ខេត្តមណ្ឌលគិរី ៖ នៅម៉ោង៧យប់ថ្ងៃទី១៩ មករា ២០១៨ មានការភ្ញាក់ផ្អើលមួយធ្វើឱ្យអាជ្ញាធរក្នុងក្រុងសែនមនោរម្យ ចាត់កម្លាំងជាច្រើននាក់ចុះស្រាវជ្រាវ ករណីដែលល្បីតៗគ្នាថា រូបសំណាកអ្នកតាស្រុះ នៅលើភ្នំដោះក្រមុំដ៏ពូកែល្បីល្បាញប្រចាំខេត្តត្រូវបានជនមិនស្គាល់មុខវាយបំបាក់កជាលើកទីពីរ ។
លោក កាន់ ពេញ អធិការនគរបាលក្រុងសែនមនោរម្យ ដែលបានដឹកនាំកម្លាំងចុះទៅដល់ទីតាំងភ្នំដោះក្រមុំភ្លាមៗ ក្រោយទទួលបានដំណឹងថា មានជនមិនស្គាល់មុខវាយបំផ្លាញរូបសំណាកលោកតាស្រុះនៅលើភ្នំដោះក្រមុំនោះ បានឱ្យដឹងថា មិនមានករណីវាយបំផ្លាញណាមួយកើតឡើងទេ ។
លោកនិយាយថាគឺពួកជនបំពុលបរិយាកាស បានធ្វើការបង្ហោះរូបភាពចាស់ដែលបានកើតឡើងតាំងពីឆ្នាំ២០១៦ ខណៈដែលរូបសំណាកត្រូវជនវិកលចរិតវាយបាក់ដៃ និងក្បាលឱ្យទៅបណ្តាញទំនាក់ទំនងរបស់ថ្នាក់ដឹកនាំខេត្ត ទើបពេលនោះថ្នាក់ដឹកនាំបានបញ្ជាភ្លាមៗឱ្យកម្លាំងចុះពិនិត្យមើលជាបន្ទាន់ ។លោកអធិការបន្តថា សកម្មភាពខាងលើនេះគឺជាចេតនាអាក្រក់មួយ ដែលក្រុមជនសង្គមងងឹតបានបង្កើតឡើងដើម្បីបង្កចលាចលនិងជាការមើលស្រាលដល់មន្ត្រីកងកម្លាំង ដែលបាននិងកំពុងខិតខំធ្វើការយាមល្បាត ការពារសុវត្ថិភាពជូនប្រជាពលរដ្ឋ ។
លោកអធិការក្រុងបានសំណូមពរដល់ប្រជាពលរដ្ឋក្នុងក្រុងសែនមនោរម្យទាំងអស់ កុំមានក្តីមន្ទិលទាក់ទិនពាក្យចចាមអារ៉ាមថា មានគេវាយបំផ្លាញរូបសំណាកលោកតាភ្នំដោះក្រមុំ ព្រោះជាព័ត៌មានមិនពិត ដ្បិតរូបសំណាកនៅល្អស្អាត និងអាចឱ្យបងប្អូនបន់ស្រន់បានគ្រប់ពេលវេលាដូចមុន ៕
ចែករំលែកព័តមាននេះ