រាជធានីភ្នំពេញ ៖ បុរសចំណាស់ម្នាក់បានកាន់រូបថត១សន្លឹកតាមស្វែងរកកូនប្រុសជាទីស្រឡាញ់របស់គាត់ដែលបានបាត់ខ្លួនរយៈពេល៣ថ្ងៃកន្លងមកហើយមិនដឹងថា ទៅទីណាឡើយ ។ បន្ទាប់ពីតាមរកគ្រប់ទីកន្លែងមិនបានឃើញកូននោះ បុរសខាងលើបានធ្វើដំណើរទៅកាន់សាលាសង្កាត់ចោមចៅ៣ កាលពីវេលាម៉ោង១១និង១០នាទីព្រឹកថ្ងៃទី២៣ ខែមករា ឆ្នាំ២០១…
រាជធានីភ្នំពេញ ៖ បុរសចំណាស់ម្នាក់បានកាន់រូបថត១សន្លឹកតាមស្វែងរកកូនប្រុសជាទីស្រឡាញ់របស់គាត់ដែលបានបាត់ខ្លួនរយៈពេល៣ថ្ងៃកន្លងមកហើយមិនដឹងថា ទៅទីណាឡើយ ។ បន្ទាប់ពីតាមរកគ្រប់ទីកន្លែងមិនបានឃើញកូននោះ បុរសខាងលើបានធ្វើដំណើរទៅកាន់សាលាសង្កាត់ចោមចៅ៣ កាលពីវេលាម៉ោង១១និង១០នាទីព្រឹកថ្ងៃទី២៣ ខែមករា ឆ្នាំ២០១ ដើម្បីសុំឲ្យអាជ្ញាធរជួយស្វែងរកកូនប្រុសគាត់ផង ។
បុរសចំណាស់ខាងលើនោះឈ្មោះ ឃុន គឹមសុង អាយុ៥៥ឆ្នាំ មុខរបររត់ម៉ូតូរ៉ឺម៉កកង់បី មានស្រុកកំណើតនៅ ភូមិព្រែកល្ពៅ សង្កាត់ដើមមាន ក្រុងតាខ្មៅ ខេត្តកណ្ដាល បានបាត់កូនប្រុសម្នាក់ឈ្មោះ សុង វិសាល អាយុ១៧ ឆ្នាំជាសិស្សរៀនថ្នាក់ទី៩ នៃវិទ្យាល័យ ហ៊ុន សែន ជម្ពូវ័ន ក្មេងប្រុសខាងលើបានមកស្នាក់នៅជាម្តាយធំ នៅក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
បុរសជាឪពុកបានរៀបរាប់ឲ្យដឹងថា សព្វថ្ងៃគាត់ និងប្រពន្ធបានស្នាក់នៅឯក្រុងតាខ្មៅ និងបានប្រកបរបររកស៊ីនៅទីនោះហើយកូនប្រុសរបស់គាត់ម្នាក់នេះធ្លាប់បួសជាសាមណេរបាន២វស្សា ។ លុះសឹកបានសិក្ខាបទមក គាត់បានយកកូនប្រុសទៅផ្ញើរឲ្យស្នាក់នៅជាមួយម្ដាយធំរបស់គេដែលត្រូវជាបងស្រីរបសគាត់នៅក្នុងភូមិព្រៃទាសង្កាត់ចោមចៅ៣ ខណ្ឌពោធិ៍សែនជ័យ នោះដើម្បីរៀនសូត្រនៅវិទ្យាល័យ ហ៊ុន សែន ជម្ពូវ័ន ក្នុងបំណងឲ្យកូនចេះដឹងទទួលសញ្ញាប័ត្រស្រួលរកការងារធ្វើនៅពេលអនាគត ។
បុរសខាងលើបានបន្តថា ទោះបីជាគាត់ និងក្រុមគ្រួសាបានឃ្លាតឆ្ងាយគ្នាជាមួយកូនក្ដី ប៉ុន្តែបានទំនាក់ទនងគ្នាជាប់ជាប្រចាំតាមទូរស័ព្ទក៏ដូចជានៅពេលទំនេរទៅលេងកូនផងដែរ ។ ដោយឡែកនៅវេលាល្ងាចថ្ងៃទី២០ ខែមករា ឆ្នាំ២០១៨ កូនប្រុសគាត់បានចាកចេញពីផ្ទះម្ដាយធំហើយក៏បានបាត់ដំណឹងសូន្យឈឹងតែម្ដង ដោយមិនដឹងថា ទៅណានោះឡើយ ហើយក៏មិនបានប្រាប់ថាទៅណាដែរ ។
ប្រភពខាងលើបានបន្តថា ក្រោយពីទទួលដំណឹងថា បាត់កូនប្រុសគាត់បានតាមរកគ្រប់ទីកន្លែងប៉ុន្តែមិនបានប្រទះឃើញឡើយ ដែលគិតរហូតមកដល់ថ្ងៃទី២៣ ខែមករា មានរយៈពេល៣ថ្ងៃកន្លងមកហើយ ។ គាត់ពិតជាមានការព្រួយបារម្ភខ្លាំងណាស់ខ្លាចមិត្តភក្ដិរបស់គេលួងលោមនាំយកទៅប្រើប្រាស់គ្រឿងញៀន ឬធ្វើអ្វីៗផ្សេងទៀតដែលជាទង្វើល្មើសច្បាបនាំមានទោសទណ្ឌ ។
បុរសជាឪពុកបានស្នើរសុំឲ្យអាជ្ញធរសង្កាត់ខាងលើរួមជាមួយនគរបាលប៉ុស្តិ៍ផងមេត្តាជួយស្វែងរកកូនប្រុសគាត់ផង ហើតគាត់ក៏បានអំពាវនាវដល់កូនប្រុសម្នាក់នេះ ។ បើបានមើលឃើញតាមរយៈការចុះផ្សាយព័ត៌មានតាមរយៈកាសែតក្ដីឬតាមបណ្ដាញផ្សព្វផ្សាយផ្សេងៗទៀតក្ដីសូមប្រញាប់ត្រឡប់ទៅផ្ទះវិញ គាត់ដែលជាឪពុកមិនយមទោសពៃរ៍អ្វីឡើយ ឬបើបងប្អូនណាបានដឹងសូមមេត្តាជួយផ្ដល់ដំណឹងជូនគាត់តាមរយៈអាជ្ញាធរ និងនគរបាលប៉ុស្តិ៍ចោមចៅ៣ដោយអនុគ្រោះផងចុះ ៕
ចែករំលែកព័តមាននេះ