ខេត្តព្រៃវែង ៖ ប្រជាពលរដ្ឋមានទីលំនៅក្នុងឃុំធាយ ស្រុកបាភ្នំ ក៏ដូចជាក្រុមអ្នកដំណើរជាច្រើនទៀតបាននិយាយដូចៗគ្នាថា ពេលពួកគាត់ធ្វើដំណើរឆ្លងកាត់ផ្លូវទំនប់បឹងស្នេហ៍ម្តងៗ ពួកគាត់មានការព្រួយបារម្ភណាស់ ព្រោះផ្លូវនេះមានទំហំតូច និងកំពស់រហូតដល់ទៅជាង៥ម៉ែត្រ ហើយសងខាងផ្លូវគ្មានអ្វីរាំងទប់នោះទេ…
ខេត្តព្រៃវែង ៖ ប្រជាពលរដ្ឋមានទីលំនៅក្នុងឃុំធាយ ស្រុកបាភ្នំ ក៏ដូចជាក្រុមអ្នកដំណើរជាច្រើនទៀតបាននិយាយដូចៗគ្នាថា ពេលពួកគាត់ធ្វើដំណើរឆ្លងកាត់ផ្លូវទំនប់បឹងស្នេហ៍ម្តងៗ ពួកគាត់មានការព្រួយបារម្ភណាស់ ព្រោះផ្លូវនេះមានទំហំតូច និងកំពស់រហូតដល់ទៅជាង៥ម៉ែត្រ ហើយសងខាងផ្លូវគ្មានអ្វីរាំងទប់នោះទេ ដែលងាយនឹងបង្កឲ្យមានគ្រោះថ្នាក់ខ្លាំងណាស់ ។
ពលរដ្ឋទាំងនោះបានបញ្ជាក់ថា ផ្លូវទំនប់បឹងស្នេហ៍នេះ ត្រូវបានគេសាងសង់ឡើងតាំងពីឆ្នាំ១៩៩៣មកម្ល៉េះ ដោយមានប្រវែងជាង៥០០ម៉ែត្រគិតចាប់ពីស្ពានស្នេហ៍ រហូតមកដល់ផ្សារស្នេហ៍ ដែលមានទំហំទទឹង៤ម៉ែត្រ និងកំពស់ជាង៥ម៉ែត្រ ។
ដោយសារតែផ្លូវនេះសាងសង់កាត់វាលបឹង ទើបនៅសងខាងផ្លូវគ្មានដើមឈើនោះទេ ហើយគេក៏មិនបានដាក់របាំងដែកការពារនៅអមសងខាងផ្លូវដែរ ជាហេតុធ្វើឲ្យកើតមានគ្រោះថ្នាក់ជាញឹកញាប់ ។ អ្នកស្រុកទាំងនោះបានសំណូមពរសុំឲ្យខាងមន្ទីរសាធារណៈការខេត្តព្រៃវែង មេត្តាជួយធ្វើរបាំងដែកដាក់នៅអមសងខាងផ្លូវនេះផង ដើម្បីការពារកុំឲ្យមានអ្នកគ្រោះថ្នាក់តទៅទៀត ។
ប្រជាពលរដ្ឋទាំងអស់នោះបានបញ្ជាក់ទៀតថា ផ្លូវទំនប់បឹងស្នេហ៍នេះ បច្ចុប្បន្នមិនមែនមានបញ្ហាតែរឿងអត់របាំងដែកសងខាងផ្លូវនោះទេ តួផ្លូវទាំងមូលក៏កំពុងតែរងការខូចខាតយ៉ាងធ្ងន់ធ្ងរដែរ ដោយសារតែគេបើកឲ្យមានរថយន្តយីឌុបធំៗ បើកឆ្លងកាត់ច្រើនពេកមួយយប់ៗរាប់រយគ្រឿងឯណោះ គេដឹកស្រូវយកទៅលក់នៅច្រកបន្ទាយចក្រី ហេតុនេះហើយពួកគាត់សំណូមពរឲ្យជួយធ្វើទាំងរបាំងដែក និងជួសជុលផ្លូវផង បើបានប៉ុណ្ណេះពួកគាត់ត្រេកអរណាស់ ។
ឆ្លើយតបចំពោះការស្នើសុំនេះ ត្រូវបានលោក អ៊ុន សុធា ប្រធានមន្ទីរសាធារណៈការខេត្តព្រៃវែង បញ្ជាក់ឲ្យដឹងតាមទូរស័ព្ទថា ផ្លូវទំបន់បឹងស្នេហ៍នេះលោកទទួលស្គាល់ថា វាពិតជាខូចខាតខ្លាំងមែន ហើយក៏មានហានិភ័យខ្លាំងមែន ។ លោកបានបញ្ជាក់ថា លោកនឹងធ្វើគម្រោងស្នើសុំទៅគណៈកម្មការត្រួតពិនិត្យរបស់ក្រសួង ដើម្បីឲ្យចុះមកត្រួតពិនិត្យមើល ដើម្បីលើកគម្រោងធ្វើការជួសជុល និងដាក់របាំងដែកឲ្យបានឆាប់បំផុត ៕
ចែករំលែកព័តមាននេះ