ស្ត្រីរងគ្រោះម្នាក់ អំពាវនាវសាលាដំបូងខេត្តពន្លឿននីតិវិធី
- ព្រៃវែង
ខេត្តព្រៃវែង ៖ អ្នកស្រី អ៊ឹង ស្រីមុំ អាយុ៣៩ឆ្នាំ ជាម្ចាស់គ្លីនិកធ្មេញមួយកន្លែងនៅផ្សារឈើកាច់ ស្រុកបាភ្នំ បានអះអាងថា អ្នកស្រីត្រូវបានបុរសឈ្មោះ…
ខេត្តព្រៃវែង ៖ អ្នកស្រី អ៊ឹង ស្រីមុំ អាយុ៣៩ឆ្នាំ ជាម្ចាស់គ្លីនិកធ្មេញមួយកន្លែងនៅផ្សារឈើកាច់ ស្រុកបាភ្នំ បានអះអាងថា អ្នកស្រីត្រូវបានបុរសឈ្មោះ…
ខេត្តព្រៃវែង ៖ អ្នកស្រី អ៊ឹង ស្រីមុំ អាយុ៣៩ឆ្នាំ ជាម្ចាស់គ្លីនិកធ្មេញមួយកន្លែងនៅផ្សារឈើកាច់ ស្រុកបាភ្នំ បានអះអាងថា អ្នកស្រីត្រូវបានបុរសឈ្មោះ ឆន វណ្ណៈ ព្រមទាំងប្រពន្ធ និងម្តាយក្មេក ព្រួតគ្នាវាយបណ្តាលឲ្យសន្លប់ កាលពីថ្ងៃទី៧ ខែកញ្ញា ២០១៧ នៅមុខគ្លីនិករបស់អ្នកស្រី តែរហូតមកដល់ពេលនេះគឺជាង៤ខែហើយ អ្នកស្រីនៅមិនទាន់ទទួលបានយុត្តិធម៌ទេ។ អ្នកស្រី អ៊ឹង ស្រីមុំ បានបន្តទៀតថា កាលពីវេលាម៉ោង៦ល្ងាច ថ្ងៃទី៧ កញ្ញា ២០១៧ មានភ្ញៀវ២នាក់ប្តីប្រពន្ធ បានចូលមកព្យាបាលធ្មេញក្នុងគ្លីនិករបស់គាត់ ក្រោយពីព្យាបាលហើយភ្ញៀវទាំង២ក៏ចេញទៅវិញ បម្រុងឡើងជិះម៉ូតូហើយនោះស្រាប់តែស្ត្រីម្នាក់ឈ្មោះ ណេត ជាអ្នកលក់សាច់ជ្រូកនៅក្បែនោះ ស្រែកហៅអ្នកទាំងពីរទៅរៀបរាប់ប្រាប់ ដោយបរិហារកេរ្តិ៍ពីគ្លីនិករបស់អ្នកស្រី ធ្វើឲ្យអ្នកស្រីទ្រាំមិនបាន ក៏ស្រែកឡើងថា និងបុកអំបិលម្ទេសអុជធូបដាក់បណ្ដាសាអ្នកណាដែលដើរនិយាយបរិហារកេរ្តិ៍ ពីគ្លីនិកអ្នកស្រី ភ្លាមនោះស្ត្រីឈ្មោះ ណេត ច្រឡោត ហើយក៏ស្រែកជេរអ្នកស្រីផ្អើលពេញផ្សារ ។ បន្ទាប់មកបុរសឈ្មោះ ឆន វណ្ណៈ ដែលត្រូវជាកូនប្រុសស្ត្រីឈ្មោះ ណេត នោះជិះម៉ូតូមកដល់ ក៏ស្ទុះមកចាប់បោចសក់ និងវាយអ្នកស្រី នៅមុខគ្លីនិកអ្នកស្រីតែម្តង ហើយពេលប្រទាញប្រទង់គ្នា នោះស្រី្តឈ្មោះ ណេត និងកូនប្រសារស្រីឈ្មោះ ញ៉ សាវឿន ហៅប៉ូច ក៏ចូលមកជួយព្រួតវាយអ្នកស្រីទៀត បណ្តាលឲ្យរងរបួសយ៉ាងដំណំ ទើបអ្នកស្រុកជិតខាងចូលមកចាប់ឃាត់បំបែកចេញ តែអ្នកស្រីបានដួលសន្លប់បាត់ទៅហើយ ដោយសារតែត្រូវគេចាប់បោចសក់បោកផ្ទប់នឹងជញ្ជាំងកញ្ចក់។
ដោយឡែកលោក រស់ សិលា ដែលត្រូវជាប្តីរបស់អ្នកស្រី អ៊ឹង ស្រីមុំ បានឲ្យដឹងដែរថា ពេលអ្នកជំងឺចូលមកដកធ្មេញនោះ គាត់ជាអ្នកដកធ្មេញឲ្យ តែក្រោយពីដកហើយនោះ ពេលអ្នកជំងឺចេញទៅ គាត់ក៏ចេញពីគ្លីនិកទៅដែរគឺទៅផ្ទះនៅខាងក្រោយ។ លុះមួយសន្ទុះក្រោយមកក៏ស្រាប់តែមានក្មេងស្រីម្នាក់ជិះម៉ូតូទៅប្រាប់ថា ប្រពន្ធគាត់ត្រូវគេវាយហើយ ពេលគាត់រត់មកដល់ឃើញប្រពន្ធសន្លប់បាត់ ក៏ទូរសព្ទ័ប្តឹងអធិការស្រុក ដើម្បីបញ្ជាកម្លាំងចុះមកព្រោងព្រាតពេញមុខគ្លីនិកភ្លាមៗតែម្តង តែមិនបានចាប់ជនបង្កនោះទេ ចំណែករូបគាត់ក៏នាំប្រពន្ធទៅសម្រាកព្យាបាលនៅគ្លីនិកឯកជនមួយក្នុងស្រុក លុះស្អែកឡើងក៏បន្តទៅព្យាបាលនៅមន្ទីរពេទ្យខេត្តទៀត។ ក្រុមគ្រួសារជនរងគ្រោះបានអះអាងថា ក្រោយពីកើតហេតុប៉ុន្មានថ្ងៃ នគរបាលស្រុកបាភ្នំបានប្រាប់គាត់ថា ភាគីខាងជនបង្កសុំសងលុយ១លាន រៀល ព្រមទាំងធ្វើការសុំទោសទទួលកំហុសដែលបានធ្វើមកលើនារីរងគ្រោះ ហើយភាគីជនរងគ្រោះ ក៏ឆ្លើយតបថា បើគេព្រមសុំទោសទទួលកំហុស ជនរងគ្រោះក៏ព្រមអត់ទោសដែរ ប៉ុន្តែមិនទាន់បាន សុំទោសផង បែរជាជនបង្កបោះពាក្យសម្ដីថា គេមិនសុំទោសមិនសងអ្វីទាំងអស់ ចង់ប្តឹងដល់ណាដល់ ទៅមិនដែលអ្នកក្រប្តឹងឈ្នះអ្នកមាន ធ្វើឲ្យគ្រួសារជនរងគ្រោះក្តៅក្រហាយ ក៏ដាក់ពាក្យប្តឹងទៅសាលា ដំបូងខេត្តព្រៃវែងតែម្តង។
ប៉ុន្តែតាំងពីដាក់ពាក្យរហូតមកដល់ពេលនេះជាង៤ខែហើយ សំណុំរឿងបាន បញ្ជូនដល់ដៃលោក ភា ជា ចៅក្រមស៊ើបសួរហើយ តែមិនឃើញមានចំណាត់ការអ្វីសោះ ទើបតាមរយៈ សារពត៌មាន គ្រួសារជនរងគ្រោះ សំណូមពរឲ្យសាលាដំបូងខេត្តជួយពន្លឿននីតិវិធីឲ្យ បានឆាប់ផង ដើម្បីឲ្យក្រុមគ្រួសារគាត់ឆាប់ទទួលបានយុត្តិធម៌។ លោក រស់ សិលា ព្រមទាំងប្រពន្ធលោកស្រី អ៊ឹង ស្រីមុំ បានបញ្ជាក់ប្រាប់ថា ពួកគាត់គ្រាន់តែចង់ឲ្យភាគីបង្កទទួលកំហុស និងធ្វើការសុំទោសចំពោះគ្រួសារគាត់ ប៉ុណ្ណោះ គឺមិនចង់បានសំណងអ្វីទេ ប៉ុន្តែបើច្បាប់សម្រេចតម្រូវឲ្យភាគីបង្កសងជាសំណង សំណងទាំង អស់គឺគាត់សុំប្រគល់ទៅឲ្យមន្ទីរពេទ្យគុន្ធបុប្ផា។ ចំពោះការលើកឡើងខាងលើនេះ ត្រូវបានបុរសឈ្មោះ ឆន វណ្ណៈ ជាភាគីម្ខាងទៀតអះអាងប្រាប់ថា រូបគេ និងក្រុមគ្រួសារមិនបានព្រួតវាយនារីរងគ្រោះទេ គឺនារីរងគ្រោះជាអ្នកក្របួចកអាវខ្លួនអូសចូលទៅមុខគ្លីនិកនោះ ហើយឃើញបែបនោះម្តាយ និងប្រពន្ធ របស់គេក៏ចូលទៅចាប់បំបែក តែចាប់មិនឈ្នះទៀតដោយឈ្មោះ អ៊ឹង ស្រីមុំ បានខាំដៃខ្លួនឯងឲ្យមានរបួស និងបោចសក់ខ្លួនឯងបោកផ្ទប់នឹងកញ្ចក់ រួចធ្វើជាសន្លប់ គឺមានចេតនាទាំងស្រុង ចំណុចនេះរូបគេក៏បាន ដាក់ពាក្យប្តឹងបកវិញហើយដែរ។ ជុំវិញបញ្ហាខាងលើជាមួយនឹងការស្នើសុំរបស់ភាគីជនរងគ្រោះ ត្រូវបានលោក ញ៉ឹក រ៉ានី អ្នកនាំពាក្យសាលាដំបូងខេត្តព្រៃវែង ប្រាប់ឲ្យដឹងតាមទូរសព្ទ័ថា សំណុំរឿងមួយនេះលោកមិនទាន់បានដឹងនោះទេ ប៉ុន្តែទោះយ៉ាងណាពេលទៅដល់កន្លែងធ្វើការវិញ លោកនឹងឆែកមើល ហើយលោកនឹងជំរុញឲ្យមានការចាត់ការរឿងនេះអោយបានឆាប់បំផុត៕
ចែករំលែកព័តមាននេះ