ខេត្តព្រៃវែង ៖ កាលពីថ្ងៃទី៤ កុម្ភៈ វេលាម៉ោង៥ល្ងាចនៅភូមិដំរីស្លាប់ ឃុំបន្ទាយចក្រី ស្រុកព្រះសេ្តចមានគ្រោះថ្នាក់ចរាចរណ៍មួយបណ្តាលឱ្យមនុស្សស្លាប់ម្នាក់ និងរបួសធ្ងន់៣នាក់ ដោយការក្រឡាប់រថយន្តម៉ាកកាមរីពណ៌ស១គ្រឿង ពាក់ស្លាកលេខ២B២៧៣៤ ស៊េរីឆ្នាំ៨៣ បើកបរដោយឈ្មោះគុល តូ អាយុ៤៣ឆ្នាំ មានទីលំនៅក្នុងភូមិពានជ័យ ឃុំសេនារាជឧត្តម ស្រុកព្រះស្តេច។ រថយន្តនេះម្ចាស់ទើបតែទិញពីមិត្តភក្តិក្នុងតំលៃ៤០០ដុល្លារ តែមិនទាន់ប្រគល់ប្រាក់នៅឡើយ ។
អ្នកបើកបរឈ្មោះគុល តូ រៀបរាប់ថា ពេលបានរថយន្ត ហើយគេនាំមិត្តភក្តិចំនួន៤នាក់ទៀត គឺ១-ឈ្មោះអ៊ុំ សាត អាយុ៥៣ឆ្នាំ ជាកសិករ, ២-ឈ្មោះយង់ សារិទ្ធ អាយុ៣៥ឆ្នាំ ជាបញ្ជាការរងកងរាជអាវុធហត្ថស្រុកព្រះស្តេច, ៣-ឈ្មោះញ៉ា ជាជនជាតិវៀតណាមកាត់ខ្មែរនៅភូមិជ័យតា ឃុំបន្ទាយចក្រី ស្រុកព្រះស្តេច ជាកសិករ និង៤-ឈ្មោះខេន ព្រឹលឹង អាយុ៤៥ឆ្នាំ ជាបុគ្គលិកពេទ្យប្រចាំមណ្ឌលសុខភាពភូមិអុសរលួយ ឃុំបន្ទាយចក្រី។ មិត្តភក្តិទាំង៤សុទ្ធតែជាអ្នកទៅជួយមើលម៉ាស៊ីនរថយន្តដែលត្រូវទិញនេះដែរ។
ទាក់ទិននឹងការក្រឡាប់រថយន្តនេះម្ចាស់ថ្មីនិយាយថា ក្រោយពីពួកគេពិនិត្យឃើញរថយន្ត ល្អសមរម្យអាចយកបានហើយក៏នាំគ្នាឡើងជិះពីផ្ទះម្ចាស់ដើមចេញដំណើរទៅផឹកស៊ីឱ្យសប្បាយម្តង ហើយក៏ចំថ្ងៃចូលឆ្នាំចិនដែរ។ ពួកគេនាំគ្នាផឹកពីចំណុច១ទៅចំណុចមួយហូរហែរហូតស្រវឹងជោគ ហើយបំណងឆ្លងស្ពានច្រកបន្ទាយចក្រីទៅវៀតណាមទៀតផង តែក្រុមអ្នកនៅចាំកុងត្រូលព្រំដែនច្រកបន្ទាយចក្រីឃើញស្រវឹងបែបនេះក៏ឃាត់ដំណើរមិនឱ្យទៅ។ ពួកគេទាំង៤នាក់អន់ចិត្តក៏បើកឡានត្រឡប់មកក្រោយវិញហើយទៅផឹកនៅកន្លែងមួយទៀត។
សាក្សីឃើញហេតុការណ៍និយាយថា គេឃើញរថយន្តនេះបើកលឿនណាស់លើផ្លូវថ្មីដែលមិនធ្លាប់មានក្នុងតំបន់នោះផ្អើលគោ មាន់ ទា ជ្រូករត់ចូលវាលស្រែអស់។ បន្ទាប់ពីបើកបានប្រមាណ២ទៅ៣គីឡូម៉ែត្រពីច្រកព្រំដែនបន្ទាយចក្រីដល់ផ្លូវបត់កោងរថយន្តអត់បត់តាមទ្រង់ទ្រាយផ្លូវកោងទេ គឺបើកហួសខុសផ្លូវបណ្តាលឱ្យក្រឡាប់ធ្លាក់ប្រឡាយតែម្តង។ តាមសាក្សីឃើញហេតុការណ៍និយាយថា គេឃើញអ្នកបើកបរដែលជាម្ចាស់ថ្មី លូនចេញពីក្នុងរថយន្តដោយរងរបួស និងអ្នកខ្លះស្រាតខោជើងវែងចោលនៅតែខោស្ល៊ីបរត់បាត់ស្រមោលចោលរថយន្ត និងមិត្តភក្តិទាំង៣នាក់។អ្នកស្រុកនាំគ្នារត់ទៅមើល និងជួយសង្គ្រោះអ្នករបួសជាបន្ទាន់ដឹកទៅមន្ទីរពេទ្យប្រទេសវៀតណាម។ នៅកន្លែងកើតហេតុគេឃើញឈ្មោះខេន ព្រលឹង ស្លាប់នៅនឹងកន្លែង ឈ្មោះអ៊ុំ សាត និងឈ្មោះយង់ សារិទ្ធ រងរបួសធ្ងន់ និងមធ្យម រីឯឈ្មោះញ៉ា រងរបួសធ្ងន់មិនដឹងស្លាប់ ឬរស់ទេ ត្រូវគេដឹកទៅសង្គ្រោះនៅប្រទេសវៀតណាម៕
ចែករំលែកព័តមាននេះ