ទីក្រុងបាងកក ៖ ការកើនឡើងនៃតម្លៃប្រាក់បាតបានក្លាយជាប្រធានបទដ៏ពេញនិយមសាជាថ្មី ដោយមានអាជីវករខ្លះរអ៊ូរទាំ ។ តម្លៃប្រាក់បាតបានកើនឡើងជាង២% បើធៀបនឹងប្រាក់ដុល្លារក្នុងឆ្នាំ២០១៨ ហើយពេលនេះ ប្រាក់បាតជារូបិយប័ណ្ណដែលមើលឃើញតម្លៃកើនឡើងច្រើនជាងគេក្នុងអាស៊ី ។…
ទីក្រុងបាងកក ៖ ការកើនឡើងនៃតម្លៃប្រាក់បាតបានក្លាយជាប្រធានបទដ៏ពេញនិយមសាជាថ្មី ដោយមានអាជីវករខ្លះរអ៊ូរទាំ ។ តម្លៃប្រាក់បាតបានកើនឡើងជាង២% បើធៀបនឹងប្រាក់ដុល្លារក្នុងឆ្នាំ២០១៨ ហើយពេលនេះ ប្រាក់បាតជារូបិយប័ណ្ណដែលមើលឃើញតម្លៃកើនឡើងច្រើនជាងគេក្នុងអាស៊ី ។
ប្រាក់បាតកើនឡើងបានប៉ះពាល់ដល់អ្នកនាំចេញក្នុងប្រទេស ។ ប៉ុន្តែភ្ញៀវទេសចរបរទេសក៏ទទួលរងផលប៉ះពាល់ដែរ នៅពេលពួកគេប្តូរប្រាក់ទៅប្រាក់បាត ហើយបុគ្គលិកដែលរកប្រាក់ចំណូលបានជារូបិយប័ណ្ណបរទេស នឹងមើលឃើញប្រាក់ធ្លាក់ចុះនៅពេលប្តូរប្រាក់ ។
លោក Somjai Phagaphasvivat សេដ្ឋវិទូក្នុងសាកលវិទ្យាល័យ Thammasat បាននិយាយថា ព្រោះតែតម្លៃប្រាក់ដុល្លារធ្លាក់ចុះ វិនិយោគិនបរទេសបានងាកទៅវិនិយោគលើប័ណ្ណបំណុលថៃវិញ ។
ជាមួយគ្នានេះ លោកថា ទស្សនវិស័យដ៏ល្អនៃការលូតលាស់សេដ្ឋកិច្ចថៃ រួមជាមួយផលលើសពាណិជ្ជកម្មរបស់ប្រទេសនេះ ក៏បានទាក់ទាញវិនិយោគិនបន្ថែមទៀតដែរ ។
គណៈកម្មាធិការរួមផ្នែកពាណិជ្ជកម្ម ឧស្សាហកម្ម និងធនាគារកិច្ច (JSCCIB) និងក្រុម ប្រឹក្សាជាតិអ្នកនាំចេញក្នុងប្រទេសថៃ បានបង្កើតគណៈកម្មាធិការមួយដើម្បីតាមដានចលនាតម្លៃប្រាក់បាត ។
លោក Kalin ប្រធាន JSCCIB បាននិយាយថា អាជីវករចង់ឲ្យរដ្ឋាភិបាលប្រញាប់ដោះស្រាយបញ្ហានេះ និងធ្វើឲ្យការលូតលាស់នៃតម្លៃប្រាក់បាតស្របនឹងរូបិយវត្ថុរបស់ប្រទេសអាស៊ានដទៃទៀត ។
ជាមួយគ្នានេះ ធនាគារជាតិប្រទេសថៃក៏បានសហការជាមួយវិទ្យាស្ថានហិរញ្ញវត្ថុ ដើម្បីជួយដល់សហគ្រាសខ្នាតតូច និងមធ្យមផងដែរ ។
អាជីវករបានជំរុញដល់ធនាគារជាតិឲ្យបង្កើតមធ្យោបាយបន្ថែមដើម្បីទាក់ទាញការវិនិយោគបន្តទៀត ហើយវិស័យឯកជនគួរតែបង្កើនការនាំចូលវត្ថុធាតុដើម នៅពេលតម្លៃប្រាក់បាតនៅខ្ពស់ ។ រដ្ឋាភិបាលបានបន្តជំរុញឲ្យមានការវិនិយោគទៅក្រៅប្រទេសផងដែរ ។
រដ្ឋមន្ត្រីពាណិជ្ជកម្ម លោក Sontirat Sontijirawong បាននិយាយថា តម្លៃប្រាក់បាតកើនឡើងនឹងប៉ះពាល់ដល់ការប្រកួតប្រជែងនាំចេញរបស់ប្រទេសថៃជាមិនខាន ប៉ុន្តែក្រសួងកំពុងតែតាមដានផលប៉ះពាល់នេះហើយ ៕
ចែករំលែកព័តមាននេះ