ខេត្តបន្ទាយមានជ័យ ៖ «ប្រសិនបើបទល្មើសនៅតែកើនជាងតាមបណ្តាស្រុក-ក្រុង សូមលោកចុះចេញពីតំណែង» ។ នេះជាប្រសាសន៍របស់លោកឧត្តមសេនីយ៍ត្រីខេង ស៊ុម ស្នងការនគរបាលខេត្តបន្ទាយមានជ័យ ដែលបានថ្លែងនៅក្នុងអង្គប្រជុំប្រចាំសប្តាហ៍នាព្រឹកថ្ងៃទី៤ ធ្នូ កន្លងទៅនេះនៅសាលប្រជុំ«ក»របស់ស្នងការដ្ឋាននគរបាលខេត្តនៅចំពោះអស់លោក លោកស្រី ជាស្នងការរង លោកអធិការស្រុក-ក្រុង ទាំង៩ និងលោកមេបញ្ជាការវរសេនាតូចទាំង៤ដែលបានចូលរួម ហើយការព្រមាននេះសំដៅលើលោកអធិការក្រុងសិរីសោភ័ណ ។
លោកឧត្តមសេនីយ៍ត្រីខេង ស៊ុម ស្នងការនគរបាលខេត្ត មានប្រសាសន៍ថា ក្នុងសប្តាហ៍កន្លងមក បទល្មើសទូទាំងខេត្តពុំមានអ្វីគួរឱ្យកត់សម្គាល់នោះទេ ។ ប៉ុន្តែទន្ទឹមនឹងការលើកសរសើរដល់តាមបណ្តាអធិការដ្ឋាននគរបាលស្រុក-ក្រុង ក៏ដូចជាតាមបណ្តាអង្គភាពវរសេនាតូចនគរបាលការពារព្រំដែនគោកទាំង៤នោះ លោកឧត្តមសេនីយ៍ស្នងការ បានលើកឡើងពីបទល្មើសដែលកើតមានច្រើនជាងគេនៅក្នុងក្រុងសិរីសោភ័ណ សូម្បីតែលោកអភិបាលក្រុងសិរីសោភ័ណក៏ទទួលស្គាល់ដែរ ។ ដូច្នេះ លោកអធិការនគរបាលក្រុងសិរីសោភ័ណ គួរតែបង្កើនការយកចិត្តទុកដាក់បង្ការទប់ស្កាត់ និងបង្ក្រាបឱ្យខាងតែបានរាល់បទល្មើសដែលកើតមានក្នុងមូលដ្ឋានរបស់ខ្លួន ប្រសិនបើនៅតែកើនបទល្មើសតទៅទៀត សូមលោកអធិការចុះចេញពីតំណែង ទុកឱ្យជនល្មើសធ្វើអធិការជំនួសវិញ។ ចំពោះលោកប្រធានការិយាល័យបំភ័ន្តអក្ខរៈ នាយកដ្ឋានបំភ័ន្តអក្ខរៈ ក៏មានបំណងដកចេញពីតំណែងដែរ ដោយសារតែការមិនយកចិត្តទុកដាក់ក្នុងការងាររបស់ខ្លួន ពិសេសគឺការបញ្ជូនព័ត៌មានទៅគេហទំព័រ ។
ក្នុងទិសដៅបន្តទៅសប្តាហ៍ក្រោយ លោកឧត្តមសេនីយ៍ស្នងការ បានណែនាំនិងជំរុញដល់គ្រប់បណ្តាអង្គភាពចំណុះស្នងការដ្ឋានត្រូវបង្កើនការយកចិត្តទុកដាក់លើការងារជំនាញរបស់ខ្លួន ពិសេសការងារនគរបាលចរាចរ ត្រូវតែអនុវត្តការរឹតបន្តឹងច្បាប់ចរាចណ៍ ព្រោះមួយរយៈនេះមានបងប្អូនប្រជាពលរដ្ឋស្លាប់ និងរបួសច្រើនណាស់ ។ ម្យ៉ាងវិញទៀតត្រូវបាញ់ល្បឿននៅផ្លូវជាតិលេខ៦និងលេខ៥ យ៉ាងហោចណាស់ក៏អ្នកបើកបររថយន្តដឹងថា នគរបាលចរាចរបាញ់ល្បឿនក៏គាត់មានការប្រុងប្រយ័ត្ន និងបន្ថយល្បឿនដែលអាចបញ្ចៀសការគ្រោះថ្នាក់ផងដែរ ។
ចំពោះបញ្ហាអគ្គិភ័យ ត្រូវធ្វើការផ្សព្វផ្សាយដល់ប្រជាពលរដ្ឋឱ្យគាត់មានការប្រុងប្រយ័ត្នក្នុងការបង្ការទប់ស្កាត់នូវគ្រោះអគ្គិភ័យ ប្រសិនជាមានគោលការណ៍ត្រូវកោះអញ្ជើញពួកគាត់មកធ្វើការណែនាំ ឬបង្រៀនពីវិធីបង្ការ និងចេះពីរបៀបបាញ់ទឹករឹតតែល្អ ។ គ្រប់អធិការដ្ឋាននគរបាលស្រុក-ក្រុង ត្រូវបន្តចុះសៀវភៅបញ្ជីស្នាក់នៅ(ក១) ជូនប្រជាពលរដ្ឋក្នុងមូលដ្ឋានឱ្យឆាប់បានចប់សព្វគ្រប់ និងជំរុញការងារភូមិ-ឃុំមានសុវត្ថិភាព ។
ដោយឡែកចំពោះវរសេនាតូចការពារព្រំដែនគោកទាំង៤ ត្រូវមានវិធានការទប់ស្កាត់បទល្មើសឆ្លងដែន និងអំពើភេរវកម្មឆ្លងដែន ។ កិច្ចប្រជុំនេះក៏មានការប្រគល់ថ្នាំចំនួន៣០មុខដល់វរសេនាតូចទាំង៤គឺវរសេនាតូចលេខ៩១១-៨៩១-៨០៧ និងលេខ៨១៥ផងដែរ ៕
ចែករំលែកព័តមាននេះ