កម្ពុជានឹងក្លាយជាប្រទេសផលិតស្បៀងដ៏សំខាន់លើពិភពលោក
- ភ្នំពេញ
រាជធានីភ្នំពេញ ៖ ថ្លែងក្នុងវេទិកាស្រូវអង្ករលើកទី៦ នាព្រឹកថ្ងៃទី២២ មករា នៅសណ្ឋាគារសូហ្វីតែល ភ្នំពេញ ភូគីត្រា ប្រធានសហព័ន្ធស្រូវអង្ករកម្ពុជា បានលើកឡើងថា…
រាជធានីភ្នំពេញ ៖ ថ្លែងក្នុងវេទិកាស្រូវអង្ករលើកទី៦ នាព្រឹកថ្ងៃទី២២ មករា នៅសណ្ឋាគារសូហ្វីតែល ភ្នំពេញ ភូគីត្រា ប្រធានសហព័ន្ធស្រូវអង្ករកម្ពុជា បានលើកឡើងថា…
រាជធានីភ្នំពេញ ៖ ថ្លែងក្នុងវេទិកាស្រូវអង្ករលើកទី៦ នាព្រឹកថ្ងៃទី២២ មករា នៅសណ្ឋាគារសូហ្វីតែល ភ្នំពេញ ភូគីត្រា ប្រធានសហព័ន្ធស្រូវអង្ករកម្ពុជា បានលើកឡើងថា នៅថ្ងៃអនាគត កម្ពុជានឹងក្លាយជាប្រទេសផលិត និងផ្គត់ផ្គង់ស្បៀងអាហារដ៏សំខាន់មួយនៅលើពិភពលោក ហើយនឹងទទួលស្គាល់ជាស្បៀងអាហារមានគុណភាព ។ ជាក់ស្ដែង បច្ចុប្បន្ននេះ អង្ករកម្ពុជាដែលយកទៅប្រកួតប្រជែងនៅក្នុងក្របខ័ណ្ឌពិភពលោកបានទទួលស្គាល់ជាអង្ករល្អជាងគេលំដាប់ពិភពលោក មានន័យថា កម្ពុជាមានសក្ដានុពលខ្ពស់ជាប្រទេសកសិកម្ម ។
លោក សុខ ពុទ្ធីវុធ ប្រធានសហព័ន្ធរូបនេះបានបន្តថា តម្រូវការស្បៀងនៅលើពិភពលោក បានកើនឡើងជាបន្តបន្ទាប់ដោយសារតែកំណើនប្រជាពលរដ្ឋកើនឡើងខ្ពស់។ ជាក់ស្ដែង តាមការព្យាករ ប្រជាពលរដ្ឋនៅលើពិភពលោក នឹងកើនឡើងដល់៩,៣ពាន់លាននាក់ ហើយតម្រូវការស្បៀងអាហារនឹងកើនកាន់តែខ្លាំងបន្ថែមទៀត ។ លោកថា ៖«បើក្រឡេកមកមើលស្ថានភាពប្រទេសកម្ពុជាយើងវិញឃើញថា កម្ពុជាមានសក្ដានុពលខ្ពស់ក្នុងការផលិតស្បៀងអាហារផ្គត់ផ្គង់មិនត្រឹមតែនៅក្នុងប្រទេសប៉ុណ្ណោះទេ ក៏ប៉ុន្តែនឹងឈានទៅផ្គត់ផ្គង់សម្រាប់បណ្ដាប្រទេសនានានៅលើពិភពលោកទៀតផង » ។
លោកបន្ថែមថា ដើម្បីក្លាយខ្លួនជាប្រទេសផលិត និងផ្គត់ផ្គង់ស្បៀងដ៏សំខាន់នៅពេលខាងមុខ ក្នុងនាមសហព័ន្ធស្រូវអង្ករកម្ពុជា នឹងធ្វើការយ៉ាងជិតស្និទ្ធជាមួយប្រជាកសិករក្នុងការផលិតស្បៀង ជាពិសេស ផលិតផលស្រូវអង្ករណាដែលមានហាងឆេងសម្រាប់ទីផ្សារអន្តរជាតិ ហើយនឹងជ្រើសរើសពូជស្រូវមានតម្លៃមកផ្គត់ផ្គង់ដល់ប្រជាពលរដ្ឋ ដើម្បីលើកកម្ពស់ប្រាក់ចំណូលរបស់ពួកគាត់បន្ថែម និងលើកទឹកចិត្តឲ្យកសិករកាន់តែប្រឹងប្រែងផលិតស្បៀងមានគុណភាពសម្រាប់ផ្គត់ផ្គង់ ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកវេង សាខុន បានមានប្រសាសន៍ថា ក្នុងឆ្នាំ២០១៨នេះ កម្ពុជាមានកូតានាំចេញអង្ករក្រអូបចំនួន៣០ម៉ឺនតោនទៅក្រៅប្រទេស។ ក្រៅពីនេះ កម្ពុជានឹងសហការជាមួយបណ្ដាប្រទេសធំៗក្នុងវិស័យកសិកម្ម ដើម្បីនាំយកពូជស្រូវដែលមានតម្រូវការខ្ពស់នៅលើពិភពលោក មកដាំផ្គត់ផ្គង់ទៅបណ្ដាប្រទេសមានតម្រូវការ ។
