សារព័ត៌មានបរទេសកាលពីពេល ថ្មីៗកន្លងមកផ្សាយថា អង្គភាពត្រួតពិនិត្យមនុស្សចូលប្រទេសរបស់កូឡុំប៊ីបានថ្លែងថា ពលរដ្ឋវ៉េណេស៊ុយអេឡាបានចូលប្រទេសប្រហែល៥៥០.០០០នាក់ កើនឡើងប្រហែល៦២%ពីអំឡុងពេល៦ខែកន្លងមក ភាគច្រើនជាអ្នកលួចឆ្លងដែនគេចពីវិបត្តិសេដ្ឋកិច្ចដែលកើតឡើងនៅវ៉េណេស៊ុយអេឡា ។
អាជ្ញាធរបានផ្តល់ជំនួយផ្នែកមនុស្សធម៌ទៅលើពលរដ្ឋវ៉េណេស៊ុយអេឡាដែលបានប្រមូលផ្តុំគ្នានៅតាមព្រំដែនមានបណ្តោយប្រហែល២.២០០គីឡូម៉ែត្រដោយការចែកស្បៀងអាហារឱសថ និងសាងសង់ជំរំបណ្តោះអាសន្នដល់ពួកគេ ។
ចំនួនពលរដ្ឋវ៉េណេស៊ុយអេឡាដែលបានទទួលប័ណ្ណឆ្លងដែនយ៉ាងស្របច្បាប់ពីរដ្ឋាភិបាលកូឡុំប៊ី ដើម្បីទៅទិញទំនិញត្រង់ច្រកចេញ-ចូលមានប្រហែល១លាននាក់ ។
តួលេខនៃការឆ្លងដែនរបស់ពលរដ្ឋវ៉េណេស៊ុយអេឡានេះជាមធ្យមចូលក្នុងប្រទេសមួយថ្ងៃប្រហែល៣៧.០០០នាក់ កាលពីឆ្នាំមុន ។
ចំណែកលោកអាវតូនីញ៉ូ គូតេរ៉េស អគ្គលេខាធិការនៃអង្គការសហប្រជាជាតិ បានថ្លែងកាលពីពេល ថ្មីៗកន្លងមកថា UNបានសម្តែងក្តីត្រេកអរ និងយល់ព្រមផ្តល់ជំនួយដល់រដ្ឋាភិបាលកូឡុំប៊ីដែលផ្តល់ការជួយជ្រោមជ្រែងបណ្តោះអាសន្នដល់ជនភៀសខ្លួនវ៉េណេស៊ុយអេឡា ។
មូលនិធិរូបិយវត្ថុអន្តរជាតិ(IMF)បានព្យាករថា អត្រាអតិផរណាសាច់ប្រាក់របស់វ៉េណេស៊ុយអេឡាក្នុងឆ្នាំនេះអាចឡើងខ្ពស់ដល់២.៣០០%ដោយកើនលើសប្រហែល៨ដង បើប្រៀបធៀបទៅនឹងឆ្នាំ២០១៦មានប្រហែល២៧៤% ៕
ចែករំលែកព័តមាននេះ