ខេត្តកែប ៖ ខេត្តកែបត្រូវបានប្រសិទ្ធនាមថាជា «តារារះនាទិសនិរតី» និងបានចូលជាសមាជិកក្លិបឆ្នេរស្អាតបំផុតលើពិភពលោក ហើយថ្មីៗនេះ ខេត្តក៏បានទទួលជ័យលាភីថ្មីមួយទៀត គឺពានរង្វាន់ទីក្រុងទេសចរណ៍ស្អាតអាស៊ាន ធ្វើឲ្យខេត្តមួយនេះកាន់តែមានមុខមាត់លើឆាកអន្តរជាតិថែមទៀត ដែលធ្វើឲ្យភ្ញៀវទេសចរទាំងជាតិ…
ខេត្តកែប ៖ ខេត្តកែបត្រូវបានប្រសិទ្ធនាមថាជា «តារារះនាទិសនិរតី» និងបានចូលជាសមាជិកក្លិបឆ្នេរស្អាតបំផុតលើពិភពលោក ហើយថ្មីៗនេះ ខេត្តក៏បានទទួលជ័យលាភីថ្មីមួយទៀត គឺពានរង្វាន់ទីក្រុងទេសចរណ៍ស្អាតអាស៊ាន ធ្វើឲ្យខេត្តមួយនេះកាន់តែមានមុខមាត់លើឆាកអន្តរជាតិថែមទៀត ដែលធ្វើឲ្យភ្ញៀវទេសចរទាំងជាតិ និងអន្តរជាតិ ងាកមកទស្សនា និងលំហែកាយនៅតំបន់នេះកើនឡើងពីមួយឆ្នាំទៅមួយឆ្នាំ ប៉ុន្តែអ្វីដែលធ្វើឲ្យប៉ះពាល់ដល់អារម្មណ៍ភ្ញៀវទេសចរ មិនថាជាលក្ខណៈគ្រួសារ ឬមិត្តភក្តិទេ ពួកគេហាក់មិនសប្បាយចិត្តនៅពេលចង់អង្គុយក្រោមដើមឈើ បែរជាមានគេក្រាលកន្ទេលគិតលុយ ដែលកាលពីមុនមានតែនៅតំបន់ឆ្នេរខ្សាច់ប៉ុណ្ណោះ តែពេលនេះគឺស្ទើរតែគ្រប់ដើមឈើនៅតាមសមុទ្រទៅហើយ ។
រមណីយដ្ឋានកែប មិនថារថយន្ត ឬកន្លែងអង្គុយលេងក្រោមដើមឈើទេ គឺសុទ្ធតែត្រូវបង់លុយទាំងអស់ ។ ចំណែករថយន្ដដែលចូលទៅដល់ទីនោះ ក៏ត្រូវបង់ថ្លៃចំណតផងដែរ ដោយមិនដឹងថា តើបានរួមចំណែកអភិវឌ្ឍន៍អ្វីខ្លះដល់រមណីយដ្ឋាននេះ ខណៈសេវាសាធារណៈមួយចំនួននៅមានកង្វះខាត ពិសេសបង្គន់អនាម័យ ដែលជាកត្តាសំខាន់បំផុត ។
បើតាមការឲ្យដឹងពីភ្ញៀវទេសចរដែលទៅកម្សាន្តនៅខេត្តកំពុងមានសក្ដានុពលទេសចរណ៍មួយនេះ បានប្រាប់កោះសន្តិភាពថា ជារឿយៗ ពួកគេតែងតែឆ្លៀតធ្វើដំណើរទៅលម្ហែអារម្មណ៍នៅទឹកដីខេត្តកំពត និងកែបនេះ ព្រោះវានៅមិនឆ្ងាយប៉ុន្មានពីរាជធានីភ្នំពេញ ថែមទាំងបានធ្វើឲ្យពួកគេមានអារម្មណ៍ស្រស់ស្រាយ ដោយឃើញទេសភាពធម្មជាតិតាមដងព្រែក ព្រៃភ្នំ និងសមុទ្រល្ហល្ហេវដាច់កន្ទុយភ្នែក ជាពិសេស អាហារសមុទ្រដ៏សម្បូរបែបនៅផ្សារក្ដាម និងហូបអាហារក្រោមដើមឈើ អមដោយជំនោរសមុទ្រយ៉ាងត្រជាក់ចិត្ត។
