រាជធានីភ្នំពេញ ៖ លោក ប៊ុយ សោភ័ណ្ឌ អគ្គលេខាធិការស្ដីទីសហព័ន្ធកីឡាវាយកូនឃ្លី លើតុកម្ពុជា បានថ្លែងឱ្យដឹងនៅក្នុងពិធីបិទវគ្គបណ្ដុះបណ្ដាលចៅក្រម អាជ្ញាកណ្ដាលថ្នាក់ជាតិ កាលពីថ្ងៃទី២១…
រាជធានីភ្នំពេញ ៖ លោក ប៊ុយ សោភ័ណ្ឌ អគ្គលេខាធិការស្ដីទីសហព័ន្ធកីឡាវាយកូនឃ្លី
លើតុកម្ពុជា បានថ្លែងឱ្យដឹងនៅក្នុងពិធីបិទវគ្គបណ្ដុះបណ្ដាលចៅក្រម អាជ្ញាកណ្ដាលថ្នាក់ជាតិ កាលពីថ្ងៃទី២១ មករា នៅទីស្នាក់ការគណៈកម្មាធិការជាតិអូឡាំពិកកម្ពុជា ថា ដោយទទួលបានកិច្ចសហការយ៉ាងល្អជាមួយលោកគ្រូចាស់ៗ និងអ្នកដែលមានបទពិសោធន៍ស្រាប់ លោកសង្ឃឹមថា វិស័យកីឡាវាយកូនឃ្លីលើតុកម្ពុជា អាចមានការរីកចម្រើនខ្លាំងនៅក្នុងពេលដ៏ខ្លីខាងមុខ។
លោកថា សព្វថ្ងៃនេះធនធានមនុស្សនៅក្នុងសហព័ន្ធកីឡាវាយកូនឃ្លីលើតុកម្ពុជា មានច្រើនណាស់ យើងមិនមានអ្វីដែលពិបាកទៀតនោះទេ សំខាន់ឱ្យតែចេះរួមចិត្តរួមគំនិតជាមួយគ្នាធ្វើការ មិនយូរប៉ុន្មាននោះទេវិស័យកីឡាវាយកូនឃ្លីលើតុកម្ពុជា ពិតជាមានការអភិវឌ្ឍរីកចម្រើនយ៉ាងឆាប់រហ័សមិនខាន ។ លោកថា បញ្ហាចំពោះមុខធ្វើយ៉ាងណាត្រូវតែខិតខំជំរុញដល់មន្ត្រីអាជ្ញាកណ្ដាល ចៅក្រមរបស់យើងឱ្យឈានទៅដល់កម្រិតស្តង់ដារអន្តរជាតិ ។ ដូច្នេះហើយទើបក្រសួងអប់រំ យុវជន និងកីឡា សហការជាមួយសហព័ន្ធកីឡាវាយកូនឃ្លីលើតុ ខិតខំរៀបចំឱ្យមានវគ្គបណ្ដុះបណ្ដាលមួយនេះឡើង ព្រោះវាមានសារៈសំខាន់ខ្លាំងណាស់សម្រាប់ការអភិវឌ្ឍវិស័យកីឡាវាយកូនឃ្លីលើតុកម្ពុជាឱ្យមានការរីកចម្រើនទៅបាន ។ វគ្គបណ្ដុះបណ្ដាលនេះគ្រោងធ្វើឡើងតាំងពីថ្ងៃទី២៧ ខែធ្នូ ឆ្នាំ២០១៧មកម៉្លេះ ប៉ុន្តែដោយសារតែមានបញ្ហាខ្លះទើបពន្យារពេលមកធ្វើនៅដើមឆ្នាំ២០១៨នេះតែម្ដងដែលមានរយៈពេល៣ថ្ងៃចាប់ពីថ្ងៃទី១៩ដល់២១ មករា ។
សហព័ន្ធបានអញ្ជើញលោកស្រី Rachei RAMOS ជនជាតិហ្វីលីពីនជាគ្រូឧទ្ទេសកម្រិតកំពូលទទួលស្គាល់ដោយសហព័ន្ធកីឡាវាយកូនឃ្លីលើតុអន្តរជាតិ មកជួយបង្ហាត់បង្រៀន ។
លោក ប៊ុយ សោភ័ណ្ឌ បន្តថា ចំពោះការចូលរួមរយៈពេល៣ថ្ងៃលោកសង្កេតឃើញថា សិក្ខាកាមទាំង២៥នាក់មានការស្វែងយល់បានច្រើន ជាពិសេសអ្វីដែលពួកគាត់មិនធ្លាប់ទទួលបានពីមុនមក និងខិតខំសិក្សានូវអ្វីដែលត្រូវស្វែងយល់បន្ថែមទៅលើការអនុវត្តការងារជាចៅក្រម និងអាជ្ញាកណ្ដាល។
ជាមួយគ្នានេះដែរ ក្នុងចំណោមចៅក្រមនិងអាជ្ញាកណ្ដាលទាំង២៥នាក់នេះមាន៨នាក់បានប្រឡងជាប់ជាចៅក្រម អាជ្ញាកណ្ដាលកម្រិតមូលដ្ឋានដែលទទួលស្គាល់ដោយសហព័ន្ធកីឡាវាយកូនឃ្លីលើតុអន្តរជាតិ ដែលអាចចាត់ទុកថាជាជំហានដំបូងដែលអាចឱ្យពួកគាត់ឈានទៅដល់ការធ្វើជាចៅក្រមអាជ្ញាកណ្ដាលកម្រិតអន្តរជាតិ ។
មិនតែប៉ុណ្ណោះ សហព័ន្ធកីឡាវាយកូនឃ្លីលើតុកម្ពុជាមានគម្រោងធ្វើការបណ្ដុះបណ្ដាលចៅក្រម និងអាជ្ញាកណ្ដាលកម្រិតអន្តរជាតិយ៉ាងហោចណាស់ក៏២ទៅ៣នាក់ដែរនៅថ្ងៃខាងមុខ ដើម្បីចូលរួមធ្វើចៅក្រមនៅពេលប្រកួតកីឡាស៊ីហ្គេមនៅឆ្នាំ២០២៣ដែលកម្ពុជាធ្វើជាម្ចាស់ផ្ទះ។
លោកបានលើកឡើងទៀតថា នេះជាជោគជ័យថ្មីមួយសម្រាប់សហព័ន្ធកីឡាវាយកូនឃ្លីលើតុកម្ពុជា ព្រោះពីមុនមកយើងមិនដែលមានវគ្គបណ្ដុះបណ្ដាលបែបនេះឡើយដូច្នេះវគ្គនេះពិតជាមានសារៈសំខាន់ខ្លាំងណាស់ ។ នៅខែមីនា ខាងមុខ លោកនឹងរៀបចំឱ្យមានវគ្គនេះជាបន្តទៀត ហើយលោកក៏មានគម្រោងស្នើសុំទៅសហព័ន្ធកីឡាវាយកូនឃ្លីលើតុអន្តរជាតិរៀបចំឱ្យមានការប្រឡងជ្រើសរើសចៅក្រមអាជ្ញាកណ្ដាលអន្តរជាតិនៅកម្ពុជាតែម្ដង៕
ចែករំលែកព័តមាននេះ