ប្រទេសវៀតណាម ៖ អតីតអ្នកទទួលខុសត្រូវម្នាក់នៃរបបកុំមុយនីស្តវៀតណាមដែលត្រូវគេចាប់ពង្រត់នៅអាល្លឺម៉ង់កាលពីរដូវក្តៅកន្លងទៅ កាលពីថ្ងៃទី២២ មករា ត្រូវបានតុលាការវៀតណាមមួយកាត់ទោសដាក់គុកអស់មួយជីវិតពីបទពុករលួយក្នុងឱកាសនៃសវនាការកាត់ទោសមួយ ។
តាមវ៉េបសាយព័ត៌មានផ្លូវការ VNEXPRESS ថា លោក TRINH XUAN THANH អតីតមេដឹកនាំមួយរូបនៃបក្សកុំមុយនីស្តវៀតណាមដែលដឹកនាំក្រុមហ៊ុន PETRO VIETNAM CONSTRUCTION ជា ក្រុមហ៊ុនប្រេងរដ្ឋសំខាន់មួយត្រូវទទួលការកាត់ទោសដាក់គុក១៤ឆ្នាំពីបទគ្រប់គ្រងពុំបានល្អ និងកាត់ទោសដាក់គុកអស់មួយជីវិតពីបទពង្វាងយកប្រាក់យ៉ាងច្រើន ។ លោកនឹងទទួលការកាត់ទោសជាថ្មីចាប់ពីថ្ងៃទី២៤ មករា ទៅសម្រាប់សវនាការកាត់ទោសទី២ពីបទពង្វាងយកប្រាក់ឯទៀតៗ ដែលលោកអាចត្រូវគេកាត់ទោសប្រហារជីវិត ។
បណ្តាចៅក្រមវាយតម្លៃថា លោក TRANH បានបង្កការខូចខាតធ្ងន់ធ្ងរដល់រដ្ឋ និងថា ការកាត់ទោសនេះនឹងជាការព្រមានសម្រាប់ពលរដ្ឋវៀតណាមទាំងឡាយណា ដែលរំលោភបំពានអំណាច និងរំលោភច្បាប់ស្តីពីអំពើពុករលួយ ។
ទន្ទឹមនឹងការចោទប្រកាន់នានាប្រឆាំងលោក TRANH អតីតសមាជិកការិយាល័យនយោបាយបក្សកុំមុយនីស្តវៀតណាមមួយរូប លោក DINH LA THANG ត្រូវកាត់ទោសដាក់គុក១៣ឆ្នាំ ។ សាលក្រមកាត់ទោសក៏ត្រូវប្រកាសប្រឆាំងអតីតអ្នកទទួលខុសត្រូវក្បាលម៉ាស៊ីនរដ្ឋ២០នាក់ទៀតទាក់ទងនឹងសវនាការកាត់ទោសនោះដែលបិទមិនឱ្យសារព័ត៌មានបរទេសចូល ហើយដែលរដ្ឋាភិបាលចង់បង្ហាញថា នោះជានិមិត្តរូបមួយនៃការប្រយុទ្ធប្រឆាំងអំពើពុករលួយរបស់បណ្តាមន្ត្រីជាន់ខ្ពស់ ។
លោក TRINH XUAN THANH ត្រូវចាប់ពង្រត់កាលពីថ្ងៃទី២៣ កក្កដា ដោយបណ្តាជនប្រដាប់អាវុធក្នុងឧទ្យានសាធារណៈមួយនៃទីក្រុងប៊ែរឡាំង ដែលតាមអាល្លឺម៉ង់ថា ទង្វើបែបនេះអាចនាំឱ្យមានវិបត្តិការទូតមួយរវាងប្រទេសទាំង២ ។
ក្រុងហាណូយបដិសេធជានិច្ចថា ពុំបានចាប់ពង្រត់ ហើយអះអាងថា រូបគេវិលមកកាន់វៀតណាមដោយចិត្តឯង ។
មេធាវីរបស់លោក TRINH XUAN TANG លោកស្រី PETRA SCHLAGENHAUF សញ្ជាតិអាល្លឺម៉ង់ពុំត្រូវអនុញ្ញាតឱ្យមកកាន់វៀតណាមសម្រាប់សវនាការកាត់ទោសរូបគេឡើយ ។ លោកស្រីអះអាងថា នីតិវិធីនេះពុំគោរពនីតិរដ្ឋ ហើយអំពាវនាវដល់ក្រុងប៊ែរឡាំងឱ្យបន្តការគាបសង្កត់ ដើម្បីឱ្យកូនក្តីលោកស្រីអាចវិលមកកាន់អាល្លឺម៉ង់វិញ ។
មុនពេលមករស់នៅនិរទេសឯប្រទេសអាល្លឺម៉ង់ លោក TRINH XUAN TANH មានជីវភាពហ៊ឺហាខ្លាំងនៅវៀតណាមដូចអ្នកទទួលខុសត្រូវនៃរបបកុំមុយនីស្តវៀតណាមច្រើនរូបទៀតដែរ ។ ក៏ប៉ុន្តែកាលពីខែឧសភា ឆ្នាំ២០១៦ បណ្តារូបភាពលោកកំពុងតែបើករថយន្តទំនើបមួយគ្រឿងពាក់ស្លាកលេខរដ្ឋាភិបាលធ្វើឱ្យគេកត់សម្គាល់ និងធ្វើឱ្យលោកជួបការលំបាក ។ រូបភាពទាំងនោះផ្សាយតាមសារព័ត៌មានក្នុងស្រុកធ្វើឱ្យលោកក្លាយជាជនសង្ស័យឆ្លៀតរកប្រយោជន៍ដោយសម្ងាត់ ដោយសារតួនាទីរបស់លោកជាមន្ត្រីជាន់ខ្ពស់មួយរូបពុករលួយ ៕
ចែករំលែកព័តមាននេះ