ក៏ប៉ុន្ដែនៅពេលពួកគេចង់អង្គុយលេងនៅក្រោមដើមឈើនោះ សុទ្ធតែមានកន្ទេលបងប្អូនប្រជាពលរដ្ឋដាក់គិតលុយទាំងអស់ ដោយកន្ទេល១ តម្លៃពី១ម៉ឺនដល់៤ម៉ឺនរៀល ហើយក្នុង១ដើម ក្រាលកន្ទេល២ក៏មាន ទៅតាមម្លប់ធំឬតូច និងស្ថានភាពទីកន្លែង។ ក្នុងនោះប្រសិនបើពួកគេមានកន្ទេលខ្លួនឯង ក៏ត្រូវបង់លុយឲ្យពួកគាត់៥ពាន់រៀលដែរ ។ ចំណែករថយន្ដវិញ ត្រូវបង់៤ពាន់រៀលសម្រាប់ថ្លៃចំណត ។
ការចំណាយទាំងនេះ វាពិតជាបានចូលរួមលើកស្ទួយជីវភាពប្រជាពលរដ្ឋនៅក្នុងមូលដ្ឋានឲ្យប្រសើរឡើង និងសង្ឃឹមថា បានរួមចំណែកអភិវឌ្ឍន៍រមណីយដ្ឋានដ៏ល្អមួយនេះឲ្យកាន់តែទាក់ទាញការចាប់អារម្មណ៍ថែមទៀត ក៏ប៉ុន្ដែពួកគេគិតថា អ្វីដែលគួរចំណាយ និងអ្វីមិនគួរ ដោយគ្រាន់តែអង្គុយក្រោមដើមឈើ ក៏អស់លុយដែរនោះ ។
ពាក់ព័ន្ធនឹងបញ្ហាទាំងនេះ លោក ប៉ុក ទាំង អនុប្រធានមន្ទីរទេសចរណ៍ខេត្ត បានបកស្រាយតាមទូរស័ព្ទប្រាប់កោះសន្តិភាពកាលថ្ងៃទី១៦ មករា ថា ចំពោះថ្លៃភាស៊ីរថយន្ត គឺជារបស់ឯកជនដែលគាត់បានដេញថ្លៃជាមួយរដ្ឋបាលខេត្តជារៀងរាល់ឆ្នាំ ប៉ុន្តែចំពោះបញ្ហាការជួលកន្ទេល ឬអង្រឹងនៅតាមតំបន់មួយចំនួននៃឆ្នេរកែប គឺខេត្តមិនមានគោលការណ៍ ឬតម្រូវឲ្យធ្វើឡើយ ។
លោក ប៉ុក ទាំង បកស្រាយថា ៖« តាមពិត ខេត្តកែបសម្រាប់ថ្ងៃធម្មតា គឺមិនឲ្យអ្នកណាក្រាលកន្ទេលនៅក្រោមម្លប់ឈើ ឬនៅតាមមាត់ឆ្នេរទេ ។ នេះជាគោលការណ៍របស់រដ្ឋបាលខេត្ត តែត្រង់ថា អ្នកដែលឆ្លៀតលួចក្រាលកន្ទេលហ្នឹងគឺមានពេលលួច ភាគច្រើនពេលល្ងាច ឬជិតយប់អីហ្នឹង ហើយខេត្តបានដាក់វិធានការជាច្រើនលើកច្រើនសារួចមកហើយ តែនៅមិនអាចទប់ឈ្នះបានឡើយ តែបើសិនជាយើងថា មិនឲ្យមានអីចឹងសោះ ក៏ធ្វើឲ្យប៉ះពាល់ដល់អារម្មណ៍ពួកគាត់ដែរ ។ រហូតមកដល់ឥឡូវនេះ ពេលដែលខេត្តបានបំពាក់ភ្លើងនៅតាមផ្លូវបានភ្លឺស្អាតអស់ហើយ ពួកគាត់ឆ្លៀតមកដាក់កន្ទេលជួលពេលយប់ទៀត ដែលពីមុនមិនធ្លាប់មានសោះ ហើយខាងខេត្ត ក៏មិនដែលបានទទួលថវិកាពីពួកគាត់ឡើយ ប៉ុន្តែសំខាន់ គឺនៅលើឆ្នេរ ដាច់ខាតមិនឲ្យមានការជួលកន្ទេលឡើយ » ។