លោករដ្ឋមន្ត្រីបន្តថា កម្ពុជាបានត្រៀមខ្លួនជាស្រេចហើយក្នុងការវិនិយោគបន្ថែមលើវិស័យកសិកម្ម និងជំរុញឲ្យមានការវិនិយោគនូវការកែច្នៃផលិតផលកសិកម្ម មុននឹងនាំចេញទៅក្រៅប្រទេស ។ ជាក់ស្ដែង ក្រសួងកសិកម្ម និងពាណិជ្ជកម្មតែងតែកៀងគរវិនិយោគិនបរទេស និងក្នុងស្រុក ឲ្យមកបណ្ដាក់ទុនបង្កើតរោងចក្រកែច្នៃផលិតផលកសិកម្មនៅក្នុងស្រុក មុននឹងនាំចេញផលិតផលសម្រេចទៅបរទេស ។
លោក គង់ វុទ្ធី តំណាងប្រជាសហគមន៍គ្រឹងលាវ ក្នុងស្រុករលាប្អៀរ ខេត្តកំពង់ឆ្នាំង បានឲ្យដឹងថា ថ្នាក់ដឹកនាំដែលពាក់ព័ន្ធនឹងវិស័យកសិកម្ម គួរចុះពិនិត្យផ្ទាល់ជាមួយកសិករ ដើម្បីឲ្យដឹងថា កសិករត្រូវការអ្វីខ្លះ និងជួបការលំបាកអ្វីខ្លះ ក្នុងគោលបំណងជំរុញការផលិត ផលិតផលខ្មែរសម្រាប់ផ្គត់ផ្គង់ទីផ្សារក្នុងស្រុក និងនាំចេញ ។ លោកថា ៖« ថ្នាក់ដឹកនាំធំៗគួរតែចុះមកមើលផ្ទាល់ ហើយសូមកុំទាន់ជឿជាក់លើថ្នាក់ក្រោមរាយការណ៍ទៅ ព្រោះមន្ត្រីថ្នាក់ក្រោមមួយចំនួនបានរាយការណ៍ពីអ្វីជាវិជ្ជមាន និងមិនបានរាយការណ៍ពីចំណុចអវិជ្ជមានទៅថ្នាក់លើទេ » ។
លោកបន្តថា បច្ចុប្បន្ន ទីផ្សារផលិតផលកសិកម្មហាក់គ្មានស្ថិរភាពច្បាស់លាស់ឡើយ ពោលគឺផលិតផលរបស់ខ្មែរអាចផ្គត់ផ្គង់បានតាមរដូវកាល និងគ្មានស្ថិរភាពយូរអង្វែងដូចផលិតផលបរទេសទេ គឺកសិករនៅតែបង្កបង្កើនផលតាមបែបបុរាណនៅឡើយ ខុសពីប្រទេសជិតខាង ដែលគេមានផលិតផលគ្រប់រដូវសម្រាប់ផ្គត់ផ្គង់ ។ លោកថា ៖ «កសិករចង់ឲ្យមន្ត្រីជំនាញកសិកម្មចុះអប់រំពីបច្ចេកទេសដាំដុះដើម្បីផ្គត់ផ្គង់ឲ្យបានគ្រប់រដូវ ជាជាងបានតែមួយរយៈ ហើយត្រូវនាំពីប្រទេសក្រៅមកផ្គត់ផ្គង់ជំនួសវិញ » ។
គួររំឭកថា រាជរដ្ឋាភិបាលបានសម្រេចដាក់ចេញនូវគោលនយោបាយស្រូវអង្ករជាផ្លូវការក្នុងឆ្នាំ២០១០ ដែលកាលនោះ បរិមាណនាំអង្ករចេញទៅកាន់ទីផ្សារអន្តរជាតិជិត ៤ម៉ឺនតោន ហើយបរិមាណនាំចេញបានកើន៥ដង រហូតដល់២០ម៉ឺនតោននៅឆ្នាំបន្ទាប់ ។ បរិមាណនាំចេញបានកើនឡើងរហូតដល់៤០ម៉ឺនតោននៅឆ្នាំ២០១៣ ដោយកើនឡើងជិត១០ដងធៀបនឹងឆ្នាំ២០១០ ។
នៅដំណាច់ឆ្នាំ២០១៧ កម្ពុជាសម្រេចការនាំចេញអង្ករទៅកាន់ទីផ្សារអន្តរជាតិជាង៦៣៥.០០០តោនទៅកាន់ប្រទេស៦៣ក្នុងសកលលោក ។
តាមទិន្នន័យចុងក្រោយក្នុងឆ្នាំ២០១៧ បង្ហាញថា ទីផ្សារនៃប្រទេសជាសមាជិកសហភាពអឺរ៉ុបបានស្រូបយកអង្ករកម្ពុជា៤៣% នៃបរិមាណនាំចេញសរុប ស្របពេលទីផ្សារចិនកំពុងប្រជែងក្នុងល្បឿនយ៉ាងរហ័សក្នុងការស្រូបយកអង្ករពីកម្ពុជា ដោយមានចំណែក៣៤%នៃការនាំចេញសរុប ៕
ចែករំលែកព័តមាននេះ