទីតាំងឲ្យបានច្បាស់លាស់ ដូចជាប្រពន្ធ័ទឹកភ្លើង និងប្រពន្ធ័លូដែលកប់នៅក្រោមដី និងត្រូវសិក្សាសោភ័ណភាពផ្នែកខាងលើឲ្យមានភាពទាក់ទាញ និងសិក្សាបន្ថែមនូវផលប៉ះពាល់ដោយគ្រោះធម្មជាតិ ដូចជាទឹកជំនន់ជាដើម ដើម្បីត្រៀមបង្ការទុកជាមុន។ មន្ត្រីរូបនោះ បានបញ្ជាក់ថា ចំណតរថយន្តក្រោមដីខាងក្រោមផ្សាររាត្រីនេះ ទំហំ ៩១៣៧,៤៧ម៉ែត្រការ៉េ និងមានកម្ពស់២ជាន់ ដែលអាចផ្ទុករថយន្តបានប្រមាណ៣០០គ្រឿង។ លោក មាន ចាន់យ៉ាដា អភិបាលរងរាជធានីភ្នំពេញ បានឲ្យកោះសន្តិភាពដឹងកាលពីពេលកន្លងមកថា ដោយសារបញ្ហាសណ្តាប់ធ្នាប់ និងការកកស្ទះចរាចរណ៍កាន់តែមានភាពស្មុគស្មាញ និងប្រឈមផងនោះ រដ្ឋបាលរាជធានីភ្នំពេញ ដោយមានកិច្ចសហប្រតិបត្តការពីវិស័យឯកជនបានជំរុញផែនការស្ថាបនាចំណតរថយន្តក្រោមដីឲ្យបានច្រើន ដើម្បីកាត់បន្ថយការកកស្ទះចរាចរណ៍ និងជួយសម្រួលដល់បញ្ហាសណ្តាប់ធ្នាប់សាធារណៈឲ្យមានភាពប្រសើរឡើង។ លោកបន្តថា ជាក់ស្តែងនៅចន្លោះផ្លូវភ្លោះ ផ្លូវលេខ១០៦ និងផ្លូវលេខ១០៨ រដ្ឋបាលរាជធានីភ្នំពេញគ្រោងស្ថាបនាចំណតរថយន្តក្រោមដីចំនួនពីរបន្ថែមទៀត គឺនៅខាងក្រោមសួនច្បារទីលានប្រជាធិបតេយ្យ និងមួយទៀតនៅខាងក្រោមផ្សាររាត្រីតែម្តង ។
លោក មាន ចាន់យ៉ាដា បានឲ្យដឹងទៀតថា ចំណតទី១ គឺជាចំណតរបស់ក្រុមហ៊ុន កាណាឌីយ៉ា ទី២.របស់ក្រុមហ៊ុន ធនាគារ វឌ្ឍនៈ ដែលក្រុមហ៊ុនពីរនេះ ស្ថាបនាចំណតរថយន្តក្រោមដីនៅក្រោមសួនច្បារក្បែគ្នា ទី៣. ក្រុមហ៊ុនស្ថាបនា ចំណតរថយន្តក្រោមដី ក្រោមសួនច្បារទីលានប្រជាធិបតេយ្យ និងទី៤. ក្រុមហ៊ុន អ៊ីឌីស៊ីយូតា ខេមបូឌា ភីធីអ៊ី អិលធីឌី EDISIJUTA(Cambodia)PTE.,Ltd បានទទួលការឯកភាពពីរាជរដ្ឋាភិបាលហើយ គឺស្ថាបនាចំណតរថយន្តក្រោមដី នៅខាងក្រោមផ្សារាត្រីតែម្តង។ លោក បន្តថា បន្ទាប់ពីធ្វើចំណតរួចនឹងត្រូវធ្វើសួនច្បារពីលើ ដើម្បីជួយលើកកម្ពស់សោភ័ណភាពរាជធានី ចំណែកចំណតរថយន្តក្រោមដី ក្រោមសួនច្បារទីលានប្រជាធិបតេយ្យនៅពេលស្ថាបនារួចក៏ត្រូវធ្វើសួនពីលើផងដែរ។ គួររំលឹកថា ទីលានប្រជាធិបតេយ្យត្រូវបានរដ្ឋបាលរាជធានីភ្នំពេញ ធ្វើការផ្លាស់ប្តូរពីទីតាំងលើសួនច្បារចន្លោះផ្លូវលេខ១០៦ និង១០៨ សង្កាត់វត្តភ្នំ ឬជាប់ស្ពាននាគមុខវត្តភ្នំ ឲ្យទៅទីតាំងថ្មី នៅមាត់ទន្លេខាងមុខឃ្លាំងសាំងគីឡូម៉ែត្រលេខ៦ឫស្សីកែវ កាលពីអំឡុងកុម្ភៈ ឆ្នាំ២០១៧ ដោយអាជ្ញាធរនេះ បានអះអាងថា ទីតាំងទីលានចាស់នោះត្រូវបានប្រជាពលរដ្ឋនៅតំបន់នោះស្នើសុំឲ្យធ្វើការផ្លាស់ប្តូរ ដោយសម្អាងថា រាល់ការតវ៉ានានាកន្លងមក មានការរំខានដល់ការរស់នៅ និងការប្រកបរបររកស៊ីផ្សេងៗរបស់ពួកគាត់ទើបអាជ្ញាធរមានការផ្លាស់ប្តូរបែបនេះ៕
ចែករំលែកព័តមាននេះ