លោកបន្តថា ៖« សម្រាប់ការយកលុយឡាន ឬយកភាស៊ី គឺជាការដេញថ្លៃរវាងឯកជន និងរដ្ឋបាលខេត្តកែប ព្រោះបើមិនមានការយកលុយភាស៊ីទេ តើមានលុយឯណាសម្រាប់ឲ្យភ្នាក់ងារដែលគាត់គ្រប់គ្រងក្នុងការប្រមូលសំរាមរាល់ថ្ងៃ និងបង់ថវិកាចូលរដ្ឋមួយចំណែកនោះ » ។
លោកថា ៖« តាមពិតទៅ កែបគឺមានកន្លែងចំណតរថយន្ត តែភាគច្រើនភ្ញៀវគាត់មិនធ្វើតាមទេ គាត់រកតែកន្លែងស្រួល អីចឹងធ្វើឲ្យអ្នកដែលគាត់ប្រមូលលុយភាស៊ីហ្នឹងត្រូវដើរយកដល់កន្លែង ហើយពួកគាត់គិតថា ខេត្តកែបនេះដើរយកលុយដល់កន្លែង សូម្បីតែនៅក្រោមដើមឈើ ដែលគាត់គិតថា មិនមែនជាកន្លែងចំណត » ។
លោកបន្ថែមថា ៖« ខេត្តក៏មានគម្រោងធ្វើចំណតរថយន្តដែរ តែថវិការដ្ឋមិនធ្លាក់មកទាំងដុំៗនោះទេ អីចឹងយើងឆ្លៀតពង្រីកឆ្នេរបន្តិចៗបានមួយចំនួនហើយ ប៉ុន្តែដល់ពេលយើងមានកន្លែងត្រឹមត្រូវហើយ ពួកគាត់រអ៊ូថា ឆ្ងាយពីកន្លែងដែលគាត់ចង់ហូប និងឆ្ងាយពីកន្លែងពួកគាត់ចង់លេង នេះហើយជាចរិករបស់ខ្មែរយើង» ។
លោក ប៉ុក ទាំង បញ្ជាក់ថា សម្រាប់ថ្ងៃបុណ្យ រឹតតែទប់ទល់មិនឈ្នះទៀត អីចឹងមានតែបណ្ដោយឲ្យពួកគាត់ធ្វើទៅ ហើយខេត្តក៏បានរៀបចំសណ្ដាប់ធ្នាប់បានត្រឹមត្រូវសម្រាប់ពួកគាត់ដែរ គឺអ្នកដែលចង់ដាក់កន្ទេលជួល ត្រូវមកដាក់ពាក្យស្នើសុំ ឬដាក់កិច្ចសន្យាក្នុងការប្រមូលសំរាមនៅតំបន់ឆ្នេរកែបឲ្យបានស្អាតជានិច្ច ។
ទោះជាយ៉ាងណា ខេត្តកែបបាននិងកំពុងសាងសង់បង្គន់អនាម័យនៅតំបន់មួយចំនួនរួចរាល់ហើយ ប៉ុន្តែតំបន់ខ្លះគ្មានកន្លែងអាចសាងសង់បាន ។ ទោះបីយ៉ាងនេះក្ដី ខេត្តនៅតែបន្តគម្រោងនេះបន្តបន្ទាប់ទៅតាមការគ្រោងទុករបស់រដ្ឋបាលខេត្ត ។ នេះបើតាមលោក ប៉ុក ទាំង អនុប្រធានមន្ទីរទេសចរណ៍ខេត្ត ៕
ចែករំលែកព័តមាននេះ